Тропарь ангелу хранителю текст с ударениями (2 видео)

Тропарь и кондак Ангелу-хранителю

Тропарь, глас 6

Ангеле Божий, хранителю мой святый, живот мой соблюди во страсе Христа Бога, ум мой утверди во истиннем пути, и к любви горней уязви душу мою да тобою направляема получу от Христа Бога велию милость.

Кондак, глас 4

Явися мне милосерд, святый Ангеле Господень, хранителю мой, и не отлучайся мене сквернаго, но просвети мя светом неприкосновенным и сотвори мя достойна Царствия Небеснаго.

Видео:Тропарь Ангелу Хранителю на защитуСкачать

Канон Ангелу хранителю

Тропарь, глас 6-й

Áнгеле Бóжий, храни́телю мой святы́й, живóт мой соблюди́ во стрáсе Христá Бóга, ум мой утверди́ во и́стиннем пути́, и к любви́ гóрней уязви́ ду́шу мою́, да тобóю направля́емь, получу́ от Христá Бóга вéлию ми́лость.

Богородичен: Святáя Влады́чице, Христá Бóга нáшего Мáти, я́ко всех Творцá недоумéнно рóждшая, моли́ блáгость Егó всегдá, со храни́телем мои́м Áнгелом, спасти́ ду́шу мою́, страстьми́ одержи́мую, и оставлéние грехóв даровáти ми.

Песнь 1

Ирмос: Пои́м Гóсподеви, провéдшему лю́ди Своя́ сквозé Чермнóе мóре, я́ко еди́н слáвно прослáвися.

Иису́су: Гóсподи Иису́се Христé Бóже мой, поми́луй мя.

Песнь воспéти и восхвали́ти, Спáсе, Твоегó рабá достóйно сподóби, безплóтному Áнгелу, настáвнику и храни́телю моему́.

Святы́й Áнгеле Бóжий, храни́телю мой, моли́ Бóга о мне.

Еди́н аз в неразу́мии и в лéности ны́не лежу́, настáвниче мой и храни́телю, не остáви менé погибáюща.

Слава: Ум мой твоéю моли́твою напрáви, твори́ти ми Бóжия повелéния, да получу́ от Бóга отдáние грехóв, и ненави́дети ми злых настáви мя, молю́ся ти.

И ныне: Моли́ся, Деви́це, о мне, рабé Твоéм, ко Благодáтелю, со храни́телем мои́м Áнгелом, и настáви мя твори́ти зáповеди Сы́на Твоегó и Творцá моегó.

Песнь 3

Ирмос: Ты еси́ утверждéние притекáющих к Тебé, Гóсподи, Ты еси́ свет омрачéнных, и поéт Тя дух мой.

Святы́й Áнгеле Бóжий, храни́телю мой, моли́ Бóга о мне.

Все помышлéние моé и ду́шу мою́ к тебе возложи́х, храни́телю мой; ты от вся́кия мя напáсти врáжия избáви.

Святы́й Áнгеле Бóжий, храни́телю мой, моли́ Бóга о мне.

Враг попирáет мя, и озлобля́ет, и поучáет всегдá твори́ти своя́ хотéния; но ты, настáвниче мой, не остáви менé погибáюща.

Слава: Пéти песнь со благодарéнием и усéрдием Творцу́ и Бóгу даждь ми, и тебé, благóму Áнгелу, храни́телю моему́: избáвителю мой, изми́ мя от враг озлобля́ющих мя.

И ныне: Исцели́, Пречи́стая, моя́ многонеду́жныя стру́пы, я́же в души́, прожени́ враги́, и́же при́сно бóрются со мнóю.

Седален, глас 2-й

От любвé душéвныя вопию́ ти, храни́телю моея́ души́, всесвяты́й мой Áнгеле: покры́й мя и соблюди́ от лукáваго ловлени́я всегдá, и к жи́зни́ настáви небéсней, вразумля́я и просвещáя и укрепля́я мя.

Богородичен: Богорóдице безневéстная Пречи́стая, Я́же без сéмене рóждши всех Влады́ку, Тогó со Áнгелом, храни́телем мои́м моли́, избáвити ми ся вся́каго недоумéния, и дáти умилéние и свет души́ моéй и согрешéнием очищéние, Я́же еди́на вскóре заступáющи.

Песнь 4

Ирмос: Услы́шах, Гóсподи, смотрéния Твоегó тáинство, разумéх делá Твоя́, и прослáвих Твоé Божествó.

Святы́й Áнгеле Бóжий, храни́телю мой, моли́ Бóга о мне.

Моли́ Человеколю́бца Бóга ты, храни́телю мой, и не остáви менé, но при́сно в ми́ре житиé моé соблюди́ и подáждь ми спасéние необори́мое.

Святы́й Áнгеле Бóжий, храни́телю мой, моли́ Бóга о мне.

Я́ко засту́пника и храни́теля животу́ моему́ приéм тя от Бóга, Áнгеле, молю́ тя, святы́й, от вся́ких мя бед свободи́.

Слава: Мою́ сквéрность твоéю святы́нею очи́сти, храни́телю мой, и от чáсти шу́ия да отлучéн бу́ду моли́твами твои́ми и причáстник слáвы явлю́ся.

И ныне: Недоумéние предлежи́т ми от обышéдших мя зол, Пречи́стая, но избáви мя от них скóро: к Тебé бо еди́ней прибегóх.

Песнь 5

Ирмос: У́тренююще вопиéм Ти: Го́споди, спаси́ ны; Ты бо ecи́ Бог наш, рáзве Тебé инóго не вéмы.

Святы́й Áнгеле Бóжий, храни́телю мой, моли́ Бóга о мне.

Я́ко имéя дерзновéние к Бóгу, храни́телю мой святы́й, Сегó умоли́ от оскорбля́ющих мя зол избáвити.

Святы́й Áнгеле Бóжий, храни́телю мой, моли́ Бóга о мне.

Свéте свéтлый, свéтло просвети́ ду́шу мою́, настáвниче мой и храни́телю, от Бóга дáнный ми Áнгеле.

Слава: Спя́ща мя зле тяготóю грехóвною, я́ко бдя́ща сохрани́, Áнгеле Бóжий, и возстáви мя на славослóвие молéнием твои́м.

И ныне: Мари́е, Госпожé Богорóдице безневéстная, надéждо вéрных, врáжия возношéния низложи́, пою́щия же Тя возвесели́.

Песнь 6

Ирмос: Ри́зу мне подáждь свéтлу, одея́йся свéтом я́ко ри́зою, многоми́лостиве Христé Бóже наш.

Святы́й Áнгеле Бóжий, храни́телю мой, моли́ Бóга о мне.

Вся́ких мя напáстей свободи́, и от печáлей спаси́, молю́ся ти, святы́й Áнгеле, дáнный ми от Бóга, храни́телю мой дóбрый.

Святы́й Áнгеле Бóжий, храни́телю мой, моли́ Бóга о мне.

Освети́ ум мой, блáже, и просвети́ мя, молю́ся ти, святы́й Áнгеле, и мы́слити ми полéзная всегдá настáви мя.

Слава: Устáви сéрдце моé от настоя́щаго мятежá, и бдéти укрепи́ мя во благи́х, храни́телю мой, и настáви мя чу́дно к тишинé живóтней.

И ныне: Слóво Бóжие в Тя всели́ся, Богоро́дице, и человéком Тя показá небéсную лéствицу; Тобóю бо к нам Вы́шний сошéл есть.

Кондак, глас 4-й

Яви́ся мне милосéрд, святы́й Áнгеле Госпóдень, храни́телю мой, и не отлучáйся от менé сквéрнаго, но просвети́ мя свéтом неприкосновéнным и сотвори́ мя достóйна Цáрствия Небéснаго.

Икос

Уничижéнную ду́шу мою́ мнóгими соблáзны, ты, святы́й предстáтелю, неизречéнныя слáвы небéсный сподóби, и певéц с ли́ки безплóтных сил Бóжиих, поми́луй мя и сохрани́, и пóмыслы дóбрыми ду́шу мою́ просвети́, да твоéю слáвою, Áнгеле мой, обогащуся, и низложи́ зломы́слящия мне враги́, и сотвори́ мя достóйна Цáрствия Небéснаго.

Песнь 7

Ирмос: От Иудéи дошéдше óтроцы, в Вавило́не иногдá, вéрою Тро́ическою плáмень пéщный попрáша, пою́ще: отцéв Бóже, благословéн еси́.

Святы́й Áнгеле Бóжий, храни́телю мой, моли́ Бóга о мне.

Ми́лостив бу́ди ми и умоли́ Бóга, Госпóдень Áнгеле, имéю бо тя засту́пника во всем животé моéм, настáвника же и храни́теля, от Бóга даровáннаго ми во вéки.

Святы́й Áнгеле Бóжий, храни́телю мой, моли́ Бóга о мне.

Не остáви в путь шéствующия души́ моея́ окая́нныя уби́ти разбóйником, святы́й Áнгеле, я́же ти от Бóга преданá бысть непорóчне; но настáви ю на путь покая́ния.

Слава: Всю посрáмлену ду́шу мою́ привожду́ от лукáвых ми пóмысл и дел: но предвари́, настáвниче мой, и исцелéние ми подáждь благи́ми по́мыслы, уклоня́ти ми ся всегдá на прáвыя стези́.

И ныне: Прему́дрости испóлни всех и крéпости Божéственный, Ипостáсная Прему́дросте Вы́шняго, Богорóдицы рáди, вéрою вопию́щих: отéц нáших Бóже, благословéн еси́.

Песнь 8

Ирмос: Царя́ Небéснаго, Егóже пою́т во́и áнгельстии, хвали́те и превозноси́те во вся вéки.

Святы́й Áнгеле Бóжий, храни́телю мой, моли́ Бóга о мне.

От Бóга пóсланный, утверди́ живóт мой, рабá твоегó, преблаги́й Áнгеле, и не остáви менé во вéки.

Святы́й Áнгеле Бóжий, храни́телю мой, моли́ Бóга о мне.

Áнгела тя су́ща блáга, души́ моея́ настáвника и храни́теля, преблáженне, воспевáю во вéки.

Слава: Бу́ди ми покрóв и забрáло в день испытáния всех человéк, вóньже огнéм искушáются делá благáя же и злáя.

И ныне: Бу́ди ми Помóщница и тишинá, Богоро́дице Приснодéво, рабу́ Твоéму, и не остáви менé лишéна бы́ти Твоегó влады́чества.

Песнь 9

Ирмос: Вои́стинну Богорóдицу Тя исповéдуем, спасéннии Тобóю, Дéво Чи́стая, с безплóтными ли́ки Тя величáюще.

Иису́су: Гóсподи Иису́се Христé Бóже мой, поми́луй мя.

Поми́луй мя, еди́не Спáсе мой, я́ко Ми́лостив еси́ и Милосéрд, и прáведных ликóв сотвори́ мя причáстника.

Святы́й Áнгеле Бóжий, храни́телю мой, моли́ Бóга о мне.

Мы́слити ми при́сно и твори́ти, Госпóдень Áнгеле, благáя и полéзная дáруй, я́ко си́льна яви́ в нéмощи и непорóчна.

Слава: Я́ко имéя дерзновéние к Царю́ Небéсному, Тогó моли́, с прóчими безплóтными, поми́ловати мя окая́ннаго.

И ныне: Мнóго дерзновéние иму́щи, Дéво, к Воплóщшемуся из Тебé, преложи́ мя от уз и разрешéние ми подáждь и спасéние, моли́твами Твои́ми.

Молитва Ангелу хранителю

Áнгеле Христóв святы́й, к тебé припáдая молю́ся, храни́телю мой святы́й, придáнный мне на соблюдéние души́ и тéлу моему́ грéшному от Святáго Крещéния, аз же своéю лéностию и свои́м злым обы́чаем прогнéвах твою́ пречи́стую свéтлость и отгнáх тя от себé всéми сту́дными дéлы: лжáми, клеветáми, зáвистию, осуждéнием, презóрством, непокóрством, братоненавидéнием, и злопомнéнием, сребролю́бием, прелюбодея́нием, я́ростию, ску́постию, объядéнием без сы́тости и опи́вством, многоглагóланием, злы́ми пóмыслы и лукáвыми, гóрдым обы́чаем и блу́дным возбешéнием, имы́й самохотéние на вся́кое плóтское вожделéние. О, злóе моé произволéние, егóже и скóти безсловéснии не творя́т! Да кáко возмóжеши воззрéти на мя, или́ приступи́ти ко мне, áки псу смердя́щему? Котóрыма очи́ма, Áнгеле Христóв, воззри́ши на мя, оплéтшася зле во гну́сных дéлех? Да кáко ужé возмогу́ отпущéния проси́ти гóрьким и злым мои́м и лукáвым дея́нием, в ня́же впадáю по вся дни и нóщи и на всяк час? Но молю́ся ти припáдая, храни́телю мой святы́й, умилосéрдися на мя грéшнаго и недостóйнаго рабá твоегó (имя), бу́ди ми помóщник и засту́пник на злáго моегó сопроти́вника, святы́ми твои́ми моли́твами, и Цáрствия Бóжия причáстника мя сотвори́ со всéми святы́ми, всегдá, и ны́не и при́сно и во вéки векóв. Ами́нь.

Видео:Заступник рядом! Ежедневная молитва Ангелу хранителю , текст и аудио.Gebet,prayerСкачать

Акафист святому Ангелу Хранителю

Составителен иеромонахом Луховского монастыря Филуменом. Одобрен в 1864 г.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Избра́нный от Го́спода Бо́га на хране́ние души́ моея́ и телесе́, святы́й А́нгеле, похва́льная ти́ воспева́ти дерза́ю, недосто́йный ра́б тво́й; ты́ же, я́ко име́яй дерзнове́ние к Царю́ Небе́сному, от вся́ких мя́ бе́д и скорбе́й, от вра́г ви́димых же и неви́димых защити́, зову́ща:

Ра́дуйся, А́нгеле Госпо́день, неусыпа́емый храни́телю мо́й.

А́нгеле святы́й, по́сланный с Небесе́, во е́же храни́ти мя́ и руководи́ти во все́й жи́зни мое́й, припа́дая молю́ ти ся: са́м наста́ви и вразуми́ мя́, начина́юща от серде́чныя любве́ и усе́рдия возглаша́ти пе́сненныя ти́ хвалы́:

Ра́дуйся, А́нгеле Бо́жий, предста́телю мо́й у Пресвяты́я Тро́ицы; ра́дуйся, Царя́ ца́рствующих безпло́тный во́ине.

Ра́дуйся, Го́спода госпо́дствующих небе́сный слуго́; ра́дуйся, у́мных и невеще́ственных слу́г Его́ сожи́телю.

Ра́дуйся, творя́й при́сно во́лю Влады́ки своего́; ра́дуйся, прие́мый от Бо́га повеле́ние и вла́сть храни́ти ду́шу мою́.

Ра́дуйся, никогда́же отлуча́яйся мене́, гре́шнаго; ра́дуйся, вы́ну спребыва́яй ми́, недосто́йному.

Ра́дуйся, соблюда́яй мя́ на все́х путе́х мои́х; ра́дуйся, сохраня́яй мя́ от вся́каго зла́.

Ра́дуйся, от Бо́га да́нный ми́ руководи́телю на путе́х жития́ моего́; ра́дуйся, благи́й мо́й наста́вниче.

Ра́дуйся, А́нгеле Госпо́день, неусыпа́емый храни́телю мо́й.

Ви́дев человеколюби́вый Госпо́дь, я́ко, по прегреше́нии пра́отца на́шего Ада́ма, вси́ челове́цы удо́бь прекло́нни су́ть ко греху́, по Свое́й неизрече́нной ми́лости посла́л е́сть во всю́ зе́млю святы́х А́нгелов и коему́ждо от челове́к приста́ви храни́теля. Исполня́юще у́бо повеле́ние Влады́ки своего́, святи́и А́нгели всегда́ гото́ви су́ть помога́ти на́м, богоуго́дно пою́щим: Аллилу́иа.

Ра́зуму моему́ просвеще́ние свы́ше исхода́тайствуй, святы́й А́нгеле, да возмогу́ позна́ти, что́ е́сть во́ля Бо́жия, блага́я и уго́дная и соверше́нная, и се́рдце мое́ напра́ви, е́же со усе́рдием твори́ти ю́; тебе́ же, храни́теля моего́, да не преста́ну восхваля́ти сицевы́ми гла́сы:

Ра́дуйся, воспламеня́яй се́рдце мое́ любо́вию к Бо́гу, Созда́телю моему́; ра́дуйся, возбужда́яй мя́ на вся́к де́нь же и ча́с приноси́ти Ему́ моли́твы, проше́ния и благодаре́ния.

Ра́дуйся, я́коже стра́жем ве́рным, стра́хом Госпо́дним душе́вный мо́й до́м огражда́яй; ра́дуйся, вся́ помышле́ния моя́ к распя́тому за грехи́ ми́ра Спаси́телю устремля́яй.

Ра́дуйся, страда́ния Его́ и кре́стную сме́рть в па́мять мою́ вперя́яй; ра́дуйся, воспомина́нием Страсте́й Госпо́дних блюсти́ся от грехо́в мя́ поуча́яй.

Ра́дуйся, благода́тнаго Свы́ше осене́ния Свята́го Ду́ха проси́ти мя́ наставля́яй; ра́дуйся, я́ко на кро́ткия то́чию и смире́нныя се́рдцем ми́лостивно призира́ти Ему́, Уте́шителю, уверя́яй мя́.

Ра́дуйся, мы́слею о вездесу́щии Бо́жии всю́ду окружа́яй мя́; ра́дуйся, всеве́дение Его́ у́мным очесе́м мои́м представля́яй.

Ра́дуйся, милосе́рдием Его́ к ка́ющимся гре́шником се́рдце мое́ утеша́яй; ра́дуйся, правосу́дием Его́ к ожесточе́нным и нераска́янным ду́шу мою́ устраша́яй.

Ра́дуйся, А́нгеле Госпо́день, неусыпа́емый храни́телю мо́й.

Си́лу Боже́ственныя благода́ти испроси́ ми́, храни́телю мо́й А́нгеле, во е́же неукло́нно и непреткнове́нно ходи́ти ми́ спаси́тельным путе́м Христо́вых за́поведей, се́рдцем же и усты́ непреста́нно сла́вити всесвято́е и́мя Бо́га на́шего и пе́ти Ему́: Аллилу́иа.

И́мам тя́, Богоизбра́нный покрови́телю мо́й, я́коже све́тлую зарю́, просвеща́ющую души́ моея́ темноту́ и разгоня́ющую мра́к серде́чнаго неве́дения моего́; сего́ ра́ди, со умиле́нием припа́дая, молю́ ти́ ся́, да и вся́ моя́ чу́вствия, потемне́нная страстьми́, очи́стятся, во е́же не блужда́ти ми́ во тьме́ грехо́вней. Пречу́дную же све́тлость твою́ воспева́ю си́це:

Ра́дуйся, звездо́ Невече́рняго Све́та, от трисия́ннаго Божества́ возсия́вшая и мене́ вы́ну озаря́ющая; ра́дуйся, пресве́тлая луче́, помраче́нная грехми́ серде́чная ми́ очеса́ осиява́ющая.

Ра́дуйся, я́ко тщи́шися напра́вити мя́ на и́стинный пу́ть во тьме́ беззако́ний заблужда́ющаго; ра́дуйся, я́ко предлага́еши ми́ за́поведи Госпо́дни, а́ки зерца́ло для всея́ жи́зни моея́.

Ра́дуйся, я́ко поставля́еши ми́ зако́н Бо́жий, а́ки свети́льник нога́ма мои́ма и све́т стезя́м мои́м; ра́дуйся, я́ко слове́с Ева́нгелиа Христо́ва в сла́дость послу́шати поуча́еши мя́.

Ра́дуйся, я́ко уче́нию Боже́ственнаго Учи́теля моего́ и Го́спода несумне́нно ве́ровати побужда́еши мя́; ра́дуйся, я́ко в повинове́нии уста́вом святы́я Це́ркве укрепля́еши мя́.

Ра́дуйся, я́ко пра́вилом и преда́нием святы́х Апо́стол и оте́ц покаря́тися наставля́еши мя́; ра́дуйся, я́ко во испове́дании святы́я и правосла́вныя ве́ры утвержда́еши мя́.

Ра́дуйся, я́ко за сие́ испове́дание и на сме́рть гото́ва мя́ бы́ти убежда́еши; ра́дуйся, я́ко еретико́м и отсту́пником и́стинныя Це́ркве сообща́тися возбраня́еши ми́.

Ра́дуйся, А́нгеле Госпо́день, неусыпа́емый храни́телю мо́й.

Бу́ря жите́йскаго мо́ря сокруша́ет духо́вный мо́й кора́бль волна́ми мирски́х попече́ний, и ми́р убо́гия души́ моея́ мяте́тся, и где́ обря́щу ти́хое приста́нище спасе́ния? То́кмо на тя́ по Бо́зе возлага́ю наде́жду, храни́телю мо́й А́нгеле, я́ко прему́драго тя́ ко́рмчаго в мы́сленных бу́рях, смуща́ющих мя́, стяжа́х: благода́рственне у́бо пою́ Бо́гу моему́: Аллилу́иа.

Слы́шаще и зря́ще тя́, Боже́ственный А́нгеле, кре́пкаго моего́ блюсти́теля, зло́бнии ду́си поднебе́снии не сме́ют прибли́житися ко твое́й пречи́стей све́тлости и душегуби́тельныя ми́ па́кости де́яти. Сего́ ра́ди смире́нно молю́ тя́, не отступи́ от мене́ за невоздержа́ние мое́, но при́сно от лука́ваго те́х лови́тельства и ко́зней соблюда́й мя́, со умиле́нием глаго́люща:

Ра́дуйся, кре́пким кро́вом кри́л твои́х осеня́яй мя́ и покрыва́яй; ра́дуйся, о́крест мене́ с пла́менным мече́м при́сно ополча́яйся.

Ра́дуйся, проти́ву кня́зя тьмы́ во бра́ни ми́ посо́бствуяй; ра́дуйся, лука́вых его́ служи́телей побежда́ти ми́ помога́яй.

Ра́дуйся, отгоня́яй от мене́ душепа́губныя де́моны, а́ки хи́щныя пти́цы; ра́дуйся, вразумля́яй мя́ бесо́вския ко́зни позна́ти, а́ки лука́выя лиси́цы.

Ра́дуйся, зверообра́зная те́х на у́м и се́рдце мое́ нападе́ния отрева́яй; ра́дуйся, порожде́ния и́х, го́рдость и не́нависть, из се́рдца моего́ исторга́яй.

Ра́дуйся, за́висть и злопомне́ние от мы́слей мои́х прогоня́яй; ра́дуйся, во отраже́ние злы́х по́мыслов кре́стным зна́мением себе́ огражда́ти побужда́яй мя́.

Ра́дуйся, на а́спида и васили́ска небоя́зненно наступа́ти укрепля́яй мя́; ра́дуйся, име́яй непобеди́мое ору́жие проти́ву все́х враго́в мои́х.

Ра́дуйся, А́нгеле Госпо́день, неусыпа́емый храни́телю мо́й.

Боготе́чней и лучеза́рней звезде́, путеводи́вшей дре́вле волхвы́ на поклоне́ние ро́ждшемуся в Вифлее́ме Спаси́телю ми́ра, дерза́ю уподо́бити тя́, благи́й мо́й храни́телю: неотлу́чным бо и светоно́сным твои́м ми́ спребыва́нием указу́еши ми́ пра́вый пу́ть, веду́щий в Го́рний Вифлее́м, в Небе́сное Ца́рствие, да та́мо с ли́ки Арха́нгел и А́нгел сподо́блюся воспева́ти Преве́чному Царю́ сла́вы: Аллилу́иа.

Ви́дя Мя́ но́щию содержи́ма мра́чною и те́мным о́блаком страсте́й покрыва́ема, святы́й храни́телю души́ моея́, не огорчи́ся, не оста́ви мене́, но подража́яй долготерпе́нию Спаси́теля моего́, пожди́ еще́, возбужда́я мя́ к покая́нию, до́ндеже очеса́ моя́ излию́т исто́чники сле́з на омы́тие душе́вныя нечистоты́ моея́. О се́м смире́нно молю́ тя́ и глаго́лю:

Ра́дуйся, я́ко вы́ну прино́сиши Бо́гу о мне́ гре́шнем моли́твы своя́, я́ко кади́ло пред Ни́м благово́нное; ра́дуйся, я́ко при́сно хода́тайствуеши пред Созда́телем мои́м о е́же спасти́ся ми́.

Ра́дуйся, я́ко пра́ведный гне́в Его́, дви́жимый на мя́, свои́м предста́тельством отвраща́еши; ра́дуйся, я́ко про́сиши всемилосе́рдаго Го́спода пода́ти проще́ние злы́х мои́х дея́ний.

Ра́дуйся, я́ко умилостивля́еши Его́ бла́гость, да не погуби́т мя́ со беззако́ньми мои́ми; ра́дуйся, я́ко непреста́нно мо́лишися Искупи́телю моему́, да да́рует ми́ вре́мя ко исправле́нию.

Ра́дуйся, я́ко возбужда́еши мя́ в покая́нии препроводи́ти вся́ дни́ живота́ моего́; ра́дуйся, я́ко внуша́еши ми́ жела́ние, да вы́ну ка́юся пред Го́сподем во все́х мои́х прегреше́ниях.

Ра́дуйся, я́ко вразумля́еши мя́ на вся́кое вре́мя мы́сленно себе́ испы́товати и во гресе́х мои́х испове́доватися; ра́дуйся, я́ко влага́еши в се́рдце мое́ сокруше́ние и ско́рбь, зане́ прогне́вах Преблага́го Бо́га моего́.

Ра́дуйся, я́ко побужда́еши мя́ опла́кивати окая́нное и скве́рное житие́ мое́; ра́дуйся, светоно́сный и неумолка́ющий хода́таю спасе́ния моего́.

Ра́дуйся, А́нгеле Госпо́день, неусыпа́емый храни́телю мо́й.

Пропове́дую велегла́сно при́сное твое́, храни́телю мо́й А́нгеле, о мне́, гре́шнем, попече́ние: в ско́рбех бо и напа́стех, я́же в се́м многомяте́жнем ми́ре смуща́ет ми́р души́ моея́, явля́еши ми́ ся́ ско́рый уте́шитель, вразумля́я мя́, я́ко вся́ сия́ низпосыла́ются от прему́драго Созда́теля, а́ки врачевство́ проти́ву душе́вных неду́гов мои́х, и поуча́я благоде́ющему си́це Небе́сному Врачу́ воспева́ти: Аллилу́иа.

Возсиява́ет в души́ мое́й, омрача́емой ско́рбию и уны́нием, све́т благода́тнаго утеше́ния, и се́рдце мое́ исполня́ется весе́лия и ра́дости, егда́ непреста́нными твои́ми, святы́й А́нгеле, наставле́нии возбужда́ем дерза́ю, я́ко мыта́рь, вопи́ти к ще́дрому Бо́гу, да ми́лостив бу́дет и прости́т ми́ прегреше́ния моя́. Не премолчи́ у́бо, наста́вниче мо́й, вразумля́я и укрепля́я мя́, зову́ща ти́:

Ра́дуйся, помога́яй ми́ благи́й яре́м спаси́тельнаго терпе́ния с любо́вию носи́ти; ра́дуйся, в беда́х и злоключе́ниих упова́нием на Го́спода Бо́га укрепля́яй мя́.

Ра́дуйся, ско́рби и боле́зни му́жественне преодолева́ти мя́ поуча́яй; ра́дуйся, вся́кую печа́ль и уны́ние от се́рдца моего́ отгоня́яй.

Ра́дуйся, проти́ву врага́, в се́ть отча́яния улови́ти мя́ хотя́ща, бра́тися побужда́яй мя́; ра́дуйся, словесе́м Апо́стола, я́ко вси́ хотя́щии благоче́стно жи́ти гони́ми бу́дут, ве́ровати убежда́яй мя́.

Ра́дуйся, о́браз терпе́ния и злострада́ния прия́ти ми́ проро́ки и Апо́столы внуша́яй; ра́дуйся, на ли́к му́ченик и испове́дник, за Христа́ до излия́ния кро́ве своея́ подвиза́вшихся, во утеше́ние ми́ показу́яй.

Ра́дуйся, страда́ния Сама́го Спаси́теля и Го́спода вы́ну у́мным очесе́м мои́м представля́яй; ра́дуйся, наде́ждою бу́дущаго воздая́ния се́рдце мое́ услажда́яй.

Ра́дуйся, всера́достным ожида́нием ве́чных бла́г ду́шу мою́ оживля́яй; ра́дуйся, благи́й и при́сный мо́й уте́шителю.

Ра́дуйся, А́нгеле Госпо́день, неусыпа́емый храни́телю мо́й.

Хотя́й все́м челове́ком спасти́ся, премилосе́рдый Созда́тель мо́й посла́ Тя́, А́нгела Своего́, я́ко ве́рна ми́ стра́жа и пе́стуна до́бра во все́м житии́ мое́м, да всю́ду вспомоществу́еши ми́ святы́ми твои́ми вдохнове́нии, защища́еши проти́ву ко́зней диа́вола и предуготовля́еши мя́ де́лы благи́ми вни́ти с му́дрыми де́вами в Небе́сный Черто́г, с Богокра́сною пе́снию: Аллилу́иа.

Но́вую показу́ет бла́гость Госпо́дь и Влады́ка мо́й на мне́, непотре́бнем и па́че все́х гре́шнейшем рабе́ Свое́м: презира́я бо лю́тая моя́ и тя́жкая, не погуби́л мя́ есть со беззако́ньми мои́ми да́же до настоя́щаго дне́ и часа́, но долготерпя́ на мне́, ми́лостивне ожида́ет моего́ обраще́ния и серде́чнаго покая́ния. Ве́рую, благи́й храни́телю мо́й, я́ко твои́м при́сным пред Бо́гом за мя́ хода́тайством досе́ле храни́м е́смь: те́мже, любо́вию к тебе́ подвиза́емый, взыва́ю:

Ра́дуйся, я́ко обурева́ющася мя́ в мо́ри жития́ сего́ от коне́чнаго потопле́ния соблюда́еши; ра́дуйся, я́ко из ро́ва беззако́ний мои́х руко́ю твоея́ по́мощи мя́ исхища́еши.

Ра́дуйся, я́ко грехо́вный со́н душевре́дныя моея́ ле́ности отряса́еши; ра́дуйся, я́ко у́м мо́й, омраче́нный небреже́нием, све́тлым твои́м прису́тствием озаря́еши.

Ра́дуйся, я́ко хла́дное и ма́ло не уга́сшее се́рдце мое́ моли́твами воспламеня́ти ми́ помога́еши; ра́дуйся, я́ко на славосло́вие Бо́жие при́сно мя́ возставля́еши.

Ра́дуйся, я́ко настроя́еши гла́с мо́й к песнопе́ниям, и́миже досто́йно и пра́ведно е́сть хвали́ти Творца́ вся́ческих; ра́дуйся, я́ко поуча́еши мя́ прославля́ти Го́спода моего́ не усты́ то́чию, но и се́рдцем.

Ра́дуйся, я́ко ко исполне́нию пресвяты́я во́ли Его́ возбужда́еши мя́; ра́дуйся, я́ко самоотверже́нию и отрече́нию моея́ злы́я во́ли приобучи́ти мя́ тщи́шися.

Ра́дуйся, я́ко голуби́ну простоту́ и а́гнчу кро́тость стяжа́ти ми́ преи́скренне жела́еши; ра́дуйся, я́ко о е́же младе́нческому незло́бию и ста́рческому доброразсужде́нию дарова́тися ми́ хода́тайствуеши.

Ра́дуйся, А́нгеле Госпо́день, неусыпа́емый храни́телю мо́й.

Стра́нен и пришле́ц е́смь на земли́ се́й: житие́ мое́ су́етно и маловре́менно е́сть; а́з же, окая́нный, сме́рти безве́стное во у́м никогда́же прие́млю, ни помышля́ю о Стра́шнем Суди́щи, в не́м же и́мам Пра́ведному Судии́ предста́ти и да́ти отве́т о вся́ком де́ле же и сло́ве. Те́мже молю́ тя́, души́ моея́ храни́теля, возбуди́ мя́ ско́ро от сна́ грехо́внаго, да не пости́гнет мя́ ча́с сме́рти неиспра́вленна и да сподо́блюся испроси́ти от Всеми́лостиваго Бо́га беззако́нием мои́м проще́ние и во гла́се ра́дования воспева́ти Ему́: Аллилу́иа.

Все́х Госпо́дь и Созда́тель мо́й, егда́ назна́менует ми́ преста́витися от жития́ сего́, ты́, благи́й храни́телю мо́й, прови́дяй гро́зныя му́ки, духово́м зло́бы и нераска́янным гре́шником угото́ванныя и мене́ ожида́ющия, покры́й мя́ твоего́ милосе́рдия крила́ми, я́коже оре́л птенцы́ своя́, и внегда́ исчеза́ти от мене́ ду́ху моему́, да у́зрю тя́ бли́з мене́ предстоя́ща и лю́тыя враги́ отгоня́юща. О се́м со умиле́нием молю́ ти ся, веща́я си́це:

Ра́дуйся, у́мным очесе́м мои́м го́рький и стра́шный ча́с сме́ртный представля́яй; ра́дуйся, я́ко неизбе́жен, вку́пе же и безве́стен ча́с то́й при́сно ми́ напомина́яй.

Ра́дуйся, на ки́йждо де́нь, а́ки уже́ на после́дний жития́ моего́ взира́ти мя́ поуча́яй; ра́дуйся, на вся́кое вре́мя ко исхо́ду во и́н ми́р мя́ приуготовля́яй.

Ра́дуйся, душе́вное умиле́ние и серде́чное сокруше́ние во мне́ рожда́яй; ра́дуйся, вы́ну жела́яй ми́, да поне́ при кончи́не дне́й мои́х пока́юся.

Ра́дуйся, люби́ти ми́р и я́же в ми́ре ми́ воспреща́яй; ра́дуйся, пристра́стие к тле́нному бога́тству из се́рдца моего́ искореня́ти помога́яй.

Ра́дуйся, вся́ бла́га земна́я бы́ти привре́менна и скоропреходя́ща ми́ показу́яй; ра́дуйся, я́ко вся́ кра́сная ми́ра сего́ кри́ну се́льному подо́бна су́ть, вразумля́яй мя́.

Ра́дуйся, сла́вы челове́чи, а́ки те́ни преходя́щия, иска́ти возбраня́яй ми́; ра́дуйся, от еди́наго Бо́га сла́вы нетле́нныя в бу́дущем ве́це взыска́ти побужда́яй мя́.

Ра́дуйся, А́нгеле Госпо́день, неусыпа́емый храни́телю мо́й.

Вся́к гре́х соде́ях в житии́ се́м и ве́сь живо́т мо́й во мно́зе прите́к суете́, к концу́ прибли́жихся: врази́ же мои́ устремля́ются на мя́, а́лчуще поя́ти мя́ и низри́нути во глубину́ а́дову. Те́мже молю́ ти ся, благи́й мо́й Храни́телю, бу́ди ми́ защи́титель, егда́ и́мам преходи́ти лю́тая мыта́рства, и безбе́дно доведи́ мя до вра́т Небе́снаго Ца́рствия, иде́же ли́цы а́нгельстии ра́достне срета́ют восклица́ющих: Аллилу́иа.

Вети́йствующий язы́к не мо́жет изрещи́, я́же сотвори́л ми́ еси́, святы́й храни́телю мо́й, во все́м житии́ мое́м: прия́в бо ду́шу мою́ от купе́ли Свята́го Креще́ния, храни́л мя́ еси́ во младе́нчестве, учи́л и вразумля́л еси́ во о́трочестве, соблюда́л мя́ еси́ от поползнове́ния ко грехо́м в во́зрасте ю́ношестем, наставля́л еси́, прише́дша мя́ в му́жество, охраня́л еси́ на все́х путе́х мои́х да́же до ста́рости, облича́я и утеша́я, всю́ду помога́я и направля́я на пу́ть спасе́ния. Сего́ ра́ди благода́рственно вопию́ ти́:

Ра́дуйся, я́ко никогда́же лиша́еши мя́ твоея́ по́мощи и заступле́ния; ра́дуйся, я́ко от сна́ востаю́ща мя́ подвиза́еши ко благодаре́нию Го́спода, укрепля́ющаго си́лы моя́.

Ра́дуйся, я́ко нача́ток коего́ждо дне́ моли́твою освяща́ти мя́ поуча́еши; ра́дуйся, я́ко воспреща́еши ми́ без моли́твы к всеблаго́му Промысли́телю, дерзнове́нно собо́ю что́ начина́ти.

Ра́дуйся, я́ко самонаде́яние из се́рдца моего́ истреби́ти тщи́шися; ра́дуйся, я́ко сладча́йшее и́мя Го́спода Иису́са Христа́ усты́ непреста́нно произноси́ти и во уме́ держа́ти мя́ побужда́еши.

Ра́дуйся, я́ко во вся́кое вре́мя ну́жная то́чию и поле́зная веща́ти язы́ком ми́ внуша́еши; ра́дуйся, я́ко от праздносло́вия, многоглаго́лания, па́че же и кощу́нства мя́ удержава́еши.

Ра́дуйся, я́ко яду́щу и пию́щу ми́ или́ и́но что́ творя́щу при́сно спребыва́еши; ра́дуйся, я́ко воздержа́нию в пи́щи и питии́ приобучи́ти мя́ пече́шися.

Ра́дуйся, я́ко спя́ща мя́ храни́ти и врага́, хотя́ща искуси́ти мя́ со́нными мечта́нии, отгоня́еши; ра́дуйся, я́ко воспяща́еши мя́ от любостра́стнаго стремле́ния и во о́чию мое́ю целому́дренный сты́д влага́еши.

Ра́дуйся, А́нгеле Госпо́день, неусыпа́емый храни́телю мо́й.

Спасти́ все́х прише́дый Иису́се мо́й преблаги́й, со умиле́нием молю́ Ти ся, Твои́м милосе́рдием прости́ мои́х злы́х премно́жество и безме́рие, преклоня́емый на сие́ Боже́ственными мольба́ми Твоего́ невеще́ственнаго служи́теля, его́же ми́ приста́вил еси́ из младе́нства, я́ко Человеколю́бец, храни́теля: да досто́ин явлю́ся вни́ти в черто́г сла́вы Твоея́ и со ду́хи пра́ведных воспе́ти: Аллилу́иа.

Стена́ тве́рда при́сно явля́еши ми́ ся, святы́й А́нгеле, проти́ву ухищре́ний зло́бных враго́в мои́х, и́щущих ве́чныя поги́бели моея́ и разслабля́ющих ду́шу мою́ ле́ностию и самозабве́нием. Молю́ у́бо тя́, храни́телю мо́й, да твои́м хода́тайством сподо́блюся, при исхо́де души́ моея́ из телесе́ прича́стник бы́ти Пречи́стаго Те́ла и святе́йшия Кро́ве моего́ Спаси́теля, я́ко да укрепи́вся се́ю нетле́нною пи́щею и животворя́щим питие́м, безтре́петно прейду́ во и́н ми́р, воспева́я тя́, моего́ благоде́теля:

Ра́дуйся, я́ко дана́ ти́ е́сть вла́сть и си́ла отража́ти де́монская на мя́ нападе́ния; ра́дуйся, я́ко прия́л еси́ от Бо́га кре́пость на побежде́ние неви́димых враго́в мои́х.

Ра́дуйся, я́ко от вся́каго злоде́йства и ко́зней диа́вольских моги́й изба́вити мя́; ра́дуйся, я́ко го́рьких мыта́рств нача́льника, лю́таго мироде́ржца нападе́ния от мене́ отрева́еши.

Ра́дуйся, я́ко, огражда́емый твои́м прису́тствием, и́мам наде́жду в ча́с сме́рти не устраши́тися мра́чных ли́ц духо́в зло́бы; ра́дуйся, я́ко храни́мый тобо́ю, упова́ю безбе́дно прейти́ возду́шная мыта́рства.

Ра́дуйся, я́ко укрепля́емый твое́ю по́мощию, ча́ю не уде́ржан бы́ти мне́ вра́т рая́, ми́ вожделе́ннаго; ра́дуйся, я́ко твое́ за мя́ предста́тельство си́льно е́сть пред Бо́гом, е́же не вве́ржену ми́ бы́ти во тьму́ кроме́шную.

Ра́дуйся, я́ко при́сно внуша́еши ми́ умилостивля́ти Го́спода слеза́ми покая́ния, да изба́влюся гее́нны а́дския; ра́дуйся, я́ко побужда́еши мя́ де́нь и но́щь моли́тися, да не по́слан бу́ду со де́моны му́читися.

Ра́дуйся, неотсту́пный мо́й руководи́телю и пе́стуне; ра́дуйся, кре́пкий мо́й засту́пниче и ско́рый помо́щниче.

Ра́дуйся, А́нгеле Госпо́день, неусыпа́емый храни́телю мо́й.

Пе́ние сие́, а́ще и от усе́рдия моего́ ти́ приноси́мое, святы́й храни́телю мо́й, ве́м, я́ко не дово́льно е́сть ко изъявле́нию моего́ серде́чнаго благодаре́ния за вся́ блага́я, я́же ми́ сотвори́л еси́ и не престае́ши твори́ти да́же до сего́ дне́ и часа́; но и о се́м молю́ ти ся, о́бщаго ми́ с тобо́ю Созда́теля уми́лостиви, да на Стра́шнем Суде́ Свое́м шу́ия ча́сти изба́вит мя́ и сподо́бит со все́ми святы́ми воспева́ти Ему́: Аллилу́иа.

Свети́льник мо́й угасе́, еле́а же благи́х де́л, во е́же возжещи́ и́, не́сть ми́; и где́ обря́щуся а́з, окая́нный, сно́м грехо́вным отягче́нный, егда́ пости́гнет мя́ внеза́пу полу́нощь, ча́с кончи́ны моея́? Но да не услы́шу и а́з, я́коже юро́дивыя де́вы, гро́знаго гла́са Жениха́: не ве́м тя́! Помози́ ми́, неусыпа́емый храни́телю мо́й, напо́лнити сосу́ды души́ моея́ еле́ем благи́х де́л, па́че же милосе́рдия и смире́ния. Ны́не же приими́ от мене́ сие́ пе́ние:

Ра́дуйся, Еди́наго Го́спода име́ти в ра́зуме при́сно ми́ внуша́яй; ра́дуйся, за́поведь о любви́ к Нему́, преблаго́му, в се́рдце мое́м обновля́яй.

Ра́дуйся, люби́ти Его́, Созда́теля, все́м умо́м и все́м помышле́нием мя́ побужда́яй; ра́дуйся, и к бли́жним и́скреннюю любо́вь мою́ Богоуго́дну бы́ти непреста́нно ми́ напомина́яй.

Ра́дуйся, люби́ти и́х не сло́вом или́ язы́ком, но де́лом и и́стиною мя́ поуча́яй; ра́дуйся, во все́х ну́ждах и́х помога́ти жела́ние ми́ влага́яй.

Ра́дуйся, утеша́ти скорбя́щих, заступа́ти оби́димых мя́ наставля́яй; ра́дуйся, от име́ний свои́х уделя́ти бе́дным и неиму́щим се́рдце мое́ преклоня́яй.

Ра́дуйся, и ду́шу мою́, по за́поведи Спаси́теля, положи́ти за дру́ги своя́ гото́ву ми́ бы́ти возбужда́яй; ра́дуйся, закрыва́яй очеса́ моя́, е́же не зре́ти ми́ прегреше́ния бра́та моего́.

Ра́дуйся, не попуща́яй ми́ осужда́ти поползну́вшагося на гре́х бли́жняго моего́; ра́дуйся, воспреща́яй ми́ я́ти ве́ру оглаго́льником клевре́та моего́.

Ра́дуйся, А́нгеле Госпо́день, неусыпа́емый храни́телю мо́й.

Благода́ть дана́ ти́ е́сть от Всемогу́щаго Го́спода, святы́й покрови́телю мо́й, е́же храни́ти мя́ на все́х путе́х мои́х, да не о ка́мень ко́его собла́зна преткне́тся нога́ моя́, до́ндеже мя́ предста́виши Христу́ Бо́гу спасе́на, Ему́же немо́лчно вся́ Си́лы Небе́сныя взыва́ют: Аллилу́иа.

Пою́ Твое́ досточу́дное милосе́рдие и мно́гое снисхожде́ние, быстродви́жный у́ме, безпло́тный слуго́ Госпо́день: я́ко не гнуша́ешися грехо́вныя моея́ смра́дности и не престае́ши приноси́ти о мне́, непотре́бнем, святы́я моли́твы своя́ ко святе́йшему престо́лу Триипоста́снаго Бо́га, е́же не поги́бнути ми́ во ве́ки, но Ца́рствие Небе́сное насле́довати. Благоволи́ у́бо прия́ти от душе́вных сокро́вищ мои́х приноси́мое ти́ песнопе́ние:

Ра́дуйся, я́ко воспомина́нием гряду́щаго гро́знаго Суда́ Бо́жия от грехо́в мя́ отрева́еши; ра́дуйся, я́ко ду́шу мою́, а́ки неве́сту, ко сре́тению прекра́снаго Жениха́ Христа́ предуготовля́ти возбужда́еши мя́.

Ра́дуйся, я́ко при́сно жела́еши досто́йна мя́ сотвори́ти бра́чнаго черто́га Его́; ра́дуйся, я́ко вы́ну учи́ши мя́ возжига́ти свети́льник души́ моея́, да с му́дрыми де́вами, душа́ми пра́ведных, вни́ду в о́нь.

Ра́дуйся, я́ко грехо́вныя оде́жды моея́ совлачи́тися побужда́еши мя́; ра́дуйся, я́ко в ри́зу непоро́чности и чистоты́ облещи́ся ми́ спосо́бствуеши.

Ра́дуйся, я́ко хода́тайствуеши, да на Стра́шнем Суде́ Христо́вом одесну́ю Его́ ста́ти сподо́блюся; ра́дуйся, я́ко умоля́еши благоутро́бие Бо́жие, да ли́ку избра́нных Свои́х сопричте́т мя́.

Ра́дуйся, я́ко подвиза́еши на моли́тву ко Го́споду и сожи́телей твои́х небе́сных, да всели́т мя́ с ни́ми во Ца́рствии Свое́м; ра́дуйся, до́брый и бо́дрый блюсти́телю мо́й.

Ра́дуйся, те́плый о мне́, гре́шнем, моли́твенниче и благи́й предста́телю; ра́дуйся, по Го́споде Бо́зе и Пресвяте́й Богоро́дице кре́пкое мое́ упова́ние.

Ра́дуйся, А́нгеле Госпо́день, неусыпа́емый храни́телю мо́й.

О пресла́вный и у́мный све́те, А́нгеле Бо́жий! Приими́ благода́рственное сие́ и моле́бное пе́ние, и, егда́ и́мам от земли́ воста́ти на Су́д, покажи́ тогда́ милосе́рдие твое́ на мне́, гре́шнем: предста́ни бли́з мене́ ти́х и ра́достен, наде́ждою спасе́ния отъе́мля стра́х мо́й, да в селе́ниих ра́йских сподо́блюся вку́пе с тобо́ю во ве́ки веко́в воспева́ти преве́чному Царю́ сла́вы: Аллилу́иа.

Этот конда́к чита́ется три́жды, зате́м и́кос 1-й и конда́к 1-й.

Ра́дуйся, никогда́же отлуча́яйся мене́, гре́шнаго; ра́дуйся, вы́ну спребыва́яй ми́, недосто́йному.

Ра́дуйся, соблюда́яй мя́ на все́х путе́х мои́х; ра́дуйся, сохраня́яй мя́ от вся́каго зла́.

Ра́дуйся, от Бо́га да́нный ми́ руководи́телю на путе́х жития́ моего́; ра́дуйся, благи́й мо́й наста́вниче.

Ра́дуйся, А́нгеле Госпо́день, неусыпа́емый храни́телю мо́й.

О, святы́й А́нгеле, храни́телю и покрови́телю мо́й благи́й! С сокруше́нным се́рдцем и боле́зненною душе́ю предстою́ ти́, моля́ся: услы́ши мя́, гре́шнаго раба́ своего́ (и́мя), с во́плем кре́пким и пла́чем го́рьким вопию́щаго. Не помяни́ мои́х беззако́ний и непра́вд, и́миже а́з окая́нный прогневля́ю тя́ по вся́ дни́ и часы́, и ме́рзостна себе́ творю́ пред Созда́телем на́шим Го́сподем. Яви́ся мне́ милосе́рд и не отлуча́йся мене́ скве́рнаго да́же до кончи́ны моея́. Возбуди́ мя́ от сна́ грехо́внаго и посо́бствуй твои́ми моли́твами про́чее вре́мя живота́ моего́ без поро́ка прейти́ и сотвори́ти плоды́ досто́йны покая́ния, па́че же от сме́ртных паде́ний грехо́вных соблюди́ мя, да не поги́бну во отча́янии и да не пора́дуется вра́г о поги́бели мое́й. Ве́м вои́стинну и усты́ испове́дую, я́ко никто́же тако́в дру́г и предста́тель, защи́титель и побо́рник, я́коже ты́, святы́й А́нгеле. Предстоя́ бо Престо́лу Госпо́дню, мо́лишися о мне́ непотре́бнем и па́че все́х гре́шнейшем, да не изы́мет Преблаги́й души́ моея́ в де́нь неча́яния моего́ и в де́нь творе́ния зло́бы. Не преста́й у́бо умилостивля́я Премилосе́рдаго Го́спода и Бо́га моего́, да отпу́стит согреше́ния моя́, я́же сотвори́х во все́м житии́ мое́м, де́лом, сло́вом и все́ми мои́ми чу́вствы, и и́миже ве́сть судьба́ми да спасе́т мя́, да нака́жет мя́ зде́ по Свое́й неизрече́нной ми́лости, но да не обличи́т и не истя́жет мя́ она́мо по Своему́ нелицеприя́тному правосу́дию, да сподо́бит мя́ покая́ние принести́, с покая́нием же Боже́ственное Причаще́ние досто́йне прия́ти, о се́м па́че молю́, и такова́го да́ра всеусе́рдно жела́ю. В стра́шный же ча́с сме́рти неотсту́пен бу́ди ми́, благи́й Храни́телю мо́й, прогоня́я мра́чныя де́моны, иму́щия устраши́ти притре́петную ду́шу мою́. Защити́ мя́ от те́х ловле́ния, егда́ и́мам преходи́ти возду́шная мыта́рства, да храни́м тобо́ю, безбе́дно дости́гну рая́ ми́ вожделе́ннаго, иде́же ли́цы святы́х и го́рних си́л непреста́нно восхваля́ют всечестно́е и великоле́пое и́мя в Тро́ице сла́вимаго Бо́га, Отца́ и Сы́на и Свята́го Ду́ха, Ему́же подоба́ет че́сть и поклоне́ние во ве́ки веко́в. Ами́нь.

А҆ка́ѳїстъ ст҃о́мꙋ а҆́гг҃лꙋ храни́телю.

И҆збра́нный ѿ гдⷭ҇а бг҃а на хране́нїе дꙋшѝ моеѧ̀ и҆ тѣлесѐ, ст҃ы́й а҆́гг҃ле, похва̑льнаѧ тѝ воспѣва́ти дерза́ю, недосто́йный ра́бъ тво́й: ты́ же, ꙗ҆́кѡ и҆мѣ́ѧй дерзнове́нїе къ цр҃ю̀ нбⷭ҇номꙋ, ѿ всѧ́кихъ мѧ̀ бѣ́дъ и҆ скорбе́й, ѿ вра̑гъ ви́димыхъ же и҆ неви́димыхъ защитѝ, зовꙋ́ща:

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

А҆́гг҃ле ст҃ы́й, по́сланный съ нб҃сѐ, во є҆́же храни́ти мѧ̀ и҆ рꙋководи́ти во все́й жи́зни мое́й, припа́даѧ молю́ ти сѧ са́мъ наста́ви и҆ вразꙋмѝ мѧ̀, начина́юща ѿ серде́чныѧ любвѐ и҆ ᲂу҆се́рдїѧ возглаша́ти пѣ́снєнныѧ тѝ хвалы̑:

Ра́дꙋйсѧ а҆́гг҃ле бж҃їй, предста́телю мо́й ᲂу҆ прест҃ы́ѧ трⷪ҇цы: ра́дꙋйсѧ, цр҃ѧ̀ ца́рствꙋющихъ безпло́тный во́ине.

Ра́дꙋйсѧ гдⷭ҇а госпо́дствꙋющихъ нбⷭ҇ный слꙋго̀: ра́дꙋйсѧ, ᲂу҆́мныхъ и҆ невеще́ственныхъ слꙋ́гъ є҆гѡ̀ сожи́телю.

Ра́дꙋйсѧ творѧ́й при́снѡ во́лю влⷣки своегѡ̀: ра́дꙋйсѧ, прїе́мый ѿ бг҃а повелѣ́нїе и҆ вла́сть храни́ти дꙋ́шꙋ мою̀.

Ра́дꙋйсѧ, никогда́же ѿлꙋча́ѧйсѧ менє̀, грѣ́шнагѡ: ра́дꙋйсѧ, вы́нꙋ спребыва́ѧй мѝ, недосто́йномꙋ.

Ра́дꙋйсѧ, соблюда́ѧй мѧ̀ на всѣ́хъ пꙋте́хъ мои́хъ: ра́дꙋйсѧ, сохранѧ́ѧй мѧ̀ ѿ всѧ́кагѡ ѕла̀.

Ра́дꙋйсѧ, ѿ бг҃а да́нный мѝ рꙋководи́телю на пꙋте́хъ житїѧ̀ моегѡ̀: ра́дꙋйсѧ, бл҃гі́й мо́й наста́вниче.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Ви́дѣвъ человѣколюби́вый гдⷭ҇ь, ꙗ҆́кѡ, по прегрѣше́нїи пра́ѻтца на́шегѡ а҆да́ма, всѝ человѣ́цы ᲂу҆до́бь прекло́нни сꙋ́ть ко грѣхꙋ̀, по свое́й неизрече́нной млⷭ҇ти посла́лъ є҆́сть во всю̀ зе́млю ст҃ы́хъ а҆́гг҃лѡвъ и҆ коемꙋ́ждо ѿ человѣ̑къ приста́ви храни́телѧ. и҆сполнѧ́юще ᲂу҆́бѡ повелѣ́нїе влⷣки своегѡ̀, ст҃і́и а҆́гг҃ли всегда̀ гото́ви сꙋ́ть помога́ти на́мъ, бг҃оꙋго́днѡ пою́щымъ: А҆ллилꙋ́їа.

Ра́зꙋмꙋ моемꙋ̀ просвѣще́нїе свы́ше и҆схода́тайствꙋй, ст҃ы́й а҆́гг҃ле, да возмогꙋ̀ позна́ти, что̀ є҆́сть во́лѧ бж҃їѧ бл҃га́ѧ и҆ ᲂу҆го́днаѧ и҆ соверше́ннаѧ, и҆ се́рдце моѐ напра́ви, є҆́же со ᲂу҆се́рдїемъ твори́ти ю҆̀, тебе́ же, храни́телѧ моего̀ да не преста́нꙋ восхвалѧ́ти сицевы́ми гла̑сы:

Ра́дꙋйсѧ, воспламенѧ́ѧй се́рдце моѐ любо́вїю къ бг҃ꙋ, созда́телю моемꙋ̀: ра́дꙋйсѧ, возбꙋжда́ѧй мѧ̀ на всѧ́къ де́нь же и҆ ча́съ приноси́ти є҆мꙋ̀ мл҃твы, прошє́нїѧ и҆ бл҃годарє́нїѧ.

Ра́дꙋйсѧ, ꙗ҆́кѡже стра́жемъ вѣ́рнымъ, стра́хомъ гдⷭ҇нимъ дꙋше́вный мо́й до́мъ ѡ҆гражда́ѧй: ра́дꙋйсѧ, всѧ̑ помышлє́нїѧ моѧ̑ къ распѧ́томꙋ за грѣхѝ мі́ра сп҃си́телю ᲂу҆стремлѧ́ѧй.

Ра́дꙋйсѧ, страда̑нїѧ є҆гѡ̀ и҆ кре́стнꙋю сме́рть въ па́мѧть мою̀ вперѧ́ѧй: ра́дꙋйсѧ, воспомина́нїемъ страсте́й гдⷭ҇нихъ блюсти́сѧ ѿ грѣхѡ́въ мѧ̀ поꙋча́ѧй.

Ра́дꙋйсѧ, бл҃года́тнагѡ свы́ше ѡ҆сѣне́нїѧ ст҃а́гѡ дх҃а проси́ти мѧ̀ наставлѧ́ѧй: ра́дꙋйсѧ, ꙗ҆́кѡ на крѡ́ткїѧ то́чїю и҆ смирє́нныѧ се́рдцемъ ми́лостивнѡ призира́ти є҆мꙋ̀, ᲂу҆тѣ́шителю, ᲂу҆вѣрѧ́ѧй мѧ̀.

Ра́дꙋйсѧ мы́слею ѡ҆ вездесꙋ́щїи бж҃їи всю́дꙋ ѡ҆крꙋжа́ѧй мѧ̀: ра́дꙋйсѧ, всевѣ́денїе є҆гѡ̀ ᲂу҆́мнымъ ѻ҆чесє́мъ мои̑мъ представлѧ́ѧй.

Ра́дꙋйсѧ, млⷭ҇рдїемъ є҆гѡ̀ къ ка́ющымсѧ грѣ́шникѡмъ се́рдце моѐ ᲂу҆тѣша́ѧй: ра́дꙋйсѧ, правосꙋ́дїемъ є҆гѡ̀ къ ѡ҆жестѡчє́ннымъ и҆ нераска̑ѧннымъ дꙋ́шꙋ мою̀ ᲂу҆страша́ѧй.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Си́лꙋ бжⷭ҇твенныѧ блгⷣти и҆спросѝ мѝ, храни́телю мо́й а҆́гг҃ле, во є҆́же неꙋкло́ннѡ и҆ непреткнове́ннѡ ходи́ти мѝ сп҃си́тельнымъ пꙋте́мъ хрⷭ҇то́выхъ за́повѣдей, се́рдцемъ же и҆ ᲂу҆сты̑ непреста́ннѡ сла́вити всест҃о́е и҆́мѧ бг҃а на́шегѡ и҆ пѣ́ти є҆мꙋ̀: А҆ллилꙋ́їа.

И҆́мамъ тѧ̀, бг҃оизбра́нный покрови́телю мо́й, ꙗ҆́коже свѣ́тлꙋю зарю̀, просвѣща́ющꙋю дꙋшѝ моеѧ̀ темнотꙋ̀ и҆ разгонѧ́ющꙋю мра́къ серде́чнагѡ невѣ́дѣнїѧ моегѡ̀: сегѡ̀ ра́ди, со ᲂу҆миле́нїемъ припа́даѧ, молю́ ти сѧ, да и҆ всѧ̑ моѧ̑ чꙋ́вствїѧ, потемнє́ннаѧ страстьмѝ, ѡ҆чи́стѧтсѧ, во є҆́же не блꙋжда́ти мѝ во тмѣ̀ грѣхо́внѣй. пречꙋ́днꙋю же свѣ́тлость твою̀ воспѣва́ю си́це:

Ра́дꙋйсѧ, ѕвѣздо̀ невече́рнѧгѡ свѣ́та, ѿ трисїѧ́ннагѡ бжⷭ҇тва̀ возсїѧ́вшаѧ и҆ менѐ вы́нꙋ ѡ҆зарѧ́ющаѧ: ра́дꙋйсѧ, пресвѣ́тлаѧ лꙋчѐ, помрачє́ннаѧ грѣхмѝ сердє́чнаѧ мѝ ѻ҆чеса̀ ѡ҆сїѧва́ющаѧ.

Ра́дꙋйсѧ, ꙗ҆́кѡ тщи́шисѧ напра́вити мѧ̀ на и҆́стинный пꙋ́ть во тмѣ̀ беззако́нїй заблꙋжда́ющаго: ра́дꙋйсѧ, ꙗ҆́кѡ предлага́еши мѝ за́пѡвѣди гдⷭ҇ни, а҆́ки зерца́ло длѧ всеѧ̀ жи́зни моеѧ̀.

Ра́дꙋйсѧ, ꙗ҆́кѡ поставлѧ́еши мѝ зако́нъ бж҃їй, а҆́ки свѣти́льникъ нога́ма мои́ма и҆ свѣ́тъ стезѧ́мъ мои̑мъ: ра́дꙋйсѧ, ꙗ҆́кѡ слове́съ є҆ѵⷢ҇лїа хрⷭ҇то́ва въ сла́дость послꙋ́шати поꙋча́еши мѧ̀.

Ра́дꙋйсѧ, ꙗ҆́кѡ ᲂу҆че́нїю бжⷭ҇твеннагѡ ᲂу҆чи́телѧ моегѡ̀ и҆ гдⷭ҇а несꙋмнѣ́ннѡ вѣ́ровати побꙋжда́еши мѧ̀: ра́дꙋйсѧ, ꙗ҆́кѡ въ повинове́нїи ᲂу҆ста́вѡмъ ст҃ы́ѧ цр҃кве ᲂу҆крѣплѧ́еши мѧ̀.

Ра́дꙋйсѧ, ꙗ҆́кѡ пра́вилѡмъ и҆ преда́нїємъ ст҃ы́хъ а҆пⷭ҇лъ и҆ ѻ҆тє́цъ покарѧ́тисѧ наставлѧ́еши мѧ̀: ра́дꙋйсѧ, ꙗ҆́кѡ во и҆сповѣ́данїи ст҃ы́ѧ и҆ правосла́вныѧ вѣ́ры ᲂу҆твержда́еши мѧ̀.

Ра́дꙋйсѧ, ꙗ҆́кѡ за сїѐ и҆сповѣ́данїе и҆ на сме́рть гото́ва мѧ̀ бы́ти ᲂу҆бѣжда́еши: ра́дꙋйсѧ, ꙗ҆́кѡ є҆ретїкѡ́мъ и҆ ѿстꙋ́пникѡмъ и҆́стинныѧ цр҃кве соѡбща́тисѧ возбранѧ́еши мѝ.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Бꙋ́рѧ жите́йскагѡ мо́рѧ сокрꙋша́етъ дꙋхо́вный мо́й кора́бль волна́ми мїрски́хъ попече́нїй, и҆ ми́ръ ᲂу҆бо́гїѧ дꙋшѝ моеѧ̀ мѧте́тсѧ, и҆ гдѣ̀ ѡ҆брѧ́щꙋ ти́хое приста́нище сп҃се́нїѧ; то́кмѡ на тѧ̀ по бз҃ѣ возлага́ю наде́ждꙋ, храни́телю мо́й а҆́гг҃ле, ꙗ҆́кѡ премꙋ́драго тѧ̀ ко́рмчаго въ мы́сленныхъ бꙋ́рѧхъ, смꙋща́ющихъ мѧ̀, стѧжа́хъ, бл҃года́рственнѣ ᲂу҆́бѡ пою̀ бг҃ꙋ моемꙋ̀: А҆ллилꙋ́їа.

Слы́шаще и҆ зрѧ́ще тѧ̀, бжⷭ҇твенный а҆́гг҃ле, крѣ́пкаго моего̀ блюсти́телѧ, ѕло́бнїи дꙋ́си поднебе́снїи не смѣ́ютъ прибли́житисѧ ко твое́й пречи́стѣй свѣ́тлости и҆ дꙋшегꙋби́тєльныѧ мѝ па́кѡсти дѣ́ѧти. сегѡ̀ ра́ди смире́ннѡ молю̀ тѧ̀, не ѿстꙋпѝ ѿ менє̀ за невоздержа́нїе моѐ, но при́снѡ ѿ лꙋка́вагѡ тѣ́хъ лови́тельства и҆ ко́зней соблюда́й мѧ̀, со ᲂу҆миле́нїемъ глаго́люща:

Ра́дꙋйсѧ, крѣ́пкимъ кро́вомъ кри́лъ твои́хъ ѡ҆сѣнѧ́ѧй мѧ̀ и҆ покрыва́ѧй: ра́дꙋйсѧ, ѡ҆́крестъ менє̀ съ пла́меннымъ мече́мъ при́снѡ ѡ҆полча́ѧйсѧ.

Ра́дꙋйсѧ, проти́вꙋ кнѧ́зѧ тмы̀ во бра́ни мѝ посо́бствꙋѧй: ра́дꙋйсѧ, лꙋка́выхъ є҆гѡ̀ слꙋжи́телей побѣжда́ти мѝ помога́ѧй.

Ра́дꙋйсѧ, ѿгонѧ́ѧй ѿ менє̀ дꙋшепа̑гꙋбныѧ де́мѡны, а҆́ки хи̑щныѧ пти̑цы: ра́дꙋйсѧ, вразꙋмлѧ́ѧй мѧ̀ бѣсѡ́вскїѧ кѡ́зни позна́ти, а҆́ки лꙋка̑выѧ лиси̑цы.

Ра́дꙋйсѧ, ѕвѣроѡбра́знаѧ тѣ́хъ на ᲂу҆́мъ и҆ се́рдце моѐ нападє́нїѧ ѿрѣва́ѧй: ра́дꙋйсѧ, порожде́нїѧ и҆́хъ, го́рдость и҆ не́нависть, и҆з̾ се́рдца моегѡ̀ и҆сторга́ѧй.

Ра́дꙋйсѧ, за́висть и҆ ѕлопомнѣ́нїе ѿ мы́слей мои́хъ прогонѧ́ѧй: ра́дꙋйсѧ, во ѿраже́нїе ѕлы́хъ по́мыслѡвъ кре́стнымъ зна́менїемъ себє̀ ѡ҆гражда́ти побꙋжда́ѧй мѧ̀.

Ра́дꙋйсѧ, на а҆́спїда и҆ васїлі́ска небоѧ́зненнѡ настꙋпа́ти ᲂу҆крѣплѧ́ѧй мѧ̀: ра́дꙋйсѧ, и҆мѣ́ѧй непобѣди́мое ѡ҆рꙋ́жїе проти́вꙋ всѣ́хъ врагѡ́въ мои́хъ.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Бг҃оте́чнѣй и҆ лꙋчеза́рнѣй ѕвѣздѣ̀, пꙋтеводи́вшей дре́влѣ вѡлхвы̀ на поклоне́нїе ро́ждшемꙋсѧ въ виѳлее́мѣ сп҃си́телю мі́ра, дерза́ю ᲂу҆подо́бити тѧ̀, бл҃гі́й мо́й храни́телю: неѿлꙋ́чнымъ бо и҆ свѣтоно́снымъ твои́мъ мѝ спребыва́нїемъ ᲂу҆казꙋ́еши мѝ пра́вый пꙋ́ть, ведꙋ́щїй въ го́рнїй виѳлее́мъ, въ нбⷭ҇ное црⷭ҇твїе, да та́мѡ съ ли̑ки а҆рха̑гг҃лъ и҆ а҆́гг҃лъ сподо́блюсѧ воспѣва́ти превѣ́чномꙋ цр҃ю̀ сла́вы: А҆ллилꙋ́їа.

Ви́дѧ мѧ̀ но́щїю содержи́ма мра́чною и҆ те́мнымъ ѡ҆́блакомъ страсте́й покрыва́ема, ст҃ы́й храни́телю дꙋшѝ моеѧ̀, не ѡ҆горчи́сѧ, не ѡ҆ста́ви менє̀, но подража́ѧй долготерпѣ́нїю сп҃си́телѧ моегѡ̀, пождѝ є҆щѐ, возбꙋжда́ѧ мѧ̀ къ покаѧ́нїю, до́ндеже ѻ҆чеса̀ моѧ̑ и҆злїю́тъ и҆сто́чники слє́зъ на ѡ҆мы́тїе дꙋше́вныѧ нечистоты̀ моеѧ̀. ѡ҆ се́мъ смире́ннѡ молю̀ тѧ̀ и҆ глаго́лю:

Ра́дꙋйсѧ, ꙗ҆́кѡ вы́нꙋ прино́сиши бг҃ꙋ ѡ҆ мнѣ̀ грѣ́шнѣмъ моли̑твы своѧ̑, ꙗ҆́кѡ кади́ло пред̾ ни́мъ благово́нное: ра́дꙋйсѧ, ꙗ҆́кѡ при́снѡ хода́тайствꙋеши пред̾ созда́телемъ мои́мъ ѡ҆ є҆́же сп҃сти́сѧ мѝ.

Ра́дꙋйсѧ, ꙗ҆́кѡ првⷣный гнѣ́въ є҆гѡ̀, дви́жимый на мѧ̀, свои́мъ предста́тельствомъ ѿвраща́еши: ра́дꙋйсѧ, ꙗ҆́кѡ про́сиши всемлⷭ҇рдаго гдⷭ҇а пода́ти проще́нїе ѕлы́хъ мои́хъ дѣѧ́нїй.

Ра́дꙋйсѧ, ꙗ҆́кѡ ᲂу҆милостивлѧ́еши є҆гѡ̀ бла́гость, да не погꙋби́тъ мѧ̀ со беззако́ньми мои́ми: ра́дꙋйсѧ, ꙗ҆́кѡ непреста́ннѡ мо́лишисѧ и҆скꙋпи́телю моемꙋ̀, да да́рꙋетъ мѝ вре́мѧ ко и҆справле́нїю.

Ра́дꙋйсѧ, ꙗ҆́кѡ возбꙋжда́еши мѧ̀ въ покаѧ́нїи препроводи́ти всѧ̑ дни̑ живота̀ моегѡ̀: ра́дꙋйсѧ, ꙗ҆́кѡ внꙋша́еши мѝ жела́нїе, да вы́нꙋ ка́юсѧ пред̾ гдⷭ҇емъ во всѣ́хъ мои́хъ прегрѣше́нїѧхъ.

Ра́дꙋйсѧ, ꙗ҆́кѡ вразꙋмлѧ́еши мѧ̀ на всѧ́кое вре́мѧ мы́сленнѡ себє̀ и҆спы́товати и҆ во грѣсѣ́хъ мои́хъ и҆сповѣ́доватисѧ: ра́дꙋйсѧ, ꙗ҆́кѡ влага́еши въ се́рдце моѐ сокрꙋше́нїе и҆ ско́рбь, занѐ прогнѣ́вахъ пребл҃га́го бг҃а моего̀.

Ра́дꙋйсѧ, ꙗ҆́кѡ побꙋжда́еши мѧ̀ ѡ҆пла́кивати ѡ҆каѧ́нное и҆ скве́рное житїѐ моѐ: ра́дꙋйсѧ, свѣтоно́сный и҆ неꙋмолка́ющїй хода́таю сп҃се́нїѧ моегѡ̀.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Проповѣ́дꙋю велегла́снѡ при́сное твоѐ, храни́телю мо́й а҆́гг҃ле, ѡ҆ мнѣ̀, грѣ́шнѣмъ, попече́нїе: въ ско́рбѣхъ бо и҆ напа́стѣхъ, ꙗ҆́же въ се́мъ многомѧте́жнѣмъ мі́рѣ смꙋща́етъ ми́ръ дꙋшѝ моеѧ̀, ꙗ҆влѧ́еши мѝ сѧ̀ ско́рый ᲂу҆тѣ́шитель, вразꙋмлѧ́ѧ мѧ̀ ꙗ҆́кѡ всѧ̑ сїѧ̑ низпосыла́ютсѧ ѿ премꙋ́драгѡ созда́телѧ, а҆́ки врачевство̀ проти́вꙋ дꙋше́вныхъ недꙋ́гѡвъ мои́хъ, и҆ поꙋча́ѧ бл҃годѣ́ющемꙋ си́це нбⷭ҇номꙋ врачꙋ̀ воспѣва́ти: А҆ллилꙋ́їа.

Возсїѧва́етъ въ дꙋшѝ мое́й, ѡ҆мрача́емой ско́рбїю и҆ ᲂу҆ны́нїемъ, свѣ́тъ бл҃года́тнагѡ ᲂу҆тѣше́нїѧ, и҆ се́рдце моѐ и҆сполнѧ́етсѧ весе́лїѧ и҆ ра́дости, є҆гда̀ непреста́нными твои́ми, ст҃ы́й а҆́гг҃ле, наставлє́нїи возбꙋжда́емь, дерза́ю ꙗ҆́кѡ мыта́рь, вопи́ти къ ще́дромꙋ бг҃ꙋ, да ми́лостивъ бꙋ́детъ и҆ прости́тъ мѝ прегрѣшє́нїѧ моѧ̑. не премолчѝ ᲂу҆̀бо, наста́вниче мо́й, вразꙋмлѧ́ѧ и҆ ᲂу҆крѣплѧ́ѧ мѧ̀, зовꙋ́ща тѝ:

Ра́дꙋйсѧ, помога́ѧй мѝ бл҃гі́й ꙗ҆ре́мъ сп҃си́тельнагѡ терпѣ́нїѧ съ любо́вїю носи́ти: ра́дꙋйсѧ, въ бѣда́хъ и҆ ѕлоключе́нїихъ ᲂу҆пова́нїемъ на гдⷭ҇а бг҃а ᲂу҆крѣплѧ́ѧй мѧ̀.

Ра́дꙋйсѧ, скѡ́рби и҆ болѣ̑зни мꙋ́жественнѣ преѡдолѣва́ти мѧ̀ поꙋча́ѧй: ра́дꙋйсѧ, всѧ́кꙋю печа́ль и҆ ᲂу҆ны́нїе ѿ се́рдца моегѡ̀ ѿгонѧ́ѧй.

Ра́дꙋйсѧ, проти́вꙋ врага̀, въ сѣ́ть ѿча́ѧнїѧ ᲂу҆лови́ти мѧ̀ хотѧ́ща, бра́тисѧ побꙋжда́ѧй мѧ̀: ра́дꙋйсѧ, словесе́мъ а҆пⷭ҇ла, ꙗ҆́кѡ всѝ хотѧ́щїи бл҃гоче́стнѡ жи́ти гони́ми бꙋ́дꙋтъ, вѣ́ровати ᲂу҆бѣжда́ѧй мѧ̀.

Ра́дꙋйсѧ, ѡ҆́бразъ терпѣ́нїѧ и҆ ѕлострада́нїѧ прїѧ́ти мѝ прⷪ҇ро́ки и҆ а҆пⷭ҇лы внꙋша́ѧй: ра́дꙋйсѧ, на ли́къ мч҃нкъ и҆ и҆сповѣ̑дникъ, за хрⷭ҇та̀ до и҆злїѧ́нїѧ кро́ве своеѧ̀ подвиза́вшихсѧ, во ᲂу҆тѣше́нїе мѝ показꙋ́ѧй.

Ра́дꙋйсѧ, страда́нїѧ сама́гѡ сп҃си́телѧ и҆ гдⷭ҇а вы́нꙋ ᲂу҆́мнымъ ѻ҆чесе́мъ мои́мъ представлѧ́ѧй: ра́дꙋйсѧ, наде́ждою бꙋ́дꙋщагѡ воздаѧ́нїѧ се́рдце моѐ ᲂу҆слажда́ѧй.

Ра́дꙋйсѧ, всера́достнымъ ѡ҆жида́нїемъ вѣ́чныхъ бл҃гъ дꙋ́шꙋ мою̀ ѡ҆живлѧ́ѧй: ра́дꙋйсѧ, бл҃гі́й и҆ при́сный мо́й ᲂу҆тѣ́шителю.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Хотѧ́й всѣ̑мъ человѣ́кѡмъ сп҃сти́сѧ, премилосе́рдый созда́тель мо́й посла̀ тѧ̀, а҆́гг҃ла своего̀, ꙗ҆́кѡ вѣ́рна мѝ стра́жа и҆ пѣ́стꙋна до́бра во всѣ́мъ житїѝ мое́мъ, да всю́дꙋ вспомоществꙋ́еши мѝ ст҃ы́ми твои́ми вдохновє́нїи, защища́еши проти́вꙋ ко́зней дїа́вола и҆ предꙋготовлѧ́еши мѧ̀ дѣ̑лы благи́ми вни́ти съ мꙋ́дрыми дѣ́вами въ нбⷭ҇ный черто́гъ, съ бг҃окра́сною пѣ́снїю: А҆ллилꙋ́їа.

Но́вꙋю показꙋ́етъ бл҃гость гдⷭ҇ь и҆ влⷣка мо́й на мнѣ̀ непотре́бнѣмъ и҆ па́че всѣ́хъ грѣ́шнѣйшемъ рабѣ̀ свое́мъ: презира́ѧ бо лю̑таѧ моѧ̑ и҆ тѧ̑жкаѧ, не погꙋби́лъ мѧ́ є҆сть со беззако́ньми мои́ми да́же до настоѧ́щагѡ днѐ и҆ часа̀, но долготерпѧ̀ на мнѣ̀, ми́лостивнѣ ѡ҆жида́етъ моего̀ ѡ҆браще́нїѧ и҆ серде́чнагѡ покаѧ́нїѧ. вѣ́рꙋю, бл҃гі́й храни́телю мо́й, ꙗ҆́кѡ твои́мъ при́снымъ пред̾ бг҃омъ за мѧ̀ хода́тайствомъ досе́лѣ храни́мь є҆́смь: тѣ́мже, любо́вїю къ тебѣ̀ подвиза́емый, взыва́ю:

Ра́дꙋйсѧ, ꙗ҆́кѡ ѡ҆бꙋрева́ющасѧ мѧ̀ въ мо́ри житїѧ̀ сегѡ̀ ѿ коне́чнагѡ потопле́нїѧ соблюда́еши: ра́дꙋйсѧ, ꙗ҆́кѡ и҆з̾ ро́ва беззако́нїй мои́хъ рꙋко́ю твоеѧ̀ по́мощи мѧ̀ и҆схища́еши.

Ра́дꙋйсѧ, ꙗ҆́кѡ грѣхо́вный со́нъ дꙋшевре́дныѧ моеѧ̀ лѣ́ности ѿрѧса́еши: ра́дꙋйсѧ, ꙗ҆́кѡ ᲂу҆́мъ мо́й, ѡ҆мраче́нный небреже́нїемъ, свѣ́тлымъ твои́мъ присꙋ́тствїемъ ѡ҆зарѧ́еши.

Ра́дꙋйсѧ, ꙗ҆́кѡ хла́дное и҆ ма́лѡ не ᲂу҆га́сшее се́рдце моѐ мл҃твами воспламенѧ́ти мѝ помога́еши: ра́дꙋйсѧ, ꙗ҆́кѡ на славосло́вїе бж҃їе при́снѡ мѧ̀ возставлѧ́еши.

Ра́дꙋйсѧ, ꙗ҆́кѡ настроѧ́еши гла́съ мо́й къ пѣснопѣ́нїѧмъ, и҆́миже досто́йнѡ и҆ пра́веднѡ є҆́сть хвали́ти творца̀ всѧ́ческихъ: ра́дꙋйсѧ, ꙗ҆́кѡ поꙋча́еши мѧ̀ прославлѧ́ти гдⷭ҇а моегѡ̀ не ᲂу҆сты̀ то́чїю, но и҆ се́рдцемъ.

Ра́дꙋйсѧ, ꙗ҆́кѡ ко и҆сполне́нїю прест҃ы́ѧ во́ли є҆гѡ̀ возбꙋжда́еши мѧ̀: ра́дꙋйсѧ, ꙗ҆́кѡ самоѿверже́нїю и҆ ѿрече́нїю моеѧ̀ ѕлы́ѧ во́ли приѡбꙋчи́ти мѧ̀ тщи́шисѧ.

Ра́дꙋйсѧ, ꙗ҆́кѡ голꙋби́нꙋ простотꙋ̀ и҆ а҆́гнчꙋ кро́тость стѧжа́ти мѝ преи́скреннѣ жела́еши: ра́дꙋйсѧ, ꙗ҆́кѡ ѡ҆ є҆́же младе́нческомꙋ неѕло́бїю и҆ ста́рческомꙋ доброразсꙋжде́нїю дарова́тисѧ мѝ хода́тайствꙋеши.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Стра́ненъ и҆ пришле́цъ є҆́смь на землѝ се́й: житїѐ моѐ сꙋ́етнѡ и҆ маловре́меннѡ є҆́сть: а҆́зъ же, ѡ҆каѧ́нный, сме́рти безвѣ́стное во ᲂу҆́мъ никогда́же прїе́млю, ни помышлѧ́ю ѡ҆ стра́шнѣмъ сꙋди́щи, въ не́мже и҆́мамъ првⷣномꙋ сꙋдїѝ предста́ти и҆ да́ти ѿвѣ́тъ ѡ҆ всѧ́комъ дѣ́лѣ же и҆ сло́вѣ. Тѣ́мже молю̀ тѧ̀, дꙋшѝ моеѧ̀ храни́телѧ, возбꙋдѝ мѧ̀ ско́ро ѿ сна̀ грѣхо́внагѡ, да не пости́гнетъ мѧ̀ ча́съ сме́рти неиспра́вленна и҆ да сподо́блюсѧ и҆спроси́ти ѿ всеми́лостивагѡ бг҃а беззако́нїємъ мои́мъ проще́нїе и҆ во гла́сѣ ра́дованїѧ воспѣва́ти є҆мꙋ̀: А҆ллилꙋ́їа.

Всѣ́хъ гдⷭ҇ь и҆ созда́тель мо́й, є҆гда̀ назна́менꙋетъ мѝ преста́витисѧ ѿ житїѧ̀ сегѡ̀, ты̀, бл҃гі́й храни́телю мо́й, прови́дѧй грѡ́зныѧ мꙋ́ки, дꙋховѡ́мъ ѕло́бы и҆ нераска́ѧннымъ грѣ́шникѡмъ ᲂу҆гото́ванныѧ и҆ менє̀ ѡ҆жида́ющыѧ, покры́й мѧ̀ твоегѡ̀ милосе́рдїѧ крила́ми, ꙗ҆́коже ѻ҆ре́лъ птенцы̀ своѧ̑, и҆ внегда̀ и҆счеза́ти ѿ менє̀ дꙋ́хꙋ моемꙋ̀, да ᲂу҆́зрю тѧ̀ бли́з̾ менє̀ предстоѧ́ща и҆ лю́тыѧ врагѝ ѿгонѧ́юща. Ѡ҆ се́мъ со ᲂу҆миле́нїемъ молю́ ти сѧ, вѣща́ѧ си́це:

Ра́дꙋйсѧ, ᲂу҆́мнымъ ѻ҆чесє́мъ мои́мъ го́рькїй и҆ стра́шный ча́съ сме́ртный представлѧ́ѧй: ра́дꙋйсѧ, ꙗ҆́кѡ неизбѣ́женъ, вкꙋ́пѣ же и҆ безвѣ́стенъ ча́съ то́й при́снѡ мѝ напомина́ѧй.

Ра́дꙋйсѧ, на кі́йждо де́нь, а҆́ки ᲂу҆жѐ на послѣ́днїй житїѧ̀ моегѡ̀ взира́ти мѧ̀ поꙋча́ѧй: ра́дꙋйсѧ, на всѧ́кое вре́мѧ ко и҆схо́дꙋ во и҆́нъ мі́ръ мѧ̀ прїꙋготовлѧ́ѧй.

Ра́дꙋйсѧ, дꙋше́вное ᲂу҆миле́нїе и҆ серде́чное сокрꙋше́нїе во мнѣ̀ рожда́ѧй: ра́дꙋйсѧ, вы́нꙋ жела́ѧй мѝ, да понѐ при кончи́нѣ дне́й мои́хъ пока́юсѧ.

Ра́дꙋйсѧ, люби́ти мі́ръ и҆ ꙗ҆́же въ мі́рѣ мѝ воспреща́ѧй: ра́дꙋйсѧ, пристра́стїе къ тлѣ́нномꙋ бога́тствꙋ и҆з̾ се́рдца моегѡ̀ и҆скоренѧ́ти помога́ѧй.

Ра́дꙋйсѧ, всѧ̑ бл҃га зємна́ѧ бы́ти привре́менна и҆ скоропреходѧ́ща мѝ показꙋ́ѧй: ра́дꙋйсѧ, ꙗ҆́кѡ всѧ̑ кра̑снаѧ мі́ра сегѡ̀ крі́нꙋ сѣ́льномꙋ подо́бна сꙋ́ть, вразꙋмлѧ́ѧй мѧ̀.

Ра́дꙋйсѧ, сла́вы чл҃вѣ́чи, а҆́ки тѣ́ни преходѧ́щїѧ, и҆ска́ти возбранѧ́ѧй мѝ: ра́дꙋйсѧ, ѿ є҆ди́наго бг҃а сла́вы нетле́нныѧ въ бꙋ́дꙋщемъ вѣ́цѣ взыска́ти побꙋжда́ѧй мѧ̀.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Всѧ́къ грѣ́хъ содѣ́ѧхъ въ житїѝ се́мъ и҆ ве́сь живо́тъ мо́й во мно́зѣ прите́къ сꙋетѣ̀, къ концꙋ̀ прибли́жихсѧ: врази́ же моѝ ᲂу҆стремлѧ́ютсѧ на мѧ̀, а҆́лчꙋще поѧ́ти мѧ̀ и҆ низри́нꙋти во глꙋбинꙋ̀ а҆́довꙋ. Тѣ́мже молю́ ти сѧ, бл҃гі́й мо́й храни́телю, бꙋ́ди мѝ защи́титель, є҆гда̀ и҆́мамъ преходи́ти лю̑таѧ мыта̑рства, и҆ безбѣ́днѡ доведи́ мѧ до вра́тъ нбⷭ҇нагѡ црⷭ҇твїѧ, и҆дѣ́же ли́цы а҆́гг҃льстїи ра́достнѣ срѣта́ютъ восклица́ющихъ: А҆ллилꙋ́їа.

Вѣті́йствꙋющїй ѧ҆зы́къ не мо́жетъ и҆зрещѝ, ꙗ҆́же сотвори́лъ мѝ є҆сѝ, ст҃ы́й храни́телю мо́й, во всѣ́мъ житїѝ мое́мъ: прїѧ́въ бо дꙋ́шꙋ мою̀ ѿ кꙋпе́ли ст҃а́гѡ креще́нїѧ, храни́лъ мѧ̀ є҆сѝ во младе́нчествѣ, ᲂу҆чи́лъ и҆ вразꙋмлѧ́лъ є҆сѝ во ѻ҆́трочествѣ, соблюда́лъ мѧ̀ є҆сѝ ѿ поползнове́нїѧ ко грѣхѡ́мъ въ во́зрастѣ ю҆́ношестѣмъ, наставлѧ́лъ є҆сѝ, прише́дша мѧ̀ въ мꙋ́жество, ѡ҆хранѧ́лъ є҆сѝ на всѣ̑хъ пꙋте́хъ мои́хъ да́же до ста́рости, ѡ҆блича́ѧ и҆ ᲂу҆тѣша́ѧ, всю́дꙋ помога́ѧ и҆ направлѧ́ѧ на пꙋ́ть сп҃се́нїѧ. Сегѡ̀ ра́ди бл҃года́рственнѡ вопїю̀ тѝ:

Ра́дꙋйсѧ, ꙗ҆́кѡ никогда́же лиша́еши мѧ̀ твоеѧ̀ по́мощи и҆ застꙋпле́нїѧ: ра́дꙋйсѧ, ꙗ҆́кѡ ѿ сна̀ востаю́ща мѧ̀ подвиза́еши ко бл҃годаре́нїю гдⷭ҇а, ᲂу҆крѣплѧ́ющагѡ си̑лы моѧ̑.

Ра́дꙋйсѧ, ꙗ҆́кѡ нача́токъ коегѡ́ждо днѐ мл҃твою ѡ҆сщ҃а́ти мѧ̀ поꙋча́еши: ра́дꙋйсѧ, ꙗ҆́кѡ воспреща́еши мѝ без̾ мл҃твы къ всебл҃го́мꙋ промысли́телю, дерзнове́ннѡ собо́ю что̀ начина́ти.

Ра́дꙋйсѧ, ꙗ҆́кѡ самонадѣ́ѧнїе и҆з̾ се́рдца моегѡ̀ и҆стреби́ти тщи́шисѧ: ра́дꙋйсѧ, ꙗ҆́кѡ сладча́йшее и҆́мѧ гдⷭ҇а і҆и҃са хрⷭ҇та̀ ᲂу҆сты̀ непреста́ннѡ произноси́ти и҆ во ᲂу҆мѣ̀ держа́ти мѧ̀ побꙋжда́еши.

Ра́дꙋйсѧ, ꙗ҆́кѡ во всѧ́кое вре́мѧ нꙋ̑жнаѧ то́чїю и҆ полє́знаѧ вѣща́ти ѧ҆зы́комъ мѝ внꙋша́еши: ра́дꙋйсѧ, ꙗ҆́кѡ ѿ праздносло́вїѧ, многоглаго́ланїѧ, па́че же и҆ кощꙋ́нства мѧ̀ ᲂу҆держава́еши.

Ра́дꙋйсѧ, ꙗ҆́кѡ ꙗ҆дꙋ́щꙋ и҆ пїю́щꙋ мѝ и҆лѝ и҆́но что̀ творѧ́щꙋ при́снѡ спребыва́еши: ра́дꙋйсѧ, ꙗ҆́кѡ воздержа́нїю въ пи́щи и҆ питїѝ прїѡбꙋчи́ти мѧ̀ пече́шисѧ.

Ра́дꙋйсѧ, ꙗ҆́кѡ спѧ́ща мѧ̀ храни́ти и҆ врага̀, хотѧ́ща и҆скꙋси́ти мѧ̀ со́нными мечта̑нїи, ѿгонѧ́еши: ра́дꙋйсѧ, ꙗ҆́кѡ воспѧща́еши мѧ̀ ѿ любостра́стнагѡ стремле́нїѧ и҆ во ѻ҆́чїю моє́ю цѣломꙋ́дренный сты́дъ влага́еши.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Сп҃стѝ всѣ́хъ прише́дый і҆и҃се мо́й пребл҃гі́й, со ᲂу҆миле́нїемъ молю́ ти сѧ, твои́мъ млⷭ҇рдїемъ простѝ мои́хъ ѕлы́хъ премно́жество и҆ безмѣ́рїе, преклонѧ́емый на сїѐ бжⷭ҇твенными мольба́ми твоегѡ̀ невеще́ственнагѡ слꙋжи́телѧ, є҆го́же мѝ приста́вилъ є҆сѝ и҆з̾ младе́нства, ꙗ҆́кѡ чл҃вѣколю́бецъ, храни́телѧ: да досто́инъ ꙗ҆влю́сѧ вни́ти въ черто́гъ сла́вы твоеѧ̀ и҆ со дꙋ́хи пра́ведныхъ воспѣ́ти: А҆ллилꙋ́їа.

Стѣна̀ тве́рда при́снѡ ꙗ҆влѧ́еши ми́ сѧ, ст҃ы́й а҆́гг҃ле, проти́вꙋ ᲂу҆хищре́нїй ѕло́бныхъ врагѡ́въ мои́хъ, и҆́щꙋщихъ вѣ́чныѧ поги́бели моеѧ̀ и҆ разслаблѧ́ющихъ дꙋ́шꙋ мою̀ лѣ́ностїю и҆ самозабве́нїемъ. Молю̀ ᲂу҆́бѡ тѧ̀, храни́телю мо́й, да твои́мъ хода́тайствомъ сподо́блюсѧ, при и҆схо́дѣ дꙋшѝ моеѧ̀ и҆з̾ тѣлесѣ̀ прича́стникъ бы́ти пречⷭ҇тагѡ тѣ́ла и҆ ст҃ѣ́йшїѧ кро́ве моегѡ̀ сп҃си́телѧ, ꙗ҆́кѡ да, ᲂу҆крѣпи́всѧ се́ю нетлѣ́нною пи́щею и҆ животворѧ́щимъ питїе́мъ, безтре́петнѡ прейдꙋ̀ во и҆́нъ мі́ръ, воспѣва́ѧ тѧ̀, моегѡ̀ бл҃годѣ́телѧ:

Ра́дꙋйсѧ, ꙗ҆́кѡ дана̀ тѝ є҆́сть вла́сть и҆ си́ла ѿража́ти де́мѡнскаѧ на мѧ̀ нападє́нїѧ: ра́дꙋйсѧ, ꙗ҆́кѡ прїѧ́лъ є҆сѝ ѿ бг҃а крѣ́пость на побѣжде́нїе неви́димыхъ врагѡ́въ мои́хъ.

Ра́дꙋйсѧ, ꙗ҆́кѡ ѿ всѧ́кагѡ ѕлодѣ́йства и҆ ко́зней дїа́вольскихъ могі́й и҆зба́вити мѧ̀: ра́дꙋйсѧ, ꙗ҆́кѡ го́рькихъ мыта́рствъ нача́льника, лю́тагѡ мїроде́ржца нападє́нїѧ ѿ менє̀ ѿрева́еши.

Ра́дꙋйсѧ, ꙗ҆́кѡ, ѡ҆гражда́емый твои́мъ присꙋ́тствїемъ, и҆́мамъ наде́ждꙋ въ ча́съ сме́рти не ᲂу҆страши́тисѧ мра́чныхъ ли́цъ дꙋхѡ́въ ѕло́бы: ра́дꙋйсѧ, ꙗ҆́кѡ храни́мый тобо́ю, ᲂу҆пова́ю безбѣ́днѡ прейтѝ воздꙋ̑шнаѧ мыта̑рства.

Ра́дꙋйсѧ, ꙗ҆́кѡ ᲂу҆крѣплѧ́емый твое́ю по́мощїю, ча́ю не ᲂу҆де́ржанъ бы́ти мнѣ̀ вра́тъ раѧ̀, мѝ вожделѣ́ннагѡ: ра́дꙋйсѧ, ꙗ҆́кѡ твоѐ за мѧ̀ предста́тельство си́льнѡ є҆́сть пред̾ бг҃омъ, є҆́же не вве́рженꙋ мѝ бы́ти во тмꙋ̀ кромѣ́шнꙋю.

Ра́дꙋйсѧ, ꙗ҆́кѡ при́снѡ внꙋша́еши мѝ ᲂу҆милостивлѧ́ти гдⷭ҇а слеза́ми покаѧ́нїѧ, да и҆зба́влюсѧ гее́нны а҆́дскїѧ: ра́дꙋйсѧ, ꙗ҆́кѡ побꙋжда́еши мѧ̀ де́нь и҆ но́щь моли́тисѧ, да не по́сланъ бꙋ́дꙋ со де́мѡны мꙋ́читисѧ.

Ра́дꙋйсѧ, неѿстꙋ́пный мо́й рꙋководи́телю и҆ пѣ́стꙋне: ра́дꙋйсѧ, крѣ́пкїй мо́й застꙋ́пниче и҆ ско́рый помо́щниче.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Пѣ́нїе сїѐ, а҆́ще и҆ ѿ ᲂу҆се́рдїѧ моегѡ̀ тѝ приноси́мое, ст҃ы́й храни́телю мо́й, вѣ́мъ, ꙗ҆́кѡ не дово́льнѡ є҆́сть ко и҆з̾ѧвле́нїю моегѡ̀ серде́чнагѡ бл҃годаре́нїѧ за всѧ̑ бл҃га̑ѧ, ꙗ҆̀же мѝ сотвори́лъ є҆сѝ и҆ не престае́ши твори́ти да́же до сегѡ̀ днѐ и҆ часа̀: но и҆ ѡ҆ се́мъ молю́ ти сѧ, ѻ҆́бщагѡ мѝ съ тобо́ю созда́телѧ ᲂу҆ми́лостиви, да на стра́шнѣмъ сꙋдѣ̀ свое́мъ шꙋ́їѧ ча́сти и҆зба́витъ мѧ̀ и҆ сподо́битъ со всѣ́ми ст҃ы́ми воспѣва́ти є҆мꙋ̀: А҆ллилꙋ́їа.

Свѣти́льникъ мо́й ᲂу҆гасѐ, є҆ле́а же бл҃ги́хъ дѣ́лъ, во є҆́же возжещѝ и҆̀, нѣ́сть мѝ: и҆ гдѣ̀ ѡ҆брѧ́щꙋсѧ а҆́зъ, ѡ҆каѧ́нный, сно́мъ грѣхо́внымъ ѿѧгче́нный, є҆гда̀ пости́гнетъ мѧ̀ внеза́пꙋ полꙋ́нощь, ча́съ кончи́ны моеѧ̀; но да не ᲂу҆слы́шꙋ и҆ а҆́зъ, ꙗ҆́коже ю҆рѡ́дивыѧ дѣ̑вы, гро́знагѡ гла́са жениха̀: не вѣ́мъ тѧ̀. Помозѝ мѝ, неꙋсыпа́емый храни́телю мо́й, напо́лнити сосꙋ́ды дꙋшѝ моеѧ̀ є҆ле́емъ бл҃ги́хъ дѣ́лъ, па́че же млⷭ҇рдїѧ и҆ смире́нїѧ. Ны́нѣ же прїимѝ ѿ менѐ сїѐ пѣ́нїе:

Ра́дꙋйсѧ, є҆ди́нагѡ гдⷭ҇а и҆мѣ́ти въ ра́зꙋмѣ при́снѡ мѝ внꙋша́ѧй: ра́дꙋйсѧ, за́повѣдь ѡ҆ любвѝ къ немꙋ̀, пребл҃го́мꙋ, въ се́рдцѣ мое́мъ ѡ҆бновлѧ́ѧй.

Ра́дꙋйсѧ, люби́ти є҆гѡ̀, созда́телѧ, всѣ́мъ ᲂу҆мо́мъ и҆ всѣ́мъ помышле́нїемъ мѧ̀ побꙋжда́ѧй: ра́дꙋйсѧ, и҆ къ бли̑жнимъ и҆́скреннюю любо́вь мою̀ бг҃оꙋго́днꙋ бы́ти непреста́ннѡ мѝ напомина́ѧй.

Ра́дꙋйсѧ, люби́ти и҆̀хъ не сло́вомъ и҆лѝ ѧ҆зы́комъ, но дѣ́ломъ и҆ и҆́стиною мѧ̀ поꙋча́ѧй: ра́дꙋйсѧ, во всѣ́хъ нꙋ́ждахъ и҆̀хъ помога́ти жела́нїе мѝ влага́ѧй.

Ра́дꙋйсѧ, ᲂу҆тѣша́ти скорбѧ́щихъ, застꙋпа́ти ѡ҆би́димыхъ мѧ̀ наставлѧ́ѧй: ра́дꙋйсѧ, ѿ и҆мѣ́нїй свои́хъ ᲂу҆дѣлѧ́ти бѣ̑днымъ и҆ неимꙋ́щымъ се́рдце моѐ преклонѧ́ѧй.

Ра́дꙋйсѧ, и҆ дꙋ́шꙋ мою̀, по за́повѣди сп҃си́телѧ, положи́ти за дрꙋ́ги своѧ̑ гото́вꙋ мѝ бы́ти возбꙋжда́ѧй: ра́дꙋйсѧ, закрыва́ѧй ѻ҆чеса̀ моѧ̑, є҆́же не зрѣ́ти мѝ прегрѣше́нїѧ бра́та моегѡ̀.

Ра́дꙋйсѧ, не попꙋща́ѧй мѝ ѡ҆сꙋжда́ти поползнꙋ́вшагосѧ на грѣ́хъ бли́жнѧго моего̀: ра́дꙋйсѧ, воспреща́ѧй мѝ ꙗ҆́ти вѣ́рꙋ ѡ҆глаго́льникѡмъ клевре́та моегѡ̀.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Блгⷣть дана̀ тѝ є҆́сть ѿ всемогꙋ́щагѡ гдⷭ҇а, ст҃ы́й покрови́телю мо́й, є҆́же храни́ти мѧ̀ на всѣ́хъ пꙋте́хъ мои́хъ, да не ѡ҆ ка́мень ко́егѡ собла́зна преткне́тсѧ нога̀ моѧ̀, до́ндеже мѧ̀ предста́виши хрⷭ҇тꙋ̀ бг҃ꙋ сп҃се́на, є҆мꙋ́же немо́лчнѡ всѧ̑ си̑лы нбⷭ҇ныѧ взыва́ютъ: А҆ллилꙋ́їа.

Пою̀ твоѐ досточꙋ́дное млⷭ҇рдїе и҆ мно́гое снисхожде́нїе, быстродви́жный ᲂу҆́ме, безпло́тный слꙋго̀ гдⷭ҇ень: ꙗ҆́кѡ не гнꙋша́ешисѧ грѣхо́вныѧ моеѧ̀ смра́дности и҆ не престае́ши приноси́ти ѡ҆ мнѣ̀, непотре́бнѣмъ, ст҃ы̑ѧ мл҃твы своѧ̑ ко ст҃ѣ́йшемꙋ прⷭ҇то́лꙋ трїѷпоста́снагѡ бг҃а, є҆́же не поги́бнꙋти мѝ во вѣ́ки, но црⷭ҇твїе нбⷭ҇ное наслѣ́довати. Бл҃говолѝ ᲂу҆̀бо прїѧ́ти ѿ дꙋше́вныхъ сокро́вищъ мои́хъ приноси́мое тѝ пѣснопѣ́нїе:

Ра́дꙋйсѧ, ꙗ҆́кѡ воспомина́нїемъ грѧдꙋ́щагѡ гро́знагѡ сꙋда̀ бж҃їѧ ѿ грѣхѡ́въ мѧ̀ ѿрева́еши: ра́дꙋйсѧ, ꙗ҆́кѡ дꙋ́шꙋ мою̀, а҆́ки невѣ́стꙋ, ко срѣ́тенїю прекра́снагѡ жениха̀ хрⷭ҇та̀ предꙋготовлѧ́ти возбꙋжда́еши мѧ̀.

Ра́дꙋйсѧ, ꙗ҆́кѡ при́снѡ жела́еши досто́йна мѧ̀ сотвори́ти бра́чнагѡ черто́га є҆гѡ̀: ра́дꙋйсѧ, ꙗ҆́кѡ вы́нꙋ ᲂу҆чи́ши мѧ̀ возжига́ти свѣти́льникъ дꙋшѝ моеѧ̀, да съ мꙋ́дрыми дѣ́вами, дꙋша́ми првⷣныхъ, вни́дꙋ въ ѻ҆́нь.

Ра́дꙋйсѧ, ꙗ҆́кѡ грѣхо́вныѧ ѻ҆де́жды моеѧ̀ совлачи́тисѧ побꙋжда́еши мѧ̀: ра́дꙋйсѧ, ꙗ҆́кѡ въ ри́зꙋ непоро́чности и҆ чистоты̀ ѡ҆блещи́сѧ мѝ спосо́бствꙋеши.

Ра́дꙋйсѧ, ꙗ҆́кѡ хода́тайствꙋеши, да на стра́шнѣмъ сꙋдѣ̀ хрⷭ҇то́вомъ ѡ҆деснꙋ́ю є҆гѡ̀ ста́ти сподо́блюсѧ: ра́дꙋйсѧ, ꙗ҆́кѡ ᲂу҆молѧ́еши бл҃гоꙋтро́бїе бж҃їе, да ли́кꙋ и҆збра́нныхъ свои́хъ сопричте́тъ мѧ̀.

Ра́дꙋйсѧ, ꙗ҆́кѡ подвиза́еши на мл҃твꙋ ко гдⷭ҇ꙋ и҆ сожи́телей твои́хъ нбⷭ҇ныхъ, да всели́тъ мѧ̀ съ ни́ми во црⷭ҇твїи свое́мъ: ра́дꙋйсѧ, до́брый и҆ бо́дрый блюсти́телю мо́й.

Ра́дꙋйсѧ, те́плый ѡ҆ мнѣ̀, грѣ́шнѣмъ, мл҃твенниче и҆ бл҃гі́й предста́телю: ра́дꙋйсѧ, по гдⷭ҇ѣ бз҃ѣ и҆ прест҃ѣ́й бцⷣѣ крѣ́пкое моѐ ᲂу҆пова́нїе.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Ѽ, пресла́вный и҆ ᲂу҆́мный свѣ́те, а҆́гг҃ле бж҃їй. Прїимѝ бл҃года́рственное сїѐ и҆ моле́бное пѣ́нїе, и҆, є҆гда̀ и҆́мамъ ѿ землѝ воста́ти на сꙋ́дъ, покажѝ тогда̀ млⷭ҇рдїе твоѐ на мнѣ̀, грѣ́шнѣмъ: предста́ни бли́з̾ менє̀ ти́хъ и҆ ра́достенъ, наде́ждою сп҃се́нїѧ ѿ̾е́млѧ стра́хъ мо́й, да въ селе́нїихъ ра́йскихъ сподо́блюсѧ вкꙋ́пѣ съ тобо́ю во вѣ́ки вѣкѡ́въ воспѣва́ти превѣ́чномꙋ цр҃ю̀ сла́вы: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

Ра́дꙋйсѧ, никогда́же ѿлꙋча́ѧйсѧ менє̀, грѣ́шнагѡ: ра́дꙋйсѧ, вы́нꙋ спребыва́ѧй мѝ, недосто́йномꙋ.

Ра́дꙋйсѧ, соблюда́ѧй мѧ̀ на всѣ́хъ пꙋте́хъ мои́хъ: ра́дꙋйсѧ, сохранѧ́ѧй мѧ̀ ѿ всѧ́кагѡ ѕла̀.

Ра́дꙋйсѧ, ѿ бг҃а да́нный мѝ рꙋководи́телю на пꙋте́хъ житїѧ̀ моегѡ̀: ра́дꙋйсѧ, бл҃гі́й мо́й наста́вниче.

Ра́дꙋйсѧ, а҆́гг҃ле гдⷭ҇ень, неꙋсыпа́емый храни́телю мо́й.

Ѽ, ст҃ы́й а҆́гг҃ле, храни́телю и҆ покрови́телю мо́й бл҃гі́й! Съ сокрꙋше́ннымъ се́рдцемъ и҆ болѣ́зненною дꙋше́ю предстою̀ тѝ, молѧ́сѧ: ᲂу҆слы́ши мѧ̀, грѣ́шнагѡ раба̀ своегѡ̀ (и҆мⷬ҇къ), съ во́племъ крѣ́пкимъ и҆ пла́чемъ го́рькимъ вопїю́щагѡ: не помѧнѝ мои́хъ беззако́нїй и҆ непра́вдъ, и҆́миже а҆́зъ ѡ҆каѧ́нный прогнѣвлѧ́ю тѧ̀ по всѧ̑ днѝ и҆ часы̀, и҆ ме́рзостна себє̀ творю̀ пред̾ созда́телемъ на́шимъ гдⷭ҇емъ: ꙗ҆ви́сѧ мнѣ̀ млⷭ҇рдъ и҆ не ѿлꙋча́йсѧ менє̀ скве́рнагѡ да́же до кончи́ны моеѧ̀: возбꙋдѝ мѧ̀ ѿ сна̀ грѣхо́внагѡ и҆ посо́бствꙋй твои́ми мл҃твами про́чее вре́мѧ живота̀ моегѡ̀ без̾ поро́ка прейтѝ и҆ сотвори́ти плоды̀ досто́йны покаѧ́нїѧ, па́че же ѿ сме́ртныхъ паде́нїй грѣхо́вныхъ соблюди́ мѧ, да не поги́бнꙋ во ѿча́ѧнїи и҆ да не пора́дꙋетсѧ вра́гъ ѡ҆ поги́бели мое́й. Вѣ́мъ вои́стиннꙋ и҆ ᲂу҆сты̑ и҆сповѣ́дꙋю, ꙗ҆́кѡ никто́же тако́въ дрꙋ́гъ и҆ предста́тель, защи́титель и҆ побо́рникъ, ꙗ҆́коже ты̀, ст҃ы́й а҆́гг҃ле: предстоѧ̀ бо прⷭ҇то́лꙋ гдⷭ҇ню, мо́лишисѧ ѡ҆ мнѣ̀ непотре́бнѣмъ и҆ па́че всѣ́хъ грѣ́шнѣйшемъ, да не и҆зы́метъ пребл҃гі́й дꙋшѝ моеѧ̀ въ де́нь неча́ѧнїѧ моегѡ̀ и҆ въ де́нь творе́нїѧ ѕло́бы. Не преста́й ᲂу҆́бѡ ᲂу҆милостивлѧ́ѧ премлⷭ҇рдаго гдⷭ҇а и҆ бг҃а моего̀, да ѿпꙋ́ститъ согрѣшє́нїѧ моѧ̑, ꙗ҆́же сотвори́хъ во всѣ́мъ житїѝ мое́мъ, дѣ́ломъ, сло́вомъ и҆ всѣ́ми мои́ми чꙋ̑вствы, и҆ и҆́миже вѣ́сть сꙋдьба́ми да сп҃се́тъ мѧ̀: да нака́жетъ мѧ̀ здѣ̀ по свое́й неизрече́нной млⷭ҇ти, но да не ѡ҆бличи́тъ и҆ не и҆стѧ́жетъ мѧ̀ ѻ҆на́мѡ по своемꙋ̀ нелицепрїѧ́тномꙋ правосꙋ́дїю: да сподо́битъ мѧ̀ покаѧ́нїе принестѝ, съ покаѧ́нїемъ же бжⷭ҇твенное причаще́нїе досто́йнѣ прїѧ́ти, ѡ҆ се́мъ па́че молю̀, и҆ такова́гѡ да́ра всеꙋсе́рднѡ жела́ю. Въ стра́шный же ча́съ сме́рти неѿстꙋ́пенъ бꙋ́ди мѝ, бл҃гі́й храни́телю мо́й, прогонѧ́ѧ мра́чныѧ де́моны, и҆мꙋ́щыѧ ᲂу҆страши́ти притре́петнꙋю дꙋ́шꙋ мою̀: защитѝ мѧ̀ ѿ тѣ́хъ ловле́нїѧ, є҆гда̀ и҆́мамъ преходи́ти воздꙋ̑шнаѧ мыта̑рства, да храни́мъ тобо́ю, безбѣ́днѡ дости́гнꙋ раѧ̀ мѝ вожделѣ́ннагѡ, и҆дѣ́же ли́цы ст҃ы́хъ и҆ го́рнихъ си́лъ непреста́ннѡ восхвалѧ́ютъ всечестно́е и҆ великолѣ́пое и҆́мѧ въ трⷪ҇цѣ сла́вимагѡ бг҃а, ѻ҆ц҃а̀ и҆ сн҃а и҆ ст҃а́гѡ дх҃а, є҆мꙋ́же подоба́етъ че́сть и҆ поклоне́нїе во вѣ́ки вѣкѡ́въ. А҆ми́нь.

Ангелы Хранители – это служители нашего спасения, так что мы не одиноки в нашей земной жизни, в наших трудах ради спасения своей бессмертной души. Мы твёрдо знаем, что с нами наши помощники, охраняющие нас от всевозможных бед, встречающихся на жизненном пути, и от заслуженного каждым из нас гнева Божия. Наш Ангел-Хранитель – это бесконечно любящее нас существо. Он любит нас всей полнотой своей любви. А любовь его велика, и действие её сильно, так как, созерцая Бога, он видит вечную Любовь, которая желает нашего спасения.

Наш Ангел Хранитель – это как бы вторая наша мать. Он имеет о нас такое же попечение, и даже большее. Мать проявляет о нас особую заботу, пока мы в младенческом и детском возрасте. Ангел же наш Хранитель с момента нашего крещения и до последних дней жизни является заботливым нашим детоводителем. И, если мы сами не оттолкнём его от себя во время нашей земной жизни, он поведёт нашу душу и на поклонение Богу, когда наступит время разлучиться душе с телом.

Наши Ангелы Хранители могущественны и своими личными доблестями, могущественны и силою, полученною ими от Бога, могущественны и молитвами, которые они воссылают за нас к Всевышнему Богу.

Всё, что есть в нас доброго, чистого, светлого: всякая хорошая мысль, всякое доброе движение сердца, наша молитва, покаяние, добрые дела – всё это в нас рождается и совершается по внушению незримого нашего Ангела Хранителя. Действуя через нашу совесть и наше сердце, это он, наш Ангел, удерживает нас от греха и соблазна, это он помогает нам бороться с искушениями, это он внушает нам страх пред тяжким грехопадением.

Данный нам Ангел Хранитель – это как бы расширенная и раскрытая наша совесть. Он всеми силами стремится спасти нас, и мы не имеем права мешать ему в этом. Мы должны помогать ему в его усилиях спасти нас. Мы должны просить его, чтобы он обогатил наш ум обилием святых мыслей, укрепил в нас навык к благочестивым размышлениям. Мы обязаны любить его как старшего и сильного нашего брата. А на самом деле мы так часто забываем о нём, не молимся ему, грехами своими оскорбляем его святыню, а он вновь и вновь проявляет свою заботу о нас. Он ходатайствует за нас пред милосердием Божиим, он умоляет Бога о наших нуждах, и Отец Небесный никогда не откажет ему в его просьбах.

Но почему Ангелы Божии проявляют такое попечение о людях?

Во-первых, потому что они служители Божии и получили от Бога повеление охранять и спасать людей. Во-вторых, они сами являются творениями Божиими, и к ним так же, как и к людям, относятся слова: Будьте милосерды, как и Отец ваш милосерд ( Лк. 6:36 ). Они понимают это и стараются, подражая своему Творцу и Богу, проявлять и своё милосердие, и своё долготерпение к людям..

Какую радость доставляет им спасать души, которые Христос искупил Своею Кровию и которые (с их помощью) будут вместе с ними разделять их славу и их блаженство!

Если бы мы были хоть немного более чуткими, мы заметили бы, как заботливо наш Ангел Хранитель помогает нам вернуться через покаяние на путь спасения. Он не только побуждает нас к раскаянию, но он и обещает напомнить нам все наши грехи, все жизненные ошибки и оплошности.

Наши Ангелы Хранители, посланники к нам от Бога, беспрепятственно и быстро совершают путь от Бога к нам и от нас к Богу (лишь бы дела наши не мешали этому). Они исходят от Бога к нам, чтобы принести нам Его благодать; они же и восходят от нас к Богу, чтобы передать Ему наши молитвы и благодарения.

Как же близок должен быть каждому из нас наш Ангел Хранитель! Какое доверие мы должны питать к нему! Ему мы при жизни можем поведать самые сокровенные тайны своей души. Те тайны, которые мы не доверили бы самым близким людям. И это потому, что в Ангеле Хранителе мы видим самого мудрого в советах, самого бескорыстного в любви и помощи, нежного в привязанности к нам, попечительного в наших нуждах.