Тропари святым по алфавиту с ударением

На сайт добавлен

Благодарность

Искренне благодарю Татьяну Валерьевну О. за оказанную материальную помощь на развитие сайта.

Видео:Тропарь Святителю Феофану, Затворнику Вышенскому Скачать

Объявления

08 Июль 2014

Внимание!

Уважаемые пользователи, скачать богослужебные книги Вы можете на сайте ДЬЯЧОК , который является приложением к сайту Псаломщик.

ПОИСК ПО САЙТУ

Чтобы быстро найти нужную вам информацию, воспользуйтесь Поиском по сайту Псаломщик находящимся на главной странице.

Видео:Тропарь, кондак и величание Крещению Господню (с текстом и ударениями)Скачать

Тропарион гражданским шрифтом с ударениями и разделителями для пения

Видео:Всем Святым ТропарьСкачать

Содержание

Видео:Тропарь, кондак, величание Николаю Чудотворцу #vpglasСкачать

Тропари и кондаки воскресные

Видео:Тропарь Николаю Чудотворцу (аудио молитва с текстом и иконами)Скачать

Глас 1-й

Ка́мени запеча́тану от иуде́й, / и во́ином стрегу́щим пречи́стое Те́ло Твое́, / воскре́сл еси́ тридне́вный Спа́се, / да́руяй ми́рови жизнь. / Сего́ ра́ди Си́лы Небе́сныя вопия́ху Ти, Жизнода́вче: / сла́ва Воскресе́нию Твоему́, Христе́; / сла́ва Ца́рствию Твоему́; // сла́ва смотре́нию Твоему́, еди́не Человеколю́бче.

Воскре́сл еси́ я́ко Бог из гро́ба во сла́ве, / и мир совоскреси́л еси́; / и естество́ челове́ческое я́ко Бо́га воспева́ет Тя, и смерть исчезе́; / Ада́м же лику́ет, Влады́ко, / Е́ва ны́не от уз избавля́ема ра́дуется, зову́щи: // Ты еси́, И́же всем подая́, Христе́, воскресе́ние.

Видео:Тропарь и кондак Святителю Николаю ЧудотворцуСкачать

Глас 2-й

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: // Жизнода́вче Христе́ Бо́же наш, сла́ва Тебе́.

Воскре́сл еси́ от гро́ба, Всеси́льне Спа́се, / и ад, ви́дев чу́до, ужасе́ся, / и ме́ртвии воста́ша; / тварь же ви́дящи сра́дуется Тебе́, / и Ада́м свесели́тся, // и мир, Спа́се мой, воспева́ет Тя при́сно.

Видео:Тропарь Богоявлению Крещению Господню (аудио молитва с текстом и иконами)Скачать

Глас 3-й

Да веселя́тся Небе́сная, / да ра́дуются земна́я: / я́ко сотвори́ держа́ву / мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть, / из чре́ва а́дова изба́ви нас, // и подаде́ ми́рови ве́лию ми́лость.

Воскре́сл еси́ днесь из гро́ба, Ще́дре, / и нас возве́л еси́ от врат сме́ртных; / днесь Ада́м лику́ет, и ра́дуется Е́ва, / вку́пе же и проро́цы с патриа́рхи воспева́ют непреста́нно // Боже́ственную держа́ву вла́сти Твоея́.

Видео:Тропарь и кондак Дионисию Ареопагиту (с текстом)Скачать

Глас 4-й

Све́тлую Воскресе́ния про́поведь / от А́нгела уве́девша Госпо́дни учени́цы, / и пра́деднее осужде́ние отве́ргша, / апо́столом хва́лящася глаго́лаху: / испрове́ржеся смерть, / воскре́се Христо́с Бог, // да́руяй ми́рови ве́лию ми́лость.

Спас и Изба́витель мой, / из гро́ба я́ко Бог воскреси́ от уз земноро́дныя, / и врата́ а́дова сокруши́, / и я́ко Влады́ка // воскре́се тридне́вен.

Видео:Тропарь Всем святым.Скачать

Глас 5-й

Собезнача́льное Сло́во Отцу́ и Ду́хови, / от Де́вы ро́ждшееся на спасе́ние на́ше, / воспои́м, ве́рнии, и поклони́мся: / я́ко благоволи́ пло́тию взы́ти на Крест, / и смерть претерпе́ти, / и воскреси́ти уме́ршия // сла́вным Воскресе́нием Свои́м.

Ко а́ду, Спа́се мой, соше́л еси́, / и врата́ сокруши́вый я́ко Всеси́лен, / уме́рших я́ко Созда́тель совоскреси́л еси́, / и сме́рти жа́ло сокруши́л еси́, / и Ада́м от кля́твы изба́влен бысть, Человеколю́бче; / те́мже вси зове́м: // спаси́ нас, Го́споди.

Видео:В среду и пятницу Святому Кресту - Тропарь (глас 1), Кондак (глас 4).Скачать

Глас 6-й

А́нгельския Си́лы на гро́бе Твое́м, / и стрегу́щии омертве́ша; / и стоя́ше Мари́я во гро́бе, / и́щущи пречи́стаго Те́ла Твоего́. / Плени́л еси́ ад, не искуси́вся от него́; / сре́тил еси́ Де́ву, Да́руяй живо́т. / Воскресы́й из ме́ртвых, // Го́споди, сла́ва Тебе́.

Живонача́льною дла́нию / уме́ршия от мра́чных удо́лий / Жизнода́вец воскреси́в всех Христо́с Бог, / воскресе́ние подаде́ челове́ческому ро́ду: / есть бо всех Спаси́тель, // Воскресе́ние и Живо́т, и Бог всех.

Видео:тропарь, кондак, величание, Богоявления (крещение господне)Скачать

Глас 7-й

Разруши́л еси́ Кресто́м Твои́м смерть, / отве́рзл еси́ разбо́йнику рай, / мироно́сицам плач преложи́л еси́, / и апо́столом пропове́дати повеле́л еси́: / я́ко воскре́сл еси́, Христе́ Бо́же, // да́руяй ми́рови ве́лию ми́лость.

Не ктому́ держа́ва сме́ртная возмо́жет держа́ти челове́ки: / Христо́с бо сни́де, сокруша́я и разоря́я си́лы ея́; / связу́емь быва́ет ад, / проро́цы согла́сно ра́дуются: / предста́, глаго́люще, Спас су́щим в ве́ре, // изыди́те, ве́рнии, в воскресе́ние.

Видео:Тропарь Святому царю Николаю IIСкачать

Глас 8-й

С высоты́ снизше́л еси́, Благоутро́бне, / погребе́ние прия́л еси́ тридне́вное, / да нас свободи́ши страсте́й, // Животе́ и Воскресе́ние на́ше, Го́споди, сла́ва Тебе́.

Воскре́с из гро́ба, уме́ршия воздви́гл еси́, / и Ада́ма воскреси́л еси́, / и Е́ва лику́ет во Твое́м Воскресе́нии, / и мирсти́и концы́ торжеству́ют / е́же из ме́ртвых воста́нием Твои́м, // Многоми́лостиве.

Видео:#Тропарь Пророку ИлиеСкачать

Тропари и кондаки дневные на всю седмицу 1

Видео:Тропарь Крещению ГосподнюСкачать

В воскресенье вечером и в понедельник утром, Небесным чинам Бесплотным

Тропарь, глас 4-й

Небе́сных во́инств Архистрати́зи, / мо́лим вас при́сно мы недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще нас припа́дающих приле́жно, и вопию́щих: / от бед изба́вите нас, // я́ко чинонача́льницы вы́шних Сил.

Архистрати́зи Бо́жии, / служи́телие Боже́ственныя сла́вы, / А́нгелов нача́льницы, и челове́ков наста́вницы, / поле́зное нам проси́те, / и ве́лию ми́лость, // я́ко Безпло́тных Архистрати́зи.

Видео:В четверг, Святым Апостолам - Тропарь (глас 3), Кондак (глас 2).Скачать

В понедельник вечером и во вторник утром, пророку, Предтече и Крестителю Господню Иоанну

Тропарь, глас 2-й

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра, // и подаю́щаго нам ве́лию ми́лость.

Проро́че Бо́жий, и Предте́че благода́ти, / главу́ твою́, я́ко ши́пок свяще́ннейший, от земли́ обре́тше, / исцеле́ния всегда́ прие́млем: / и́бо па́ки, я́коже пре́жде, // в ми́ре пропове́дуеши покая́ние.

Видео:ТРОПАРЬ И КОНДАК СВЯТЫМ АПОСТОЛАМ | ЧЕТВЕРГСкачать

Во вторник вечером и в среду утром, честному Кресту

Тропарь, глас 1-й

Спаси́, Го́споди, лю́ди Твоя́, / и благослови́ достоя́ние Твое́, / побе́ды правосла́вным христиа́ном на сопроти́вныя да́руя, // и Твое́ сохраня́я Кресто́м Твои́м жи́тельство.

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же; / возвесели́ нас си́лою Твое́ю, / побе́ды дая́ нам на супоста́ты, / посо́бие иму́щим Твое́ ору́жие ми́ра, // непобеди́мую побе́ду.

Видео:Тропарь Святой Блаженной Ксении Петербургской (аудио молитва с текстом и иконами)Скачать

В среду вечером и в четверг утром, апостолам и святителю Николаю

Тропарь апостолам, глас 3-й

Апо́столи святи́и, / моли́те ми́лостиваго Бо́га, / да прегреше́ний оставле́ние // пода́ст душа́м на́шим.

Тропарь святителю Николаю, глас 4-й

Пра́вило ве́ры и о́браз кро́тости, / воздержа́ния учи́теля, / яви́ тя ста́ду твоему́ / Я́же веще́й И́стина; / сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га // спасти́ся душа́м на́шим.

Кондак апостолам, глас 2-й

Тве́рдыя и боговеща́нныя пропове́датели, / верх учени́к Твои́х, Го́споди, / прия́л еси́ в наслажде́ние благи́х Твои́х и поко́й: / боле́зни бо о́нех и смерть прия́л еси́ па́че вся́каго всепло́дия, // еди́не све́дый серде́чная.

Кондак святителю Николаю, глас 3-й

В Ми́рех, свя́те, священноде́йствитель показа́лся еси́: / Христо́во бо, преподо́бне, ева́нгелие испо́лнив, / положи́л еси́ ду́шу твою́ о лю́дех твои́х, / и спасл еси́ непови́нныя от сме́рти, / сего́ ра́ди освяти́лся еси́, // я́ко вели́кий таи́нник Бо́жия благода́ти.

Видео:ТРОПАРЬ И КОНДАК ВСЕМ СВЯТЫМ | СУББОТАСкачать

В четверг вечером и в пятницу утром, честному Кресту

Тропарь, глас 1-й

Спаси́, Го́споди, лю́ди Твоя́, / и благослови́ достоя́ние Твое́, / побе́ды правосла́вным христиа́ном на сопроти́вныя да́руя, // и Твое́ сохраня́я Кресто́м Твои́м жи́тельство.

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же; / возвесели́ нас си́лою Твое́ю, / побе́ды дая́ нам на супоста́ты, / посо́бие иму́щим Твое́ ору́жие ми́ра, // непобеди́мую побе́ду.

Видео:Учимся петь: тропарь и кондак КрещенияСкачать

В пятницу вечером и в субботу утром, всем святым, и за усопших

Тропарь святым, глас 2-й

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́ я́ко Бла́га моли́те // спасти́ся, мо́лимся, душа́м на́шим.

Тропарь за упокой, глас 2-й

Помяни́, Го́споди, я́ко благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты, // моги́й и преста́вленным да́ти поко́й.

Со святы́ми упоко́й, Христе́, ду́ши раб Твои́х, иде́же несть боле́знь, ни печа́ль, ни воздыха́ние, но жизнь безконе́чная.

Мученичен, глас 8-й

Я́ко нача́тки естества́ Насади́телю тва́ри, / вселе́нная прино́сит Ти, Го́споди, богоно́сныя му́ченики; / тех моли́твами в ми́ре глубо́це // Це́рковь Твою́, жи́тельство Твое́, Богоро́дицею соблюди́, Многоми́лостиве.

Видео:Собору Всем Святым ТропарьСкачать

Тропари, кондаки, задостойники и величания дванадесятых праздников и праздника Пасхи

В порядке гражданского года, т. е. с 1 января по новому стилю.

(Даты указаны по старому и новому стилю.)

Рождество Господа Бога и Спаса нашего Иисуса Христа

25 декабря 7 января.

Тропарь, глас 4-й

Рождество́ Твое́, Христе́ Бо́же наш, / возсия́ ми́рови свет ра́зума: / в нем бо звезда́м служа́щии / звездо́ю уча́хуся / Тебе́ кла́нятися, Со́лнцу пра́вды, / и Тебе́ ве́дети с высоты́ Восто́ка. // Го́споди, сла́ва Тебе́.

Де́ва днесь Пресу́щественнаго ражда́ет, / и земля́ верте́п Непристу́пному прино́сит; / А́нгели с па́стырьми славосло́вят, / волсви́ же со звездо́ю путеше́ствуют: // нас бо ра́ди роди́ся Отроча́ мла́до, преве́чный Бог.

Задостойник, глас 1-й

Припев: Велича́й, душе́ моя́, / честне́йшую и сла́внейшую го́рних во́инств, // Де́ву Пречи́стую Богоро́дицу.

Ирмо́с: Люби́ти у́бо нам, / я́ко безбе́дное стра́хом, / удо́бее молча́ние; / любо́вию же, Де́во, / пе́сни тка́ти спротяже́нно сложе́нныя неудо́бно есть; / но и, Ма́ти, си́лу, // ели́ко есть произволе́ние, даждь.

Велича́ем Тя, / Живода́вче Христе́, / нас ра́ди ны́не пло́тию ро́ждшагося / от Безневе́стныя // и Пречи́стыя Де́вы Мари́и.

Крещение Господне. Богоявление

Тропарь, глас 1-й

Во Иорда́не креща́ющуся Тебе́, Го́споди, / Тро́ическое яви́ся поклоне́ние: / Роди́телев бо глас свиде́тельствоваше Тебе́, / возлю́бленнаго Тя Сы́на имену́я, / и Дух в ви́де голуби́не / изве́ствоваше словесе́ утвержде́ние. / Явле́йся, Христе́ Бо́же, // и мир просвеще́й, сла́ва Тебе́.

Яви́лся еси́ днесь вселе́нней, / и свет Твой, Го́споди, зна́менася на нас, / в ра́зуме пою́щих Тя: / прише́л еси́, и яви́лся еси́, // Свет непристу́пный.

Задостойник, глас 2-й

Припев: Велича́й, душе́ моя́, / честне́йшую го́рних во́инств, // Де́ву Пречи́стую Богоро́дицу.

Ирмо́с: Недоуме́ет всяк язы́к благохвали́ти по достоя́нию, / изумева́ет же ум и преми́рный пе́ти Тя, Богоро́дице; / оба́че, Блага́я су́щи, ве́ру приими́, / и́бо любо́вь ве́си боже́ственную на́шу: // Ты бо христиа́н еси́ Предста́тельница, Тя велича́ем.

Велича́ем Тя, / Живода́вче Христе́, / нас ра́ди ны́не пло́тию крести́вшагося / от Иоа́нна // в вода́х Иорда́нских.

Сретение Господа нашего Иисуса Христа

Тропарь, глас 1-й

Ра́дуйся, Благода́тная Богоро́дице Де́во, / из Тебе́ бо возсия́ Со́лнце пра́вды, Христо́с Бог наш, / просвеща́яй су́щия во тьме. / Весели́ся и ты, ста́рче пра́ведный, / прие́мый во объя́тия Свободи́теля душ на́ших, // да́рующаго нам воскресе́ние.

Утро́бу Деви́чу освяти́вый рождество́м Твои́м, / и ру́це Симео́не благослови́вый, / я́коже подоба́ше, предвари́в, / и ны́не спасл еси́ нас, Христе́ Бо́же; / но умири́ во бране́х жи́тельство, // и укрепи́ лю́ди, и́хже возлюби́л еси́, еди́не Человеколю́бче.

Задостойник, глас 3-й

Припев: Богоро́дице Де́во, / упова́ние христиа́ном, // покры́й, соблюди́ и спаси́ на Тя упова́ющих.

Ирмо́с: В зако́не се́ни и писа́ний / о́браз ви́дим, ве́рнии: / всяк му́жеский пол, ложесна́ разверза́я, свят Бо́гу. / Тем Перворожде́нное Сло́во Отца́ Безнача́льна, / Сы́на первородя́щася Ма́терию неискусому́жно, // велича́ем.

Велича́ем Тя, / Живода́вче Христе́, / и чтим Пречи́стую Ма́терь Твою́, / Е́юже по зако́ну ны́не // прине́слся еси́ в храм Госпо́день.

Благовещение Пресвятой Богородицы

25 марта 7 апреля.

Тропарь, глас 4-й

Днесь спасе́ния на́шего глави́зна, / и е́же от ве́ка та́инства явле́ние: // Сын Бо́жий, Сын Де́вы быва́ет, / и Гаврии́л благода́ть благовеству́ет. / Те́мже и мы с ним Богоро́дице возопии́м: / ра́дуйся, Благода́тная, // Госпо́дь с Тобо́ю.

Взбра́нной Воево́де победи́тельная, / я́ко изба́вльшеся от злых, / благода́рственная воспису́ем Ти раби́ Твои́, Богоро́дице; / но я́ко иму́щая держа́ву непобеди́мую, / от вся́ких нас бед свободи́, да зове́м Ти: // ра́дуйся, Неве́сто Неневе́стная.

Задостойник, глас 4-й

Припев: Благовеству́й, земле́, ра́дость ве́лию, // хвали́те, Небеса́, Бо́жию сла́ву.

Ирмо́с: Я́ко одушевле́нному Бо́жию киво́ту, / да ника́коже ко́снется рука́ скве́рных; / устне́ же ве́рных Богоро́дице немо́лчно, / глас А́нгела воспева́юще, с ра́достию да вопию́т: // ра́дуйся, Благода́тная, Госпо́дь с Тобо́ю.

Арха́нгельский глас вопие́м Ти, Чи́стая: / ра́дуйся, Благода́тная, // Госпо́дь с Тобо́ю.

Вход Господень в Иерусалим. Вербное воскресенье

Воскресенье за неделю до Пасхи.

Тропарь, глас 1-й

О́бщее воскресе́ние пре́жде Твоея́ Стра́сти уверя́я, / из ме́ртвых воздви́гл еси́ Ла́заря, Христе́ Бо́же. / Те́мже и мы, я́ко о́троцы, побе́ды зна́мения нося́ще, / Тебе́ Победи́телю сме́рти вопие́м: / оса́нна в вы́шних, // благослове́н Гряды́й во и́мя Госпо́дне.

Другой тропарь, глас 4-й

Спогре́бшеся Тебе́ креще́нием, Христе́ Бо́же наш, / безсме́ртныя жи́зни сподо́бихомся Воскресе́нием Твои́м, / и воспева́юще зове́м: / оса́нна в вы́шних, // благослове́н Гряды́й во и́мя Госпо́дне.

На Престо́ле на Небеси́, / на жребя́ти на земли́ носи́мый, Христе́ Бо́же, / А́нгелов хвале́ние и дете́й воспева́ние / прия́л еси́, зову́щих Ти: / благослове́н еси́ // Гряды́й Ада́ма воззва́ти.

Задостойник, глас 4-й

Ирмо́с: Бог Госпо́дь, и яви́ся нам, / соста́вите пра́здник, / и веселя́щеся прииди́те, возвели́чим Христа́, / с ва́иями и ве́твьми, пе́сньми зову́ще: // благослове́н Гряды́й во и́мя Го́спода Спа́са на́шего.

Велича́ем Тя, / Живода́вче Христе́, / оса́нна в вы́шних, и мы Тебе́ вопие́м: / благослове́н Гряды́й // во и́мя Госпо́дне.

Светлое Христово Воскресение. ПАСХА

Тропарь, глас 5-й

Христо́с воскре́се из ме́ртвых, / сме́ртию смерть попра́в, // и су́щим во гробе́х живо́т дарова́в.

А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́ я́ко Победи́тель, Христе́ Бо́же, / жена́м мироно́сицам веща́вый: ра́дуйтеся! / и Твои́м апо́столом мир да́руяй, // па́дшим подая́й воскресе́ние.

Задостойник, глас 1-й

Припев: А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се тридне́вен от гро́ба, / и ме́ртвыя воздви́гнувый; // лю́дие, весели́теся!

Ирмо́с: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, // о воста́нии Рождества́ Твоего́.

Величание в неделю Антипасхи

Велича́ем Тя, / Живода́вче Христе́, / нас ра́ди во ад сше́дшаго, // и с собо́ю вся воскреси́вшаго.

Вознесение Господа нашего Иисуса Христа

Четверг, 40-й день по Пасхе.

Тропарь, глас 4-й

Возне́слся еси́ во сла́ве, Христе́ Бо́же наш, / ра́дость сотвори́вый ученико́м / обетова́нием Свята́го Ду́ха, / извеще́нным им бы́вшим благослове́нием, // я́ко Ты еси́ Сын Бо́жий, Изба́витель ми́ра.

Е́же о нас испо́лнив смотре́ние, / и я́же на земли́ соедини́в Небе́сным, / возне́слся еси́ во сла́ве, Христе́ Бо́же наш, / ника́коже отлуча́яся, но пребыва́я неотсту́пный, / и вопия́ лю́бящим Тя: // Аз есмь с ва́ми, и никто́же на вы.

Задостойник, глас 5-й

Припев: Велича́й, душе́ моя́, / возне́сшагося от земли́ на Не́бо // Христа́ Жизнода́вца.

Ирмо́с: Тя па́че ума́ и словесе́ Ма́терь Бо́жию, / в ле́то Безле́тнаго неизрече́нно Ро́ждшую, // ве́рнии единому́дренно велича́ем.

Велича́ем Тя, / Живода́вче Христе́, / и почита́ем е́же на Небеса́ / с пречи́стою Твое́ю Пло́тию // Боже́ственное вознесе́ние.

Пятидесятница. День Святой Троицы

Воскресенье, 50-й день по Пасхе.

Тропарь, глас 8-й

Благослове́н еси́, Христе́ Бо́же наш, / И́же прему́дры ловцы́ явле́й, / низпосла́в им Ду́ха Свята́го, / и те́ми уловле́й вселе́нную, // Человеколю́бче, сла́ва Тебе́.

Егда́ снизше́д язы́ки слия́, разделя́ше язы́ки Вы́шний; / егда́ же о́гненныя язы́ки раздая́ше, в соедине́ние вся призва́; // и согла́сно сла́вим Всесвята́го Ду́ха.

Задостойник, глас 4-й

Припев: Апо́столи соше́ствие Уте́шителя зря́ще, удиви́шася, // ка́ко в ви́де о́гненных язы́к яви́ся Дух Святы́й. 2

Ирмо́с: Ра́дуйся, Цари́це, / Матероде́вственная сла́во: / вся́ка бо удобообраща́тельная благоглаго́ливая уста́ вети́йствовати не мо́гут / Тебе́ пе́ти досто́йно; / низумева́ет же ум всяк Твое́ Рождество́ разуме́ти. // Те́мже Тя согла́сно сла́вим.

Велича́ем Тя, / Живода́вче Христе́, / и чтим Всесвята́го Ду́ха Твоего́, / Его́же от Отца́ посла́л еси́ // боже́ственным ученико́м Твои́м.

Преображение Господа нашего Иисуса Христа

Тропарь, глас 7-й

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, я́коже можа́ху; / да возсия́ет и нам гре́шным свет Твой присносу́щный, // моли́твами Богоро́дицы; Светода́вче, сла́ва Тебе́.

На горе́ преобрази́лся еси́, / и я́коже вмеща́ху ученицы́ Твои́, сла́ву Твою́, Христе́ Бо́же, ви́деша: / да егда́ Тя у́зрят распина́ема, / страда́ние у́бо уразуме́ют во́льное, / ми́рови же пропове́дят, // я́ко Ты еси́ вои́стинну О́тчее сия́ние.

Задостойник, глас 4-й

Припев: Велича́й, душе́ моя́, // на Фаво́ре преобрази́вшагося Го́спода.

Ирмо́с: Рождество́ Твое́ нетле́нно яви́ся: / Бог из боку́ Твое́ю про́йде, / я́ко Плотоно́сец яви́ся на земли́, / и с челове́ки поживе́. // Тя, Богоро́дице, тем вси велича́ем.

Велича́ем Тя, / Живода́вче Христе́, / и почита́ем пречи́стыя Пло́ти Твоея́ // пресла́вное преображе́ние.

Успение Пресвятой Богородицы

Тропарь, глас 1-й

В рождестве́ де́вство сохрани́ла еси́, / во успе́нии ми́ра не оста́вила еси́, Богоро́дице, / преста́вилася еси́ к животу́, Ма́ти су́щи Живота́, // и моли́твами Твои́ми избавля́еши от сме́рти ду́ши на́ша.

В моли́твах неусыпа́ющую Богоро́дицу, / и в предста́тельствах непрело́жное упова́ние, / гроб и умерщвле́ние не удержа́ста: / я́коже бо Живота́ Ма́терь, / к животу́ преста́ви // во утро́бу Всели́выйся присноде́вственную.

Задостойник, глас 1-й

Припев: А́нгели, успе́ние Пречи́стыя ви́девше, удиви́шася, // ка́ко Де́ва восхо́дит от земли́ на Не́бо.

Ирмо́с: Побежда́ются естества́ уста́вы / в Тебе́, Де́во Чи́стая, / де́вствует бо рождество́, и живо́т предобруча́ет смерть; / По рождестве́ Де́ва, и по сме́рти жива́, / спаса́еши при́сно, // Богоро́дице, насле́дие Твое́.

Велича́ем Тя, / Пренепоро́чная Ма́ти / Христа́ Бо́га на́шего, / и всесла́вное сла́вим // успе́ние Твое́.

Рождество Пресвятой Богородицы

Тропарь, глас 4-й

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце пра́вды, Христо́с Бог наш, / и разруши́в кля́тву, даде́ благослове́ние, // и упраздни́в смерть, дарова́ нам живо́т ве́чный.

Иоаки́м и А́нна поноше́ния безча́дства, / и Ада́м и Е́ва от тли сме́ртныя свободи́стася, Пречи́стая, / во святе́м рождестве́ Твое́м. / То́ пра́зднуют и лю́дие Твои́, / вины́ прегреше́ний изба́вльшеся, / внегда́ зва́ти Ти: // непло́ды ражда́ет Богоро́дицу, и Пита́тельницу жи́зни на́шея.

Задостойник, глас 8-й

Припев: Велича́й, душе́ моя́, / пресла́вное рождество́ Бо́жия Ма́тере.

Ирмо́с: Чу́жде ма́терем де́вство, / и стра́нно де́вам деторожде́ние: / на Тебе́, Богоро́дице, обоя́ устро́ишася. // Тем Тя, вся племена́ земна́я, непреста́нно велича́ем.

Велича́ем Тя, / Пресвята́я Де́во, / и чтим святы́х Твои́х роди́телей, / и всесла́вное сла́вим // рождество́ Твое́.

Воздви́жение Честно́го и Животворящего Креста

Тропарь, глас 1-й

Спаси́, Го́споди, лю́ди Твоя́, / и благослови́ достоя́ние Твое́, / побе́ды правосла́вным христиа́ном на сопроти́вныя да́руя, // и Твое́ сохраня́я Кресто́м Твои́м жи́тельство.

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же; / возвесели́ нас си́лою Твое́ю, / побе́ды дая́ нам на супоста́ты, / посо́бие иму́щим Твое́ ору́жие ми́ра, // непобеди́мую побе́ду.

Задостойник, глас 8-й

Припев: Велича́й, душе́ моя́, // пречестны́й Крест Госпо́днь.

Ирмо́с: Та́ин еси́, Богоро́дице, рай, / невозде́ланно возрасти́вший Христа́, / И́мже Кре́стное живоно́сное на земли́ насади́ся Дре́во; / тем ны́не возноси́му, // покланя́ющеся ему́, Тя велича́ем.

Велича́ем Тя, / Живода́вче Христе́, / и чтим Крест Твой святы́й, / и́мже нас спасл еси́ // от рабо́ты вра́жия.

Введение во храм Пресвятой Богородицы

21 ноября 4 декабря.

Тропарь, глас 4-й

Днесь благоволе́ния Бо́жия предображе́ние, / и челове́ков спасе́ния пропове́дание: / в хра́ме Бо́жии я́сно Де́ва явля́ется, / и Христа́ всем предвозвеща́ет. / Той и мы велегла́сно возопии́м: / ра́дуйся, // смотре́ния Зижди́телева исполне́ние.

Пречи́стый храм Спа́сов, / многоце́нный черто́г и Де́ва, / свяще́нное сокро́вище сла́вы Бо́жия, / днесь вво́дится в дом Госпо́день, / благода́ть совводя́щи, я́же в Ду́се Боже́ственном, / Ю́же воспева́ют А́нгели Бо́жии: // Сия́ есть селе́ние Небе́сное.

Задостойник, глас 4-й

Припев: А́нгели, вхожде́ние Пречи́стыя зря́ще, удиви́шася, // ка́ко Де́ва вни́де во свята́я святы́х.

Ирмо́с: Я́ко одушевле́нному Бо́жию киво́ту, / да ника́коже ко́снется рука́ скве́рных; / Устне́ же ве́рных Богоро́дице немо́лчно / глас А́нгела воспева́юще, с ра́достию да вопию́т: // и́стинно вы́шши всех еси́, Де́во Чи́стая.

Велича́ем Тя, / Пресвята́я Де́во, / Богоизбра́нная Отрокови́це, / и чтим е́же в храм Госпо́день // вхожде́ние Твое́.

Тропари, кондаки, молитвы и величания избранные

(Даты указаны по старому и новому стилю.)

Господу Богу и Спасу нашему Иисусу Христу

Начало Индикта. Церковное новолетие

Тропарь, глас 2-й

Всея́ тва́ри Соде́телю, / времена́ и ле́та во Свое́й вла́сти положи́вый, / благослови́ вене́ц ле́та бла́гости Твоея́, Го́споди, / сохраня́я в ми́ре лю́ди и град Твой, // моли́твами Богоро́дицы, и спаси́ ны.

В Вы́шних живы́й, Христе́ Царю́, / всех ви́димых и неви́димых Тво́рче и Зижди́телю, / И́же дни и но́щи, времена́ и ле́та сотвори́вый, / благослови́ ны́не вене́ц ле́та, / соблюди́ и сохрани́ в ми́ре град и лю́ди Твоя́, // Многоми́лостиве.

Нерукотворенного Образа Господа Иисуса Христа

Тропарь, глас 2-й

Пречи́стому Твоему́ о́бразу покланя́емся, Благи́й, / прося́ще проще́ния прегреше́ний на́ших, Христе́ Бо́же: / во́лею бо благоволи́л еси́ пло́тию взы́ти на Крест, / да изба́виши я́же созда́л еси́ от рабо́ты вра́жия. / Тем благода́рственно вопие́м Ти: / ра́дости испо́лнил еси́ вся, Спа́се наш, // прише́дый спасти́ мир.

Неизрече́ннаго и Боже́ственнаго Твоего́ к челове́ком смотре́ния, / неопи́санное Сло́во О́тчее, / и о́браз непи́санный, и богопи́санный победи́телен, / ве́дуще нело́жнаго Твоего́ воплоще́ния, // почита́ем того́ лобыза́юще.

Велича́ем Тя, / Живода́вче Христе́, / и почита́ем пречи́стаго лица́ Твоего́ // пресла́вное воображе́ние.

Велича́ем Тя, / Живода́вче Христе́, / и чтим о́браз Твой святы́й, / и́мже нас спасл еси́ // от рабо́ты вра́жия.

Обрезание Господне

Тропарь, глас 1-й

На Престо́ле огнезра́чнем / в Вы́шних седя́й со Отце́м Безнача́льным и Боже́ственным Твои́м Ду́хом, / благоволи́л еси́ роди́тися на земли́ / от Отрокови́цы Неискусому́жныя Твоея́ Ма́тере, Иису́се: / сего́ ра́ди и обре́зан был еси́, я́ко челове́к осмодне́вный. / Сла́ва всеблаго́му Твоему́ сове́ту, / сла́ва смотре́нию Твоему́, // сла́ва снизхоже́нию Твоему́, еди́не Человеколю́бче.

Всех Госпо́дь обре́зание терпи́т, / и челове́ческая прегреше́ния я́ко Благ обре́зует, / дае́т спасе́ние днесь ми́ру. / Ра́дуется же в Вы́шних и Созда́телев иера́рх // и светоно́сный боже́ственный таи́нник Христо́в Васи́лий.

Велича́ем Тя, / Живода́вче Христе́, / и почита́ем пречи́стыя пло́ти Твоея́ // зако́нное обре́зание.

Пресвятой Владычице нашей Богородице и Приснодеве Марии

Досто́йно есть велича́ти Тя, Богоро́дице, честне́йшую Херуви́м, и сла́внейшую без сравне́ния Серафи́м.

Величание Божией Матери во все праздники в честь Ее икон

Велича́ем Тя, / Пресвята́я Де́во, / Богоизбра́нная Отрокови́це, / и чтим о́браз Твой святы́й, / и́мже то́чиши исцеле́ния // всем с ве́рою притека́ющим.

Пред Владимирской иконой Божией Матери

21 мая / 3 июня, 23 июня / 6 июля и 26 августа / 8 сентября.

Тропарь, глас 4-й

Днесь све́тло красу́ется сла́внейший град Москва́, / я́ко зарю́ со́лнечную восприе́мши, Влады́чице, чудотво́рную Твою́ ико́ну, / к не́йже ны́не мы притека́юще, / и моля́щеся Тебе́, взыва́ем си́це: / о пречу́дная Влады́чице Богоро́дице! / моли́ся из Тебе́ воплоще́нному Христу́ Бо́гу на́шему, / да изба́вит град сей, / и вся гра́ды и страны́ христиа́нския невреди́мы от всех наве́т вра́жиих, // и спасе́т ду́ши на́ша, я́ко Милосе́рд.

Взбра́нной Воево́де победи́тельная, / я́ко изба́вльшеся от злых прише́ствием Твоего́ честна́го о́браза, / Влады́чице Богоро́дице, / све́тло сотворя́ем празднество́ сре́тения Твоего́, / и обы́чно зове́м Ти: // ра́дуйся, Неве́сто Неневе́стная.

Пред иконой Божией Матери «Всех скорбящих Радость»

24 октября / 6 ноября.

Тропарь, глас 4-й

К Богоро́дице приле́жно ны́не притеце́м, / гре́шнии и смире́ннии, / и припаде́м, в покая́нии зову́ще из глубины́ души́: / Влады́чице, помози́, на ны́ милосе́рдовавши, / потщи́ся, погиба́ем от мно́жества прегреше́ний, / не отврати́ Твоя́ рабы́ тщи: // Тя́ бо и еди́ну наде́жду и́мамы.

Другой тропарь, глас 4-й

Не умолчи́м никогда́, Богоро́дице, / си́лы Твоя́ глаго́лати недосто́йнии: / а́ще бо Ты не бы́ предстоя́ла моля́щи, / кто бы нас изба́вил от толи́ких бед, / кто же бы сохрани́л доны́не свобо́дны? / Не отсту́пим, Влады́чице, от Тебе ́: // Твоя́ бо рабы́ спаса́еши при́сно от вся́ких лю́тых.

Стихира, глас 2-й, которая поется на молебне вместо тропаря

Всех скорбя́щих Ра́досте, / и оби́димых Засту́пнице, / и а́лчущих Пита́тельнице, / стра́нных утеше́ние, / обурева́емых приста́нище, / больны́х посеще́ние, / немощны́х покро́ве и Засту́пнице, / же́зле ста́рости, / Ма́ти Бо́га Вы́шняго Ты еси́, Пречи́стая: // потщи́ся, мо́лимся, спасти́ся рабо́м Твои́м.

Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице: / Ты нам помози́, / на Тебе́ наде́емся, / и Тобо́ю хва́лимся: // Твои́ бо есмы́ раби́, да не постыди́мся.

Пред иконой Божией Матери «Державная»

Тропа́рь, глас 4-й

Гра́да Сио́нска взыску́юще, / под Твой покро́в, Де́во Чи́стая, днесь притека́ем, / и никто́же возмо́жет на ны́, / я́ко несть град си́лен, а́ще не Су́щаго Бо́га, // и несть и́на кре́пость, а́ще не ми́лость Влады́чицы Де́вы.

Взбра́нной Воево́де победи́тельныя пе́сни прино́сим, / я́ко дарова́ся нам держа́ва Твоя́, / и ничесо́же устраши́мся, / не от ми́ра бо спасе́ние на́ше, / но превознесе́нныя Влады́чицы милосе́рдием огражда́емся, / и тому́ днесь ра́дуемся, / я́ко прии́де Засту́пница // на стра́жу земли́ Своея́.

Велича́ем Тя, / Пресвята́я Де́во, / Богоизбра́нная Отрокови́це, / и чтим Держа́вный о́браз святы́ни Твоея́, / и́мже подае́ши ве́лию ми́лость // всем с ве́рою к нему́ притека́ющим.

Пред иконой Божией Матери «Живоносный источник»

В пятницу Светлой седмицы.

Тропарь, глас 4-й

Почерпе́м, челове́цы, / цельбы́ душа́м и телесе́м моли́твою: / Река́ бо всем предтече́т, / Пречи́стая Цари́ца Богоро́дица, / источа́ющи нам чу́дную во́ду, / и измыва́ющи серде́ц че́рности, / грехо́вныя стру́пы очища́ющи, / ду́ши же освяща́ющи ве́рных // Боже́ственною благода́тию.

Другой тропарь, глас 4-й

Днесь притеце́м, ве́рнии, / к Боже́ственному и цельбоно́сному о́бразу Пресвяты́я Богоро́дицы, / излия́вшия ка́пли Свои́х излия́ний, / и лю́дем ве́рным чудеса́ показа́вшия, / я́же мы ви́дяще и слы́шаще, / духо́вно пра́зднуем, и любе́зно вопие́м: / исцели́ на́ши неду́ги и стра́сти, / я́коже и карки́нския и тмочи́сленныя стра́сти исцели́ла еси́. / Те́мже мо́лим Тя, Де́во Пречи́стая: / моли́ воплоще́ннаго из Тебе́ Христа́ Бо́га на́шего // спасти́ся душа́м на́шим.

От неистощи́мыя Ты Исто́чниче Богоблагода́тный, подае́ши ми, / точа́щи во́ды Твоея́ благода́ти, приснотеку́щий па́че сло́ва: / я́ко бо Сло́во ро́ждшая па́че смы́сла, / молю́ Ти ся, ороси́ мя благода́тию, / да зову́ Ти: // ра́дуйся, Водо́ спаси́тельная.

Пред иконой Божией Матери «Знамение»

27 ноября / 10 декабря.

Тропарь, глас 4-й

Я́ко необори́мую сте́ну / и исто́чник чуде́с / стяжа́вше Тя раби́ Твои́, Богоро́дице Пречи́стая, / сопроти́вных ополче́ния низлага́ем. / Те́мже мо́лим Тя: / мир гра́ду Твоему́ да́руй, // и душа́м на́шим ве́лию ми́лость.

Честна́го о́браза Твоего́ зна́мение / пра́зднующе лю́дие Твои́, Богороди́тельнице, / и́мже ди́вную побе́ду на сопроти́вныя гра́ду Твоему́ дарова́ла еси́. / Те́мже Тебе́ ве́рою взыва́ем: // ра́дуйся, Де́во, христиа́н похвало́.

Пред Иверской иконой Божией Матери

12/25 февраля, 13/26 октября и во вторник Светлой седмицы.

Тропарь, глас 1-й

От святы́я ико́ны Твоея́, / о Влады́чице Богоро́дице, / исцеле́ния и цельбы́ подаю́тся оби́льно, / с ве́рою и любо́вию приходя́щим к ней: / та́ко и мою́ не́мощь посети́, / и ду́шу мою́ поми́луй, Блага́я, // и те́ло исцели́ благода́тию Твое́ю, Пречи́стая.

А́ще и в мо́ре вве́ржена бысть свята́я ико́на Твоя́, Богоро́дице, / от вдови́цы, не могу́щия спасти́ сию́ от враго́в, / но яви́лася есть Храни́тельница Афо́на / и Врата́рница оби́тели И́верския, / враги́ устраша́ющая, / и в Правосла́вней Росси́йстей стране́ // чту́щия Тя от всех бед и напа́стей избавля́ющая.

Пред Казанской иконой Божией Матери

8/21 июля и 22 октября / 4 ноября.

Тропарь, глас 4-й

Засту́пнице усе́рдная, / Ма́ти Го́спода Вы́шняго, / за всех мо́лиши Сы́на Твоего́, Христа́ Бо́га на́шего, / и всем твори́ши спасти́ся, в держа́вный Твой покро́в прибега́ющим. / Всех нас заступи́, о Госпоже́, Цари́це и Влады́чице, / и́же в напа́стех, и ско́рбех, и в боле́знех, обремене́нных грехи́ мно́гими, / предстоя́щих и моля́щихся Тебе́ умиле́нною душе́ю, и сокруше́нным се́рдцем, / пред Пречи́стым Твои́м о́бразом со слеза́ми, / и невозвра́тно наде́жду иму́щих на Тя, / избавле́ния всех зол. / Всем поле́зная да́руй, / и вся спаси́, Богоро́дице Де́во: // Ты́ бо еси́ Боже́ственный покро́в рабо́м Твои́м.

Притеце́м, лю́дие, к ти́хому сему́ и до́брому приста́нищу, / ско́рой Помо́щнице, гото́вому и те́плому спасе́нию, покро́ву Де́вы. / Ускори́м на моли́тву, и потщи́мся на покая́ние: / источа́ет бо нам неоску́дныя ми́лости Пречи́стая Богоро́дица, / предваря́ет на по́мощь, и избавля́ет от вели́ких бед и зол // благонра́вныя и богобоя́щияся рабы́ Своя́.

Покров Пресвятой Богородицы

Тропарь, глас 4-й

Днесь, благове́рнии лю́дие, све́тло пра́зднуем, / осеня́еми Твои́м, Богома́ти, прише́ствием, / и к Твоему́ взира́юще пречи́стому о́бразу, уми́льно глаго́лем: / покры́й нас честны́м Твои́м Покро́вом, / и изба́ви нас от вся́каго зла, / моля́щи Сы́на Твоего́, Христа́ Бо́га на́шего, // спасти́ ду́ши на́ша.

Де́ва днесь предстои́т в це́ркви, / и с ли́ки святы́х неви́димо за ны́ мо́лится Бо́гу, / А́нгели со архиере́и покланя́ются, / апо́столи же со проро́ки ликовству́ют: // нас бо ра́ди мо́лит Богоро́дица Преве́чнаго Бо́га.

Велича́ем Тя, / Пресвята́я Де́во, / и чтим Покро́в Твой святы́й, / Тя́ бо ви́де святы́й Андре́й на возду́се, // за ны́ Христу́ моля́щуюся.

Пред Почаевской иконой Божией Матери

23 июля / 1 августа.

Тропарь, глас 5-й

Пред свято́ю Твое́ю ико́ною, Влады́чице, / моля́щиися исцеле́ний сподобля́ются, / ве́ры и́стинныя позна́ние прие́млют, / и ага́рянская наше́ствия отража́ют. / Те́мже и нам, к Тебе́ припа́дающим, / грехо́в оставле́ние испроси́, / по́мыслы благоче́стия сердца́ на́ша просвети́, / и к Сы́ну Твоему́ моли́тву вознеси́ // о спасе́нии душ на́ших.

Исто́чник исцеле́ний и ве́ры правосла́вныя утвержде́ние / Поча́евская Твоя́ ико́на, Богоро́дице, яви́ся, / те́мже и нас, к ней притека́ющих, / от бед и искуше́ний свободи́, / ла́вру Твою́ невреди́му сохрани́, / Правосла́вие во о́крест стоя́щих страна́х утверди́, / и грехи́ разреши́ моли́твенник Твои́х: // ели́ка бо хо́щеши, мо́жеши.

Велича́ем Тя, / Пресвята́я Де́во, / и почита́ем честну́ю ико́ну Твою́, / ю́же от лет дре́вних // на горе́ Поча́евстей просла́вила еси́.

Пред иконой Божией Матери «Скоропослушница»

Тропа́рь, глас 4:

К Богоро́дице притеце́м, су́щии в беда́х, / и ко святе́й ико́не Ея́ ны́не припаде́м, / с ве́рою зову́ще из глубины́ души́: / ско́ро на́ше услы́ши моле́ние, Де́во, я́ко Скоропослу́шница наре́кшаяся. // Тебе́ бо раби́ Твои́ в ну́ждах гото́вую Помо́щницу и́мамы.

В мо́ри жите́йстем обурева́емии, / треволне́нию подпа́даем страсте́й и искуше́ний. / Пода́ждь у́бо нам, Госпоже́, ру́ку по́мощи, / я́коже Петро́ви Сын Твой, / и ускори́ от бед изба́вити ны, да зове́м Ти: // ра́дуйся, всеблага́я Скоропослу́шнице.

Пред Смоленской иконой Божией Матери

28 июля / 10 августа.

Тропарь, глас 4-й

К Богоро́дице приле́жно ны́не притеце́м, / гре́шнии и смире́ннии, / и припаде́м, в покая́нии зову́ще из глубины́ души́: / Влады́чице, помози́, на ны́ милосе́рдовавши, / потщи́ся, погиба́ем от мно́жества прегреше́ний, / не отврати́ Твоя́ рабы́ тщи: // Тя́ бо и еди́ну наде́жду и́мамы.

Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице: / Ты нам помози́, / на Тебе́ наде́емся, / и Тобо́ю хва́лимся: // Твои́ бо есмы́ раби́, да не постыди́мся.

Пред иконой Божией Матери «Утоли моя печали»

25 января / 7 февраля.

Тропарь, глас 5-й

Утоли́ боле́зни / многовоздыха́ющия души́ моея́, / утоли́вшая вся́ку сле́зу от лица́ земли́: / Ты́ бо челове́ком боле́зни отго́ниши, / и гре́шных ско́рби разруша́еши, / Тебе́ бо вси стяжа́хом наде́жду и утвержде́ние, // Пресвята́я Ма́ти Де́во.

Не вве́ри мя челове́ческому предста́тельству, Пресвята́я Влады́чице, / но приими́ моле́ние раба́ Твоего́: / скорбь бо обдержи́т мя, / терпе́ти не могу́ де́монскаго стреля́ния, / покро́ва не и́мам, / ниже́ где прибе́гну, окая́нный, всегда́ побежда́емь, / и утеше́ния не и́мам, ра́зве Тебе́, Влады́чице ми́ра, / упова́ние и предста́тельство ве́рных: / не пре́зри моле́ние мое́, // поле́зно сотвори́.

Святому благоверному князю Александру Невскому

30 августа / 12 сентября и 23 ноября / 6 декабря.

Тропарь, глас 4-й

Я́ко благочести́ваго ко́рене / пречестна́я о́трасль был еси́, блаже́нне Алекса́ндре: / яви́ бо тя Христо́с, / я́ко не́кое боже́ственное сокро́вище Росси́йстей земли́, / но́ваго чудотво́рца, / пресла́вна и богоприя́тна. / И днесь соше́дшеся в па́мять твою́ / ве́рою и любо́вию, / во псалме́х и пе́ниих, ра́дующеся, сла́вим Го́спода, / да́вшаго тебе́ благода́ть исцеле́ний, / Его́же моли́ спасти́ град сей, / и стране́ на́шей богоуго́дней бы́ти, // и сыново́м Росси́йским спасти́ся.

Другой тропарь, глас 4-й

Позна́й свою́ бра́тию, росси́йский Ио́сифе, / не в Еги́пте, но на Небеси́ ца́рствующий, / благове́рный кня́же Алекса́ндре, / и приими́ моле́ния их, / умножа́я жи́та лю́дем плодоно́сием земли́ твоея́, / гра́ды влады́чествия твоего́ огражда́я моле́нием, // и правосла́вным христиа́ном на сопроти́вныя спобо́рствуя.

Я́ко звезду́ тя пресве́тлу почита́ем, / от восто́ка возсия́вшую и на за́пад прише́дшую: / всю бо страну́ сию́ чудесы́ и добро́тою обогаща́еши, / и просвеща́еши ве́рою чту́щия па́мять твою́, Алекса́ндре блаже́нне. / Сего́ ра́ди днесь пра́зднуем твое́ успе́ние, / лю́дие твои́ су́щии: / моли́ спасти́ Оте́чество твое́, / и вся притека́ющия к ра́це моще́й твои́х, / и ве́рно вопию́щия ти: // ра́дуйся, гра́ду на́шему утвержде́ние.

Другой кондак, глас 4-й

Я́коже сро́дницы твои́ Бори́с и Глеб / яви́шася тебе́ с Небесе́ в по́мощь, / подвиза́ющемуся на Ве́лгера Све́йскаго и во́ев его́, / та́ко и ты ны́не, / блаже́нне Алекса́ндре, / прииди́ в по́мощь твои́м сро́дником, // и побори́ борю́щия ны.

Велича́ем тя, / святы́й благове́рный кня́же Алекса́ндре, / и чтим святу́ю па́мять твою́, / ты́ бо мо́лиши о нас // Христа́ Бо́га на́шего.

Преподобному Амвросию Оптинскому

10/23 октября и 27 июня / 10 июля.

Тропарь, глас 5-й

Я́ко к целе́бному исто́чнику, / притека́ем к тебе́, Амвро́сие о́тче наш, / ты́ бо на путь спасе́ния нас ве́рно наставля́еши, / моли́твами от бед и напа́стей охраня́еши, / в теле́сных и душе́вных ско́рбех утеша́еши, / па́че же смире́нию, терпе́нию и любви́ науча́еши: / моли́ Человеколю́бца Христа́ / и Засту́пницу усе́рдную // спасти́ся душа́м на́шим.

Заве́т Пастыренача́льника испо́лнив, / ста́рчества благода́ть насле́довал еси́, / боле́знуя се́рдцем о всех, с ве́рою притека́ющих к тебе́. / Те́мже и мы, ча́да твоя́, / с любо́вию вопие́м ти: / о́тче святы́й Амвро́сие, / моли́ Христа́ Бо́га // спасти́ся душа́м на́шим.

Ублажа́ем тя, / преподо́бне о́тче Амвро́сие, / и чтим святу́ю па́мять твою́, / наста́вниче мона́хов, // и собесе́дниче А́нгелов.

Апостолу Андрею Первозванному

30 ноября / 13 декабря.

Тропарь, глас 4-й

Я́ко апо́столов первозва́нный, / и верхо́внаго су́щий брат, / Влады́це всех, Андре́е, моли́ся, / мир вселе́нней дарова́ти, // и душа́м на́шим ве́лию ми́лость.

Му́жества тезоимени́таго богоглаго́льника, / и Це́ркве возсле́дователя верхо́внаго, / Петро́ва сро́дника восхва́лим, / зане́ я́коже дре́вле сему́, / и ны́не нам воззва́: // прииди́те, обрето́хом Жела́емаго.

Велича́ем тя, / апо́столе Христо́в Андре́е, / и чтим боле́зни и труды́ твоя́, / и́миже труди́лся еси́ // во благове́стии Христо́ве.

Святителям Василию Великому, Григорию Богослову и Иоанну Златоустому

30 января / 12 февраля.

Тропарь, глас 4-й

Я́ко апо́столов единонра́внии, / и вселе́нныя учи́телие, / Влады́ку всех моли́те, / мир вселе́нней дарова́ти, // и душа́м на́шим ве́лию ми́лость.

Свяще́нныя и боговеща́нныя пропове́дники, / верх учи́телей, Го́споди, / прия́л еси́ в наслажде́ние благи́х Твои́х и упокое́ние: / труды́ бо о́нех и смерть прия́л еси́ па́че вся́каго всепло́дия, // Еди́не прославля́яй святы́я Твоя́.

Велича́ем вас, / святи́тели Христо́вы Васи́лие, Григо́рие и Иоа́нне, / и чтим святу́ю па́мять ва́шу, / вы́ бо мо́лите о нас // Христа́ Бо́га на́шего.

Святому равноапостольному князю Владимиру

Тропарь, глас 4-й

Уподо́бился еси́ купцу́, и́щущему до́браго би́сера, / славнодержа́вный Влади́мире, / на высоте́ стола́ седя́ ма́тере градо́в, / богоспаса́емаго Ки́ева: / испыту́я же и посыла́я к Ца́рскому гра́ду / уве́дети правосла́вную ве́ру, / обре́л еси́ безце́нный би́сер, Христа́, / избра́вшаго тя я́ко втора́го Па́вла, / и оттря́сшаго слепоту́ во святе́й купе́ли, / душе́вную, вку́пе и теле́сную: / те́мже пра́зднуем твое́ успе́ние лю́дие твои́ су́ще. / Моли́ спасти́ся держа́вы твоея́ Росси́йския нача́льником // и мно́жеству владо́мых.

Подо́бствовав вели́кому апо́столу Па́влу, / в седи́нах, всесла́вне Влади́мире, / вся, я́ко младе́нческая, мудрова́ния, я́же о и́долех тща́ния, оста́вль, / я́ко муж соверше́нный, / украси́лся еси́ боже́ственнаго креще́ния багряни́цею: / и ны́не Спа́су Христу́ в весе́лии предстоя́, / моли́ спасти́ся держа́вы Росси́йския нача́льником // и мно́жеству владо́мых.

Велича́ем тя, / святы́й равноапо́стольный кня́же Влади́мире, / и чтим святу́ю па́мять твою́, / и́долы попра́вшаго, // и всю Росси́йскую зе́млю святы́м креще́нием просвети́вшаго.

Всем святым

Первое воскресенье после праздника Пятидесятницы.

Тропарь, глас 4-й

И́же во всем ми́ре му́ченик твои́х, / я́ко багряни́цею и ви́ссом, / кровьми́ Це́рковь Твоя́ украси́вшися, / те́ми вопие́т Ти, Христе́ Бо́же: / лю́дем Твои́м щедро́ты Твоя́ низпосли́, / мир жи́тельству Твоему́ да́руй, // и душа́м на́шим ве́лию ми́лость.

Я́ко нача́тки естества́ Насади́телю тва́ри, / вселе́нная прино́сит Ти, Го́споди, богоно́сныя му́ченики; / тех моли́твами в ми́ре глубо́це // Це́рковь Твою́, жи́тельство Твое́, Богоро́дицею соблюди́, Многоми́лостиве.

Велича́ем вас, / апо́столи, му́ченицы, проро́цы, и вси святи́и, / и чтим святу́ю па́мять ва́шу, / вы́ бо моли́те о нас // Христа́ Бо́га на́шего.

Всем святым, в земли Российской просиявшим

Второе воскресенье после праздника Пятидесятницы.

Тропарь, глас 8-й

Я́коже плод кра́сный Твоего́ спаси́тельнаго се́яния, / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це // Це́рковь и страну́ на́шу Богоро́дицею соблюди́, Многоми́лостиве.

Другой тропарь, глас 4-й:

Иерусали́ма вы́шняго гра́жданы, / от земли́ на́шея возсия́вшия, / и Бо́гу во вся́цем чину́ и вся́ким по́двигом угоди́вшия, / прииди́те воспои́м, ве́рнии: / о всеблаже́ннии земли́ Росси́йския засту́пницы, / моли́теся ко Го́споду, / да поми́лует сию́ от гне́ва Своего́, / исцеля́я сокруше́ние ея́, // и ве́рныя лю́ди Своя́ уте́шит.

Днесь лик святы́х, в земли́ на́шей Бо́гу угоди́вших, / предстои́т в Це́ркви и неви́димо за ны мо́лится Бо́гу; / А́нгели с ним славосло́вят, / и вси святи́и Це́ркве Христо́вы ему́ спра́зднуют: // о нас бо мо́лят вси ку́пно Преве́чнаго Бо́га.

Ублажа́ем вас, / чудотво́рцы на́ши сла́внии, / зе́млю Ру́сскую доброде́тельми ва́шими озари́вшии, / и о́браз спасе́ния нам // светоявле́нно показа́вшии.

Великомученику Георгию Победоносцу

23 апреля / 6 мая.

Тропарь, глас 4-й

Я́ко пле́нных свободи́тель, / и ни́щих защи́титель, / немощству́ющих врач, / правосла́вных побо́рниче, / победоно́сче великому́чениче Гео́ргие, / моли́ Христа́ Бо́га // спасти́ся душа́м на́шим.

Возде́лан от Бо́га, / показа́лся еси́ благоче́стия де́латель честне́йший, / доброде́телей рукоя́ти собра́в себе́: / се́яв бо в слеза́х, весе́лием жне́ши, / страда́льчествовав же кро́вию, Христа́ прия́л еси́, / и моли́твами, свя́те, твои́ми // всем подае́ши прегреше́ний проще́ние.

Велича́ем тя, / страстоте́рпче святы́й, великому́чениче Гео́ргие, / и чтим честна́я страда́ния твоя́, // я́же за Христа́ претерпе́л еси́.

Пророку Божию Илии

20 июля / 2 августа.

Тропарь, глас 4-й

Во пло́ти А́нгел, / проро́ков основа́ние, / вторы́й предте́ча прише́ствия Христо́ва, Илия́ сла́вный, / свы́ше посла́вый Елиссе́еви благода́ть / неду́ги отгоня́ти / и прокаже́нныя очища́ти: // те́мже и почита́ющим его́ то́чит исцеле́ния.

Проро́че и прови́дче вели́ких дел Бо́га на́шего, / Илие́ великоимени́те, / веща́нием твои́м уста́вивый водото́чныя о́блаки, // моли́ о нас еди́наго Человеколю́бца.

Велича́ем тя, / святы́й сла́вный проро́че Бо́жий Илие́, / и чтим е́же на Небеса́ / на колесни́це о́гненней // пресла́вное восхожде́ние твое́.

Апостолу и евангелисту Иоанну Богослову

26 сентября / 9 октября и 8/21 мая.

Тропарь, глас 2-й

Апо́столе Христу́ Бо́гу возлю́бленне, / ускори́ изба́вити лю́ди безотве́тны: / прие́млет тя припа́дающа И́же па́дша на пе́рси Прие́мый. / Его́же моли́, Богосло́ве, / и належа́щую мглу язы́ков разгна́ти, // прося́ нам ми́ра и ве́лия ми́лости.

Вели́чия твоя́, де́вственниче, кто пове́сть? / То́чиши бо чудеса́, и излива́еши исцеле́ния, / и мо́лишися о душа́х на́ших, // я́ко Богосло́в и друг Христо́в.

Велича́ем тя, / апо́столе Христо́в и евангели́сте Иоа́нне Богосло́ве, / и чтим боле́зни и труды́ твоя́, / и́миже труди́лся еси́ // во благове́стии Христо́ве.

Святому Пророку, Предтече и Крестителю Господню Иоанну

Рождество Иоанна Предтечи

24 июня / 7 июля.

Тропарь, глас 4-й

Проро́че и Предте́че прише́ствия Христо́ва, / досто́йно восхвали́ти тя недоуме́ем мы, любо́вию чту́щии тя: / непло́дство бо ро́ждшия и о́тчее безгла́сие разреши́ся / сла́вным и честны́м твои́м рождество́м, // и воплоще́ние Сы́на Бо́жия ми́рови пропове́дуется.

Пре́жде непло́ды днесь Христо́ва Предте́чу ражда́ет, / и той есть исполне́ние вся́каго проро́чества: / Его́же бо проро́цы пропове́даша, / на Сего́ во Иорда́не ру́ку положи́в, / яви́ся Бо́жия Сло́ва проро́к, // пропове́дник, вку́пе и Предте́ча.

Велича́ем тя, / Предте́че Спа́сов Иоа́нне, / и чтим е́же от непло́дове // пресла́вное рождество́ твое́.

Усекновение главы Иоанна Предтечи

29 августа / 11 сентября.

Тропарь, глас 2-й

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра, // и подаю́щаго нам ве́лию ми́лость.

Предте́чево сла́вное усекнове́ние / смотре́ние бысть не́кое Боже́ственное: / да и су́щим во а́де Спа́сово пропове́сть прише́ствие. / Да рыда́ет у́бо Ироди́я, / беззако́нное уби́йство испроси́вши: / не зако́н бо Бо́жий, ни живы́й век возлюби́, // но притво́рный, привре́менный.

Велича́ем тя, / Крести́телю Спа́сов Иоа́нне, / и почита́ем вси честны́я твоея́ главы́ // усекнове́ние.

Святому праведному Иоанну Кронштадтскому

20 декабря / 2 января.

Тропарь, глас 1-й

Правосла́вныя ве́ры побо́рниче, / земли́ Росси́йския печа́льниче, / па́стырем пра́вило и о́бразе ве́рным, / покая́ния и жи́зни во Христе́ пропове́дниче, / Боже́ственных Та́ин благогове́йный служи́телю, / и дерзнове́нный о лю́дех моли́твенниче, / о́тче пра́ведный Иоа́нне, / цели́телю и преди́вный чудотво́рче, / гра́ду Кроншта́дту похвало́, / и Це́ркве на́шея украше́ние: / моли́ всеблага́го Бо́га // умири́ти мир, и спасти́ ду́ши на́ша.

Днесь па́стырь Кроншта́дтский предстои́т Престо́лу Бо́жию, / и усе́рдно мо́лит о ве́рных Христа́ Пастыренача́льника, / обетова́ние да́вшаго: / сози́жду Це́рковь Мою́, // и врата́ а́дова не одоле́ют ей.

Велича́ем тя, / святы́й пра́ведный о́тче Иоа́нне, / и чтим святу́ю па́мять твою́, / ты́ бо мо́лиши о нас // Христа́ Бо́га на́шего.

Святым равноапостольным Константину и Елене

Тропарь, глас 8-й

Креста́ Твоего́ о́браз на небеси́ ви́дев, / и я́коже Па́вел, зва́ние не от челове́к прие́м, / в царе́х апо́стол Твой, Го́споди, / Ца́рствующий град в руце́ Твое́й положи́, / его́же спаса́й всегда́ в ми́ре, // моли́твами Богоро́дицы, еди́не Человеколю́бче.

Константи́н днесь с ма́терию Еле́ною / Крест явля́ют, всечестно́е Дре́во, / всех у́бо иуде́ев посрамле́ние су́ще, / ору́жие же на проти́вныя ве́рных люде́й: / нас бо ра́ди яви́ся зна́мение ве́лие, // и во бране́х гро́зное.

Велича́ем вас, / святи́и благове́рнии и равноапо́стольнии ца́рие Константи́не и Еле́но, / и чтим святу́ю па́мять ва́шу, / вы́ бо святы́м Кресто́м // всю вселе́нную просвети́ли есте́.

Святой блаженной Ксении Петербургской

24 января / 6 февраля.

Тропарь, глас 7-й

Нищету́ Христо́ву возлюби́вши, / безсме́ртныя трапе́зы ны́не наслажда́ешися, / безу́мием мни́мым безу́мие ми́ра обличи́вши, / смире́нием кре́стным си́лу Бо́жию восприя́ла еси́, / сего́ ра́ди дар чудоде́йственныя по́мощи стяжа́вшая, / Ксе́ние блаже́нная, / моли́ Христа́ Бо́га // изба́витися нам от вся́каго зла покая́нием.

Конда́к, глас 3-й

Днесь све́тло лику́ет град свята́го Петра́, / я́ко мно́жество скорбя́щих обрета́ют утеше́ние, / на твоя́ моли́твы наде́ющеся, / Ксе́ние всеблаже́нная, // ты́ бо еси́ гра́ду сему́ похвала́ и утвержде́ние.

Велича́ем тя, / свята́я блаже́нная ма́ти Ксе́ние, / и чтим святу́ю па́мять твою́, / ты́ бо мо́лиши о нас // Христа́ Бо́га на́шего.

Святым равноапостольным Мефодию и Кириллу, первоучителям Словенским

Тропарь, глас 4-й

Я́ко апо́столом единонра́внии, / и слове́нских стран учи́телие, / Кири́лле и Мефо́дие богому́дрии, / Влады́ку всех моли́те, / вся язы́ки слове́нския утверди́ти в Правосла́вии и единомы́слии, / умири́ти мир, // и спасти́ ду́ши на́ша.

Свяще́нную дво́ицу просвети́телей на́ших почти́м, / Боже́ственных писа́ний преложе́нием исто́чник Богопозна́ния нам источи́вших, / из него́же да́же до днесь неоску́дно почерпа́юще, / ублажа́ем вас, Кири́лле и Мефо́дие, / Престо́лу Вы́шняго предстоя́щих, // и те́пле моля́щихся о душа́х на́ших.

Велича́ем вас, / святи́и равноапо́стольнии Мефо́дие и Кири́лле, / вся слове́нския страны́ уче́ньми свои́ми просвети́вшия, // и ко Христу́ приве́дшия.

Собору Архистратига Михаила и прочих Небесных Сил бесплотных

Тропарь, глас 4-й

Небе́сных во́инств Архистрати́зи, / мо́лим вас при́сно мы недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще ны припа́дающия приле́жно, и вопию́щия: / от бед изба́вите ны, // я́ко чинонача́льницы Вы́шних Сил.

Архистрати́зи Бо́жии, / служи́телие Боже́ственныя сла́вы, / А́нгелов нача́льницы, и челове́ков наста́вницы, / поле́зное нам проси́те, и ве́лию ми́лость, // я́ко Безпло́тных Архистрати́зи.

Велича́ем вас, / Арха́нгели и А́нгели, и вся Во́инства, / Херуви́ми и Серафи́ми, // сла́вящия Го́спода.

Велича́ем вас, / Арха́нгели, А́нгели, / Нача́ла, Вла́сти, Престо́ли, Госпо́дствия, / Си́лы и Херуви́ми, стра́шныя Серафи́ми, // прославля́ющия Го́спода.

Воспоминание чуда Архистратига Михаила в Хонех

Тропарь, глас 4-й

Небе́сных во́инств Архистрати́же, / мо́лим тя при́сно мы недосто́йнии, / да твои́ми моли́твами огради́ши нас / кро́вом крил невеще́ственныя твоея́ сла́вы, / сохраня́я нас припа́дающих приле́жно, и вопию́щих: / от бед изба́ви нас, // я́ко чинонача́льник Вы́шних Сил.

Архистрати́же Бо́жий, / служи́телю Боже́ственныя сла́вы, / А́нгелов нача́льниче, и челове́ков наста́вниче, / поле́зное нам проси́, и ве́лию ми́лость, // я́ко Безпло́тных Архистрати́г.

Святителю Николаю, архиепископу Мир Ликийских

6/19 декабря и 9/22 мая.

Тропарь, глас 4-й

Пра́вило ве́ры и о́браз кро́тости, / воздержа́ния учи́теля, / яви́ тя ста́ду твоему́ / Я́же веще́й И́стина; / сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га // спасти́ся душа́м на́шим.

В Ми́рех, свя́те, священноде́йствитель показа́лся еси́: / Христо́во бо, преподо́бне, ева́нгелие испо́лнив, / положи́л еси́ ду́шу твою́ о лю́дех твои́х, / и спасл еси́ непови́нныя от сме́рти, / сего́ ра́ди освяти́лся еси́, // я́ко вели́кий таи́нник Бо́жия благода́ти.

О всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем сем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния, да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно, и во ве́ки веко́в. Ами́нь.

Велича́ем тя, / святи́телю о́тче наш Нико́лае, / и чтим святу́ю па́мять твою́, / ты́ бо мо́лиши о нас // Христа́ Бо́га на́шего.

Святым царственным страстотерпцам

Тропарь, глас 4-й

Днесь, благове́рнии лю́дие, све́тло почти́м / седмери́цу честну́ю ца́рственных страстоте́рпец, / Христо́ву еди́ну дома́шнюю Це́рковь: / Никола́я и Алекса́ндру, / Алекси́я, О́льгу, Татиа́ну, Мари́ю и Анастаси́ю. / Ти́и бо уз и страда́ний многоразли́чных не убоя́вшеся, / от богобо́рных смерть и поруга́ние теле́с прия́ша, / и дерзнове́ние ко Го́споду в моли́тве улучи́ша. / Сего́ ра́ди к ним с любо́вию возопии́м: / о святи́и страстоте́рпцы, / гла́су покая́ния и стена́нию наро́да на́шего вонми́те, / зе́млю Росси́йскую в любви́ к Правосла́вию утверди́те, / от междоусо́бныя бра́ни сохрани́те, / мир ми́рови у Бо́га испроси́те, // и душа́м на́шим ве́лию ми́лость.

Избра́ннии Царе́м ца́рствующих и Го́сподем госпо́дствующих / от ро́да царе́й Росси́йских, благове́рнии му́ченицы, / му́ки душе́вныя и смерть теле́сную за Христа́ прии́мшии, / и венцы́ Небе́сными увенча́вшиися, / к вам я́ко покрови́телем на́шим ми́лостивым / с любо́вию благода́рне вопие́м: / ра́дуйтеся, ца́рственнии страстоте́рпцы, // за Русь Святу́ю пред Бо́гом усе́рднии моли́твенницы.

Велича́ем вас, / святи́и ца́рственнии страстоте́рпцы, / и чтим честна́я страда́ния ва́ша, // я́же за Христа́ претерпе́ли есте́.

Собору новомучеников и исповедников Российских

25 января / 7 февраля, если воскресенье, или в ближайшее воскресенье после 25 января.

Тропарь, глас 4-й

Днесь ра́достно лику́ет Це́рковь Ру́сская, / прославля́ющи новому́ченики и испове́дники своя́: / святи́тели и иере́и, / ца́рственныя страстоте́рпцы, / благове́рныя кня́зи и княги́ни, / преподо́бныя му́жи и жены́, / и вся правосла́вныя христиа́ны, / во дни гоне́ния безбо́жнаго / жизнь свою́ за ве́ру во Христа́ положи́вшия, / и кровьми́ и́стину соблю́дшия. / Тех предста́тельством, долготерпели́ве Го́споди, / страну́ на́шу в Правосла́вии сохрани́ // до сконча́ния ве́ка.

Днесь новому́ченицы Росси́йстии / в ри́зах бе́лых предстоя́т А́гнцу Бо́жию, / и со А́нгелы песнь побе́дную воспева́ют Бо́гу: / благослове́ние, и сла́ва, и прему́дрость, / и хвала́, и честь, и си́ла, и кре́пость // на́шему Бо́гу во ве́ки веко́в. Ами́нь.

О святи́и новому́ченицы и испове́дницы Росси́йстии: святи́телие и па́стырие Це́ркве Христо́вы, ца́рственнии страстоте́рпцы, благове́рнии кня́зие и княги́ни, до́блии во́ини, мона́си и мирсти́и, благочести́вии му́жие и жены́, во вся́цем во́зрасте и сосло́вии за Христа́ пострада́вшии, ве́рность Ему́ да́же до сме́рти свиде́тельствовавшии, и вене́ц жи́зни от Него́ прие́мшии! Вы во дни гоне́ния лю́таго, зе́млю на́шу от безбо́жных пости́гшаго, на суди́щах, в заточе́ниих, и про́пастех земны́х, в го́рьких рабо́тах, и вся́ких ско́рбных обстоя́ниих, о́браз терпе́ния и непосты́днаго упова́ния му́жественне яви́ли есте́. Ны́не же в раи́ сла́дости наслажда́ющеся, пред Престо́лом Бо́жиим во сла́ве предстоите́, и при́сно хвалу́ и хода́тайство со А́нгелы и все́ми святы́ми Триеди́ному Бо́гу возно́сите. Сего́ ра́ди мы недо́стойнии мо́лим вас, святи́и сро́дницы на́ши: не забу́дите земна́го Оте́чества ва́шего, грехо́м Ка́инова братоуби́йства, поруга́нием святы́нь, безбо́жием, и на́шими беззако́нии отягче́ннаго. Умоли́те Го́спода Сил, да утверди́т Це́рковь свою́ непоколеби́му в ми́ре сем многомяте́жнем и лука́вом; да возроди́т в земли́ на́шей дух разума и благочестия, дух святости и страха Божия, дух братолю́бия и ми́ра; да па́ки бу́дем мы ца́рское свяще́ние, род Бо́жий, избра́нный и святы́й, при́сно с ва́ми сла́вящий Отца́, и Сы́на, и Свята́го Ду́ха, во ве́ки веко́в. Ами́нь.

Велича́ем вас, / святи́и новому́ченицы и испове́дницы Росси́йстии, / и чтим честна́я страда́ния ва́ша, // я́же за Христа́ претерпе́ли есте́.

Священномученику Российскому, архиерею или иерею

Тропарь, глас 3-й

Це́ркве Ру́сския сто́лпе непоколеби́мый, / благоче́стия пра́вило, / жития́ ева́нгельскаго о́бразе, / священному́чениче (имя), / Христа́ ра́ди пострада́вый да́же до кро́ве, / Его́же моли́ усе́рдно / я́ко Нача́льника и Соверши́теля спасе́ния, / Русь Святу́ю утверди́ти в Правосла́вии // до сконча́ния ве́ка.

Восхва́лим, ве́рнии, / изря́днаго во святи́телех (или: свяще́нницех), / и сла́внаго в му́ченицех (имя), / Правосла́вия побо́рника и благоче́стия ревни́теля, / земли́ Ру́сския кра́сное прозябе́ние: / и́же страда́нием Небесе́ дости́же, / и та́мо те́пле мо́лит Христа́ Бо́га // спасти́ся душа́м на́шим.

О избра́нниче и уго́дниче Христо́в, священному́чениче (имя), Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго, от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я, и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша, и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твеник: я́ко да моли́твами твои́ми соблюде́тся в Правосла́вии Свята́я Русь, и непреста́нно сла́вится в ней и́мя Пресвяты́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.

Велича́ем тя, / святы́й священному́чениче (имя), / и чтим честна́я страда́ния твоя́, / я́же за Христа́ во утвержде́ние на Руси́ Правосла́вия // претерпе́л еси́.

Святой равноапостольной княгине Ольге

Тропарь, глас 1-й

Крила́ми богоразу́мия впери́вши твой ум, / возлете́ла еси́ превы́ше ви́димыя тва́ри; / взыска́вши Бо́га и Творца́ вся́ческих, и Того́ обре́тши, / па́ки рожде́ние креще́нием прия́ла еси́; / дре́ва живо́тнаго наслажда́ющися, нетле́нна во ве́ки пребыва́еши, // О́льго присносла́вная.

Воспое́м днесь Благоде́теля всех Бо́га, / просла́вльшаго в Росси́и О́льгу богому́друю, // да моли́твами ея́ пода́ст душа́м на́шим грехо́в оставле́ние.

Велича́ем тя, / блаже́нная и равноапо́стольная княги́не О́льго, / и чтим святу́ю па́мять твою́, / и́долы попра́вшую, // и мно́гия лю́ди Росси́йския святы́м Креще́нием просвети́вшую.

Великомученику и целителю Пантелеимону

27 июля / 9 августа.

Тропарь, глас 3-й

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние // пода́ст душа́м на́шим.

Подража́тель сый Ми́лостиваго, / и исцеле́ний благода́ть от Него́ прие́м, / страстоте́рпче и му́чениче Христа́ Бо́га, / моли́твами твои́ми душе́вныя на́ша неду́ги исцели́, / отгоня́ при́сно борца́ собла́зны от вопию́щих ве́рно: // спаси́ ны, Го́споди.

О вели́кий уго́дниче Христо́в, страстоте́рпче и врачу́ многоми́лостивый Пантелеи́моне! Умилосе́рдися надо мно́ю, гре́шным рабо́м, услы́ши стена́ние и вопль мой, уми́лостиви Небе́снаго Верхо́внаго Врача́ душ и теле́с на́ших, Христа́ Бо́га на́шего, да да́рует ми исцеле́ние от неду́га, мя гнету́щаго. Приими́ недосто́йное моле́ние гре́шнейшаго па́че всех челове́к, посети́ мя благода́тным посеще́нием; не возгнуша́йся грехо́вных язв мои́х, пома́жи их еле́ем ми́лости твоея́, и исцели́ мя: да здрав сый душе́ю и те́лом, оста́ток дней мои́х, благода́тию Бо́жиею, возмогу́ провести́ в покая́нии и угожде́нии Бо́гу, и сподо́блюся восприя́ти благи́й коне́ц жития́ моего́. Ей, уго́дниче Бо́жий! Умоли́ Христа́ Бо́га, да предста́тельством твои́м да́рует здра́вие те́лу моему́, и спасе́ние души́ мое́й. Ами́нь.

Велича́ем тя, / страстоте́рпче святы́й и целе́бниче Пантелеи́моне, / и чтим честна́я страда́ния твоя́, // я́же за Христа́ претерпе́л еси́.

Святым первоверховным апостолам Петру и Павлу

29 июня / 12 июля.

Тропарь, глас 4-й

Апо́столов первопресто́льницы, / и вселе́нныя учи́телие, / Влады́ку всех моли́те, / мир вселе́нней дарова́ти, // и душа́м на́шим ве́лию ми́лость.

Тве́рдыя и боговеща́нныя пропове́датели, / верх апо́столов Твои́х, Го́споди, / прия́л еси́ в наслажде́ние благи́х Твои́х и поко́й: / боле́зни бо о́нех и смерть прия́л еси́ па́че вся́каго всепло́дия, // Еди́не све́дый серде́чная.

Велича́ем вас, / апо́столи Христо́вы Петре и Па́вле, / весь мир уче́ньми свои́ми просвети́вшия, // и вся концы́ ко Христу́ приве́дшия.

Святителям Московским Петру, Алексию, Ионе, Макарию, Филиппу, Иову, Ермогену, Тихону, Петру, Филарету, Иннокентию и Макарию

Тропарь, глас 4-й

Первопресто́льницы Росси́йстии, / и́стиннии храни́телие апо́стольских преда́ний, / столпи́ непоколеби́мии, Правосла́вия наста́вницы, / святи́тели Моско́встии, / Влады́ку всех моли́те, / мир вселе́нней дарова́ти, // и душа́м на́шим ве́лию ми́лость.

Во святи́телех благоче́стно пожи́сте, / и лю́ди к богоразу́мию наста́висте, / и до́бре Бо́гу угоди́сте, / сего́ ра́ди от Него́ нетле́нием и чудесы́ просла́вистеся, // я́ко ученицы́ Бо́жия благода́ти.

Велича́ем вас, / святи́тели Моско́встии, / и чтим святу́ю па́мять ва́шу, / вы́ бо мо́лите о нас // Христа́ Бо́га на́шего.

Преподобному Серафиму Саровскому

2/15 января и 19 июля / 1 августа.

Тропарь, глас 4-й

От ю́ности Христа́ возлюби́л еси́, блаже́нне, / и Тому́ Еди́ному рабо́тати пла́менне вожделе́в, / непреста́нною моли́твою и трудо́м в пусты́ни подвиза́лся еси́, / умиле́нным же се́рдцем любо́вь Христо́ву стяжа́в, / избра́нник возлю́блен Бо́жия Ма́тере яви́лся еси́. / Сего́ ра́ди вопие́м ти: // спаса́й нас моли́твами твои́ми, Серафи́ме, преподо́бне о́тче наш.

Ми́ра красоту́ и я́же в нем тле́нная оста́вив, преподо́бне, / в Саро́вскую оби́тель всели́лся еси́, / и та́мо а́нгельски пожи́в, мно́гим путь был еси́ ко спасе́нию: / сего́ ра́ди и Христо́с тебе́, о́тче Серафи́ме, просла́ви, / и да́ром исцеле́ний и чуде́с обогати́. / Те́мже вопие́м ти: // ра́дуйся, Серафи́ме, преподо́бне о́тче наш.

О пречу́дный о́тче Серафи́ме, вели́кий Саро́вский чудотво́рче, всем прибега́ющим к тебе́ скоропослу́шный помо́щниче! Во дни земна́го жития́ твоего́ никто́же от Тебе ́ тощ и неуте́шен оты́де, но всем в сла́дость бысть виде́ние ли́ка твоего́ и благоуве́тливый глас слове́с твои́х. К сим же и дар исцеле́ний, дар прозре́ния, дар немощны́х душ врачева́ния оби́лен в тебе́ яви́ся. Егда́ же призва́ тя Бог от земны́х трудо́в к Небе́сному упокое́нию, николи́же любы́ твоя́ преста́ от нас, и невозмо́жно есть исчи́слити чудеса́ твоя́, умно́жившаяся я́ко зве́зды небе́сныя: се́ бо по всем конце́м земли́ на́шея лю́дем Бо́жиим явля́ешися и да́руеши им исцеле́ния. Те́мже и мы вопие́м ти: о прети́хий и кро́ткий уго́дниче Бо́жий, дерзнове́нный к Нему́ моли́твенниче, николи́же призыва́ющия тя отрева́яй! Вознеси́ о нас благомо́щную твою́ моли́тву ко Го́споду Сил, да да́рует нам вся благопотре́бная в жи́зни сей, и вся к душе́вному спасе́нию поле́зная, да огради́т нас от паде́ний грехо́вных, и и́стинному покая́нию да научи́т нас, во е́же безпреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу во ве́ки веко́в. Ами́нь.

Ублажа́ем тя, / преподо́бне о́тче наш Серафи́ме, / и чтим святу́ю па́мять твою́, / наста́вниче мона́хов, // и собесе́дниче А́нгелов.

Преподобному Сергию Радонежскому

5/18 июля и 25 сентября / 8 октября.

Тропарь, глас 4-й

И́же доброде́телей подви́жник, / я́ко и́стинный во́ин Христа́ Бо́га, / на стра́сти вельми́ подвиза́лся еси́ в жи́зни вре́менней, / в пе́ниих, бде́ниих же, и поще́ниих о́браз быв твои́м ученико́м: / те́мже и всели́ся в тя Пресвяты́й Дух, / Его́же де́йствием све́тло укра́шен еси́; / но я́ко име́я дерзнове́ние ко Святе́й Тро́ице, / помина́й ста́до, е́же собра́л еси́, му́дре, / и не забу́ди, я́коже обеща́лся еси́, / посеща́я чад твои́х, // Се́ргие, преподо́бне о́тче наш.

Христо́вою любо́вию уязви́вся, преподо́бне, / и Тому́ невозвра́тным жела́нием после́довав, / вся́кое наслажде́ние плотско́е возненави́дел еси́, / и я́ко со́лнце, Оте́честву твоему́ возсия́л еси́: / тем и Христо́с да́ром чуде́с обогати́ тя. / Помина́й нас, чту́щих пресве́тлую па́мять твою́, / да зове́м ти: // ра́дуйся, Се́ргие богому́дре.

О свяще́нная главо́, преподо́бне и богоно́сне о́тче наш Се́ргие, моли́твою твое́ю, и ве́рою, и любо́вию я́же к Бо́гу, и чистото́ю се́рдца, еще́ на земли́ во оби́тель Пресвяты́я Тро́ицы ду́шу твою́ устро́ивый, и а́нгельскаго обще́ния, и Пресвяты́я Богоро́дицы посеще́ния сподо́бивыйся, и дар чудоде́йственныя благода́ти прие́мый, по отше́ствии же твое́м от земны́х наипа́че к Бо́гу прибли́живыйся, и Небе́сныя си́лы приобщи́выйся, но и от нас ду́хом любве́ твоея́ не отступи́вый, и честны́я твоя́ мо́щи я́ко сосу́д благода́ти по́лный и преизлива́ющийся нам оста́вивый! Ве́лие име́я дерзнове́ние ко Всеми́лостивому Влады́це, моли́ спасти́ рабы́ Его́, су́щей в тебе́ благода́ти Его́ ве́рующия, и к тебе́ с любо́вию притека́ющия. Испроси́ нам от Великодарови́таго Бо́га на́шего вся́кий дар, всем и коему́ждо благопотре́бен, ве́ры непоро́чны соблюде́ние, градо́в на́ших утвержде́ние, ми́ра умире́ние, от гла́да и па́губы избавле́ние, от наше́ствия иноплеме́нных сохране́ние, скорбя́щим утеше́ние, неду́гующим исцеле́ние, па́дшим возставле́ние, заблужда́ющим на путь и́стины и спасе́ния возвраще́ние, подвиза́ющимся укрепле́ние, благоде́лающим в де́лех благи́х преспе́яние и благослове́ние, младе́нцем воспита́ние, ю́ным наставле́ние, неве́дущим вразумле́ние, сирота́м и вдови́цам заступле́ние, отходя́щим от сего́ вре́меннаго жития́ к ве́чному благо́е уготовле́ние и напу́тствие, отше́дшим блаже́нное упокое́ние, и вся ны споспешеству́ющими твои́ми моли́твами сподо́би в день Стра́шнаго Суда́ шу́ия ча́сти изба́витися, десны́я же страны́ о́бщники бы́ти, и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

Ублажа́ем тя, / преподо́бне о́тче наш Се́ргие, / и чтим святу́ю па́мять твою́, / наста́вниче мона́хов, // и собесе́дниче А́нгелов.

Богослужебный день начинается с вечера предшествующего дня, поэтому тропарь понедельника читается на вечерних богослужениях в воскресенье и на утренних богослужениях в понедельник, и т. д.

Этот припев отсутствует в Цветной Триоди и Типиконе, однако он указывается в нотной Цветной Триоди Синодального издания.

Поделиться ссылкой на выделенное

Нажмите правой клавишей мыши и выберите «Копировать ссылку»

Избранные тропари. Общие тропари Святым Угодникам

Тропарь в православной церкви — краткое молитвенное песнопение, с которого христианская гимнография начала свое развитие, в котором раскрывается сущность праздника, прославляется и призывается на помощь священный образ.

Избранные тропари

Кресту

Глас 1-ый: Спаси Господи люди Твоя, / и благослови достояние Твое, / победы православным христианом / на сопротивныя даруя, / и Твое сохраняя // Крестом Твоим жительство.

Рождеству Христову

Тропарь, глас 4-ый: Рождество Твое, Христе Боже наш, / возсия мирови свет разума: / в Нем бо звездам служащии / звездою учахуся / Тебе кланятися, Солнцу правды, / и Тебе ведети с высоты Востока: // Господи, слава Тебе.
Кондак, глас 3-и: Дева днесь Пресущественнаго раждает, / и земля вертеп Неприступному приносит: / Ангели с пастырьми славословят, / волсви же со звездою путешествуют, // нас бо ради родися Отроча младо, Превечный Бог.

Крещению

Глас 1-ый: Во Иордане крещающуся Тебе, Господи, / Тройческое явися поклонение: / Родителев бо глас свидетельствоваше Тебе, / возлюбленнаго Тя Сына именуя: / и Дух в виде голубине, / извествоваше словесе утверждение. / Явлейся, Христе Боже, // и мир просвещей, слава Тебе.

Иконе Знамения

Глас 4-ый: Яко необоримую стену / и источник чудес / стяжавше Тя раби Твои, Богородице Пречистая / сопротивных ополчения незлагаем. / Темже молим Тя / мир отечеству нашему даруй // и душам нашим велию милость.

Казанской иконе

Глас 4-ый: Заступнице усердная, / мати Господа вышняго / за всех молиши Сына Твоего Христа Бога нашего, / и всем твориши спастися, в державный Твой покров прибегающим / всех нас заступи, / о Госпоже, Царице и Владычице, иже в напастех и в скорбех и в болезнех обремененных грехи многими, / предстоящих и молящихся Тебе умиленною душею и сокрушенным сердем пред пречистым Твоим образом со слезами, / и невозвратно надежду имущих на Тя, / избавления всех зол, / всем полезная даруй, / и вся спаси, Богородице Дево, // Ты бо еси божественный покров рабом Твоим.
Кондак, глас 6-ый: Не имамы иныя помощи, / не имамы иныя надежды, / разве Тебе, Владычице / ты нам помози, / на Тебе надеемся / и Тобою хвалимся, / Твои бо есьмы раби, // да не постыдимся.

Тропари Божией Матери

Глас 4-ый: К Богородице прилежно ныне притецем, / грешнии и смиреннии, и припадем, / в покаянии зовуще из глубины души / Владычице, помози, на ны милосердовавши. / Потщися, погибаем от множества прегрешений./ Не отврати Твоя раби тщи // Тя бо едину недежду имамы.
Глас 6-ый: Предстательство христиан непостыдное, / ходатайство ко Творцу непреложное, / не презри грешных молений гласы, / но предвари, яко Благая, на помощь нас, верно зовущих Ти / ускори на молитву и потщися на умоление // предстательствующи присно, Богородице, чтущих Тя.

Праздику Покрова

Тропарь глас 4-ый: Днесь благовернии людие светло празднуем, / осеняеми Твоим Богомати пришествием, / и к Твоему взирающе пречистому образу, умильно глаголем: / покрый нас честным Твоим покровом / и избави нас от всякаго зла, / моляще Сына Твоего Христа Бога нашего, // спасти души наша.
Кондак, глас 3-ый. Дева днесь предстоит в церкви, / и с лики святых невидимо за ны молится Богу, ангели со архиереи поклоняются, / апостоли же со пророки ликовствуют: // нас бо ради молит Богородица Превечнаго Бога.

Новомученикам Российским

Глас 4-ый: Цвети российскаго луга духовнаго / в годину лютых гонений дивно процветшии / новомученицы и исповедницы бесчисленнии; / святителие, царственнии страстотерпцы и пастырие, / монаси и мирстии, мужие, жены же и дети, / добрый плод в терпении Христу принесшии, / молитеся Ему, яко насадителю вашему, / да избавит люди Своя от безбожных и злых, / да утверждается же Церковь Русская / кровьми и страданиями вашими // во спасение душ наших.

Царской семье

Глас 5-ый: Царства земнаго лишение / узы и страдания многоразличныя кротко претерпел еси / свидетельствовав о Христе даже до смерти от богоборцев / страстотерпче великий боговенчанный царю Николае. / Сего ради мученическим венцем на небесех / венча тя с царицею, и чады, и слуги твоими Христос Бог, / Егоже моли помиловати страну Российскую, // и спасти души наша. Равноапостольной Нине

Тропарь, глас 1-ый: Слова Божия служительнице, / во апостольстей проповеди подражая первозванному Андрею и прочим апостолом, / просветительнице Иверии, / и Духа Святаго цевнице, / святая равноапостольная Нино, // моли Христа Бога спастися душам нашим.

Блаженной Ксении Петербургской

Тропарь, глас 1-ый: Суеты земнаго мира отвергшися, / крест жития бездомнаго прияла еси. / Скорбей, лишений, людскаго осмеяния не убоялася еси, / любовь же Христову познала еси, / еюже ныне на небеси услаждаешися; // Ксение блаженная богомудрая, молися о спасении душ наших.

Великомученику Георгию

Тропарь, глас 4-ый: Яко пленных свободитель / и нищих защититель, / немощствующих врач, / царей поборниче, / победоносче великомучениче Георгие, / моли Христа Бога, // спастися душам нашим.

Мученице Александре

Тропарь, глас 4-ый: Агница Твоя, Иисусе, Александра, / зовет велиим гласом: / Тебе, Женише мой, люблю, / и Тебе ищущи страдальчествую, / и сраспинаюся, и спогребаюся крещению Твоему, / и стражду Тебе ради, яко да царствую в Тебе, / и умираю за Тя, да и живу с Тобою, / но яко жертву непорочную приими мя, с любовью пожершуюся Тебе: // тоя молитвами, яко милостив, спаси души наша.

Апостолу Иоанну Богослову

Тропарь, глас 2-ый: Апостоле Христу Богу возлюбленне, / ускори избавити люди безответны, / приемлет тя припадающа, Иже падша на перси приемый. / Егоже моли Богослове, и надлежащую мглу языков разгнати, // прося нам мира и велия милости.

Святым Кириллу и Мефодию

Тропарь, глас 4-ый: Яко апостолом единоравнии / и Словенских стран учителие, / Кирилле и Мефодие богомудрии, / Владыку всех молите, / вся языки словенския утвердити в Православии и единомыслии, / умирити мир, // и спасти души наша.

Равноапостольным царям Константину и Елене

Тропарь, глас 8-ый: Креста Твоего образ на небеси видев, / и якоже Павел звание не от человек прием, / во царех апостол Твой, Господи, / царствующий град в руце Твоей положи. / Егоже спасай всегда в мире, // молитвами Богородицы, едине Человеколюбче.

Рождеству Иоанна Предтечи

Тропарь, глас 2-ый: Пророче и Предтече пришествия Христова, / достойно восхвалити тя недоумеем мы, / любовию чтущии тя: / неплодство бо рождшия и отчее безгласие разрешися, / славным твоим рождеством, // и воплощение Сына Божия мирови проповедуется.

Апостолам Петру и Павлу

Тропарь, глас 4-ый: Апостолов первопрестольницы, / и вселенныя учителие, / Владыку всех молите, / мир вселенней даровати, // и душам нашим велию милость.

Святителю Иоанну Шанхайскому

Тропарь, глас 5-ый: Попечетие твое о пастве в странствии ея, / се прообраз и молитв твоих за весь мир присно возносимых; / тако веруем, познав любовь твою, святителю и чудотворче Иоанне! / Весь от Бога освящен священнодействием пречистых таин, / ими же присно укрепляем, / поспешал еси ко страждущим, / целителю отраднейший. // Поспеши и на помощь нам, всем сердцем чтущим тя.

Равноапостольной княгине Ольге

Тропарь, глас 1-ый: Крылами богоразумия вперивши твой ум, / возлетела еси превыше видимыя твари: / взыскавши Бога и Творца всяческих, / и Того обретши, паки рождение крещением прияла еси: / древа животнаго наслаждающися, // нетленна во веки пребываеши, Ольго приснославная.

Равноапостольному князю Владимиру

Тропарь, глас 4-ый: Уподобился еси купцу, ищущему добраго бисера, / славнодержавне Владимире, / на высоте стола седя матере градов, богоспасаемого Киева, / испытуя же и посылая к царскому граду уведети Православную веру, / обрел еси бесценный бисер Христа, / избравшаго тя яко втораго Павла / и отрясшаго слепоту во святей купели, душевную вкупе и телесную. / Темже празднуем твое успение людие твои суще. / Моли спастися стране твоей Российстей // и подати православным людем мир и велию милость.

Святому Серафиму Саровскому

Тропарь, глас 4-ый: От юности Христа возлюбил еси, блаженне, / и Тому единому работати пламенне вожделев, / непрестанною молитвою и трудом в пустыни подвизался еси, / умиленным же сердцем любовь Христову стяжав, / избранник возлюблен Божия Матере явился еси. / Сего ради вопием ти: // спасай нас молитвами твоими, Серафиме преподобне, отче наш.

Пророку Илии

Тропарь, глас 4-ый: Во плоти ангел, пророков основание, / вторый предтеча пришествия Христова, Илия славный, / свыше пославый Елисееви благодать, / недуги отгоняти и прокаженныя очищати: // тем же и почитающим его точит исцеления.

Равноапостольной Марие Магдалине

Тропарь, глас 1-ый: Христу нас ради от Девы рождшемуся, / честная Магдалина Мария последовала еси, / Того оправдания и законы хранящи: / темже днесь всесвятую твою память празднующе, // грехов разрешение молитвами твоими приемлем.

Великомученику и целителю Пантелеимону

Тропарь, глас 3-ий: Страстотерпче святый и целебниче Пантелеимоне, / моли милостиваго Бога, / да прегрешений оставление // подаст душам нашим.

Благоверному князю Александру Невскому

Тропарь, глас 4-ый: Познай свою братию, российский Иосифе, / не в Египте, но на небеси царствующий, / благоверне княже Александре, / и приими моления их, / умножая жита людем плодоносием земли твоея, / грады владычествия твоего ограждая молением, // и наследником твоим благоверным людем на сопротивныя споборствуй.

Преподобному Сергию Радонежскому

Тропарь, глас 4-ый: Иже добродетелей подвижник, / яко истинный воин Христа Бога, / на страсти вельми подвизался еси в жизни временней, / в пениих, бдениих же и пощениих, образ быв твоим учеником: / темже и вселися в тя Пресвятый Дух, / Его же действием светло украшен еси. / Но яко имея дерзновение ко Святей Троице, / поминай стадо, еже собрал еси мудре: / и не забуди, якоже обещался еси, / посещая чад твоих, // Сергие Преподобне, отче наш.

Преподобному Роману Сладкопевцу

Тропарь, глас 8-ый: В тебе отче известно спасеся еже по образу: / приим бо крест последовал еси Христу, / и дея учил еси презирати убо плоть, преходит бо: / прилежати же о души, вещи безсмертней. // Темже и со ангелы срадуется, преподобне Романе, дух твой.

Праведному отцу Иоанну Кронштадтскому

Тропарь, глас 4-ый: Во Христе во веки живый, чудотворче, / любовию милуяй сущия в бедах. / Слыши чада твоя, верою тя призывающия, / щедрыя помощи от тебе чающия, // Иоанне Кронштадтский, возлюблене пастырю наш.
Кондак, глас 4-ый: От младенчества Богом избранный, / и во отрочестве дар учения чудесно от Него приемый, / и к пресвитерству в сонном видении преславно призван быв, / пастырь дивный Церкве Христовы явился еси, / отче Иоанне, благодати тезоимените. / Моли Христа Бога // всем нам с тобою в Царствии Божием быти.

Архангелу Михаилу

Тропарь, глас 4-ый: Небесных воинств архирстратиже, / молим тя присно мы недостойнии, / да твоими молитвами оградиши нас / кровом крил невещественныя твоея славы, / сохраняюще ны припадающыя прилежно, и вопиющыя: / от бед избави ны, // яко чиноначальниче вышних сил.

Апостолу Андрею Первозванному

Тропарь, глас 4-ый: Яко Апостолов Первозванный, / и Верховнаго сущий брат, / Владыце всех Андрее молися, / мир вселенней даровати, // и душам нашим велию милость.

Святителю Николаю Чудотворцу

Тропарь, глас 4-ый: Правило веры и образ кротости, / воздержания учителя / яви тя стаду твоему, / яже вещей истина: / сего ради стяжал еси смирением высокая, / нищетою богатая. / Отче священноначальниче Николае, моли Христа Бога, // спастися душам нашим.

Преподобному Герману Аляскинскому

Тропарь, глас 4-ый: Пустыни северныя подвижниче / и о всем мире благодатный молитвенниче, / православныя веры обучителю и благочестия добрый наставниче, / Аляски украшение / и всея Америки радование. // Преподобне Германе, моли Христа Бога, да спасет души наша.

Величания

Апостолу: Величаем тя Апостоле Христов. имя . / и чтим болезни и труды твоя, // имиже трудился еси во благовестии Христове.
Мученику: Величаем тя страстотерпе святый . имя . / и чтим честная страдания твоя // яже за Христа претерпел еси.
Святителю: Величаем тя святителю отче . имя . / и чтим святую память твою, / ты бо молиши о нас // Христа Бога нашего.
Преподобному: Ублажаем тя преподобне отче . имя . / и чтим святую память твою, / наставниче монахов // и собеседниче ангелов.

Общие тропари Святым Угодникам

Глас 2-ый: Пророка Твоего (имя) память, Господи, празднующе, тем Тя молим: спаси души наша.

Апостолу

Глас 3-ий: Апостоле святый (имя) , моли милостиваго Бога, да прегрешений оставление подаст душам нашим.

Апостолам

Глас 3-ий: Апостоли святии, молите милостиваго Бога, да прегрешений оставление подасть душам нашим.

Святителю

Глас 4-ый: Правило веры и образ кротости, воздержания учителя. Яви тя стаду твоему яже вещей истина; сего ради стяжал еси смирением высокая, нищетою богатая. Отче, святителю (имя) , моли Христа Бога спастися душам нашим.

Святителям

Глас 4-ый: Боже Отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Преподобному

Глас 8-ый: В тебе, отче, известно спасеся, еже по образу: приим бо крест, последовал еси Христу, и дея учил еси презирати убо плоть, преходит бо: прилежати же о души вещи безсмертней. Темже и со ангелы срадуется, преподобне (имя), дух твой.

Преподобным

Глас 4-ый: Боже отец наших, творяй присно с нами по твоей кротости, не отстави милость Твою от нас, но молитвами их в мире управи живот наш.

Мученику

Глас 4-ый: Мученик Твой Господи (имя) , во страдании своем венец прият нетленный от Тебя Бога нашего: имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Мученикам

Глас 4-ый: Мученицы Твои Господи, во страданиих своих венцы прияша нетленныя от Тебе Бога нашего: имуще бо крепость Твою, мучителей низложиша, сокрушиша и демонов немощныя дерзости. Тех молитвами спаси души наша.
Глас 1-ый: Болезньми святых, имиже о Тебе пострадаша, умолен буди Господи, и вся наша болезни исцели, Человеколюбче, молимся.

Священномученику

Глас 4-ый: И нравом причастник и престолом наместник апостолом быв, деяние обрел еси богодухновенне, в видения восход: сего ради слово истины исправляя, и веры ради пострадал еси даже до крове, священномучениче (имя) , моли Христа Бога, спастися душам нашим.

Священномученикам

Глас 4-ый: Боже отец наших, творяй присно с нами по Твоей кротости, не отстави милость Твою от нас, но молитвами их в мире управи живот наш.

Преподобномученику

Глас 8-ый: В тебе отче известно спасеся, еже по образу: приим бо крест, последовал еси Христу, и дея учил еси презирати убо плоть, преходит бо, прилежати же о души, вещи безсмертней. Темже и со ангелы срадуется, преподобне (имя) , дух твой.

Преподобномученикам

Глас 4-ый: Боже отец наших, творяй присно с нами по твоей кротости, не отстави милость Твою от нас, но молитвами их в мире управи живот наш.

Мученице

Глас 4-ый: Агница Твоя Иисусе (имя) , зовет велиим гласом: Тебе, Женише мой, люблю, и Тебе ищущи страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовью пожершуюся Тебе: тоя молитвами, яко милостив, спаси души наша.

Мученицам

Глас 1-ый: Агницы словесные, Агнцу и Пастырю приведостеся мучением ко Христу, течение скончавше и веру соблюдше. Темже днесь радостною душею совершаем, досточуднии, святую вашу память, Христа величающе.

Преподобней жене

Глас 8-ой: В тебе мати известно спасеся, еже по образу: приимши бо крест, последовала еси Христу, и деющи учила еси, презирати убо плоть, преходит бо: прилежати же о души вещи безсмертней. Темже и со ангелы срадуется, преподобная (имя) , дух твой.

Преподобным женам

Глас 2-ый: Истинному желанию уневестившеся христославнии, и временнаго обручника отвергшеся совокупления, и добродетельными подвиги возрастше, на высоту востекосте нетления, краснодушнии и многобогатнии, столпи инокующим женам и правило. Темже о нас молите непрестанно, иже любовию вашу память празднующих.

Преподобномученице

Глас 4-ый: Агница Твоя Иисусе (имя) , зовет велиим гласом: Тебе Женише мой, люблю, и тебе ищущи страдальчествую, и сраспинаюся, и спогребаюся крещению Твоему, и стражду Тебе ради яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе. Тоя молитвами, яко милостив, спаси души наша.

Исповеднику

Глас 8-ый: Православия наставниче, благочестия учителю и чистоты, вселенныя светильниче, архиереев богодухновенное удобрение, (имя) премудре, ученьми твоими вся просветил еси, цевнице духовная, моли Христа Бога, спастися душам нашим.

Безсребренникам

Глас 8-ый: Святии безсребренницы и чудотворцы, посетите немощи наша: туне приясте, туне дадите нам.

Христа ради юродивым

Глас 1-ый: Глас апостола твоего Павла услышав глаголющ: мы юроди Христа ради, раб Твой Христе Боже, (имя) , юрод бысть на земли Тебе ради. Темже память его почитающе, Тебе молим, Господи, спаси души наша.